Génesis 23

1Saran kawsarqan pachak iskay chunka qanchisniyoq watata, 2hinaspan Saraqa Quiriat-arbapi wañukapurqan (chaymi Hebrón), Canaán suyupi. Abrahamqa Saramanta llakikuspa waqaqmi rirqan. 3Hinaspataq wañuqnin qayllamanta hatarispa Het runakunata nirqan: 4–Karu llaqtayoqmi purikuqmi qankuna ukhupi kani, aya p'ampana hallp'ata qowaychis, wañuqniyta p'ampakapunaypaq, nispa. 5Hinan Het runakunaqa nirqanku: 6–Wiraqocháy, uyariwayku, ancha atiyniyoqmi ñoqayku ukhupi kanki, allinkaq aya p'ampanaykupi wañuqniykitaqa p'ampakuy, manan mayqenniykupas aya p'ampanataqa hark'asqaykikuchu, nispa. 7Chaymi Abrahamqa sayarispa Het runakunaman k'umuykukurqan, 8hinaspan paykunata nirqan: –Wañuqniyta p'ampaykapunayta munankichis chayqa, uyariykuwaychis, Zoharpa churin Efronta valeykapuwaychis, 9chakranpa k'uchunpi Macpela qaqa wasita qowananpaq. Chanin preciotan chaymanta qopusaq, ahinapin qankuna ukhupi aya p'ampanay kanqa, nispa. 10Efronqa Het runakunawan kuskan kasharqan, paymi Abrahamman kutichirqan, Het runakunaq uyarinanpaq, llaqta punkuta llapa haykuqkunaqpas uyarinanpaqwan: 11–Manan, wiraqocháy, uyariway, qosqaykin chakrata, qollasqaykitaqmi chaypi kaq qaqa wasitapas, llaqtamasiykunaq qayllanpi chayta qosqayki, wañuqniykita p'ampanaykipaq, nispa. 12Hinaqtinmi Abrahamqa Het runakunaq ñawpaqenpi k'umuykukurqan, 13hinan llapanku uyarinanpaq Efronman kutichirqan: –Uyariykullaway, qosqaykin chakraq precionta, chaskillaway, hinan wañuqniyta chaypi p'ampasaq, nispa. 14Efrontaq Abrahamman kutichirqan: 15–Wiraqocháy, uyariway. Hallp'aqa valen tawa pachak qolqen. ¿Manachu chanillan qanpaqpas ñoqapaqpas? P'ampakullay wañuqniykitaqa, nispa. 16Hinaqtinmi Abrahamqa Efronwan rimanakuspa, mañakusqanman hina qolqeta Efronman pesarqan, Het runakunaq uyarishasqan vendenakuy precio tawa pachak qolqeta. 17Ahinapin, Efronpa Mamre chimpa Macpelapi kaq chakranqa qaqa wasipas, lliw sach'akunapas, lliw qorpa muyuriqpi kaqkunapiwan, 18Abrahampa kaqnin kapurqan, Het runakunaq rikusqan, llaqta punkuta llapa haykuqkunaqpas rikusqan. 19Chay qhepatataq Abrahamqa warmin Sarata p'amparqan Mamre chimpa Macpelapi kaq qaqa wasipi, Canaán suyupi. 20Chakrapas chaypi kaq qaqa wasipas Abrahampan kapurqan, aya p'ampanapaq Het runakunamanta rantisqa.

will be added

X\