Esdras 5

1Profeta Hageowan Iddoq churin profeta Zacariaspiwanmi Judapi tiyaq Jerusalenpi tiyaq judío runakunaman Israelpa Diosnin Señorpa sutinpi willarqanku. 2Chaymi Salatielpa churin Zorobabelqa, Josadacpa churin Jesuapiwan wakmanta Jerusalenpi Diospa wasin llank'ayta qallarirqanku, Diospa profetankunapas llank'aysillarqantaq. 3Ichaqa Eufrates mayu inti haykuy lado hap'iypi kamachikuq Tatnai, Setar-boznai, llank'aq-masinkunapiwanmi kaqrato paykunaman rispa nirqanku: –¿Pin qankunata kamachirqasunkichis kay wasita sayarichispa tukunaykichispaq? 4¿Iman sutin kay sayarichiq runakunaq? nispa. 5Ichaqa Diosmi waqaycharqan judío umalli runakunata, chaymi kamachikuqkunaqa llank'ayta mana hark'arqankuchu, rey Darioman willaspanku paymanta cartata chaskinankukama. 6Rey Darioman qelqaqkunan kaykuna: Eufrates mayu inti haykuy lado hap'iypi kamachikuq Tatnai, Setar-boznai, chay hap'iypi kamachikuq-masinkunapiwan. 7Chay qelqasqanku cartan kay hina karqan: Reyniyku, tukuypin allillan kanaykita munayku. 8Kunanmi reyníy, willamuykiku, Judea hap'iytan rirqayku hatun Dios yupaychana wasita, hinaspan rikumurqayku hatun thupasqa rumikunawan Dios yupaychana wasita perqashaqta. Judío runakunan perqata kurkuwan chakashankuña, usqhayllan llank'ashanku, allintataqmi usachishankupas. 9Umalli runakunatataq tapurqayku: –¿Pin kamachirqasunkichis kay wasita sayarichispa tukunaykichispaq? nispa. 10Tapullarqaykutaq umalli runakunaq sutintapas qelqanaykupaq, hinaspa qanman willamunaykupaq. 11Hinan paykunaqa kutichiwarqanku: –Ñoqaykuqa Hanaq Pacha Kay Pacha Diospa kamachinkunan kayku, askha watakunañan Israelpa hatun reynin kay wasita sayarichispa tukuchisqa, chaytan wakmanta sayarichishayku. 12Ñawpa taytayku Hanaq Pacha Diosta phiñachiqtinmi, Babilonia suyu rey Caldea runa Nabucodonosorman hap'iykachirqan, chaymi reyqa kay wasita thunirqan, runakunatataq Babiloniaman presota aparqan. 13Chaywanpas Babilonia rey Ciroqa ñawpaq wata kamachikushaspan, huk kamachikuyta unancharqan Diospa wasin wakmanta sayarichisqa kananpaq. 14Nabucodonosormi Jerusalenpi Diospa wasinmanta qorimanta qolqemanta serviciokunata horqospa, Babiloniapi yupaychana wasiman churasqa. Chaykunatan rey Ciroqa horqochimurqan, hinaspan Sesbasar sutiyoq runaman hap'ichirqan. Paytan churarqan kamachikuq kananpaq. 15Rey Ciron Sesbasarta nirqan: –Kay serviciokunata Jerusalenpi kashaq yupaychana wasiman apay, hinaspa Diospa wasin ñawpaq kasqan cheqaspi wakmanta sayarichimuy, nispa. 16Chaymi Sesbasarqa Jerusalenman hamuspa Dios yupaychana wasi teqsita churaykurqan, chaymantapachan llank'ashayku ichaqa manaraqmi tukuykuraqchu, nispanku. 17Chhaynaqa, reyniyku, munawaqtaq chayqa, kamachiy reypa qelqa k'uyu waqaychanan wasita maskhanankupaq cheqaqpunichus rey Ciro, Dios yupaychana wasita Jerusalenpi sayarichinankupaq kamachisqa chayta yachanaykipaq, chaymantataq imachus yuyaykusqaykita willamuwayku, nispa.

will be added

X\