Esdras 4

1Kamachi kasqankumanta kutimpuqkuna Israelpa Diosnin Señor yupaychana wasita sayarichishaqtinkun, Judá aylluq Benjamín aylluq awqankuna uyarirqanku. 2Chaymi Zorobabelman ayllu umalli runakunamanwan rispa nirqanku: –Asiria suyu rey Esar-hadonpa kayman apamuwasqanku p'unchaymantapachan ñoqaykuqa Diosninchista yupaychashayku, paymanmi sacrificiotapas haywashayku, chayrayku, wasi sayarichiypi yanapayta munaykiku, nispa. 3Hinan Zorobabel, Jesúa, Israel ayllu umalli runakunapiwan kutichirqanku: –Qankunaqa manan Diosniykuq wasinta sayarichiypi yanapawankikumanchu, aswanpas ñoqaykukamallan Israelpa Diosnin Señor yupaychana wasitaqa sayarichisaqku, Persia suyu rey Ciroq niwasqankuman hina, nispa. 4Chaymi muyuriqninkupi tiyaq runakunaqa Judá runakunata manchachispa iskayyachirqan mana llank'anankupaq. 5Reypa wakin yuyaychaqninkunamantaq qolqeta lluk'iykurqanku Dios yupaychana wasi sayarichiy yuyaykusqankuta qolluchinanpaq. Ahinapin chay llank'anata qolluchirqanku rey Ciroq kamachikusqan tiempopi rey Darioq kamachikunan tiempokama. 6Rey Asuero kamachikuyta qallarishaqtintaq chay awqa runakunaqa Judapi tiyaq Jerusalenpi tiyaq runakunata huchachaspa qelqarqanku. 7Hinallataq rey Artajerjespas Persiapi kamachikushaqtinña, Bislam, Mitridates, Tabeel, wakin llank'aq-masinkunapiwan Artajerjesman arameo rimaypi qelqamurqanku. 8Kamachikuq Rehummi qelqaq Simsaipiwan huk cartata Jerusalén contra Artajerjesman qelqallarqankutaq. Chay qelqaqkunataq kaykuna: 9Kamachikuq Rehum, qelqaq Simsai, llank'aqmasin juezkuna, Erec llaqtayoq, Babilonia llaqtayoq, Elampi Susa llaqtayoq llapan oficialkuna, 10Eufrates mayu inti haykuy lado hap'iypi wakin tiyaqkunapiwan. Paykunatan ancha hatun yupa mentasqa rey Asnaparqa llaqtankumanta apamuspa, Samaria llaqtakunapi Eufrates mayu inti haykuy lado hap'iy wakin llaqtakunapipas tiyachisqa. 11Kay hinan karqan apachisqanku qelqaqa: Rey Artajerjes, Eufrates mayu inti haykuy lado hap'iypi kamachiykikunan napaykamuykiku. 12Reyniyku, kaytan willamuykiku: Babilonia suyumanta hamuq judío runakunan Jerusalenman chayamuspanku, chay mana allin mana kasukuq llaqtata wakmanta sayarichishanku. Teqsitan allichankuña, perqaytapas qallarillankutaqmi. 13Reyniyku, yachanaykin, kay llaqta wakmanta hatarinqa muyuriq perqanpas sayarillanqataq chayqa, manan impuestota imamantapas paganqakuchu, chaskinayki qolqepas pisiyapunqan. 14Kamachiykipitaq kashayku chayqa, manan pisichasqa kanaykita munaykuchu, chaymi willamuykiku, 15ñawpa taytaykikunaq willakuynin qelqakunata t'aqwichinaykipaq. Chaypin tarinki kay llaqtaqa sinchi mana kasukuq kasqanta, reykunapaqpas huk hap'iykunapaqpas mana chanin kasqanta, ñawpaqmantapacha rey contra hatariq kasqantawan, chayraykun thunisqapas karqan. 16Reyniyku, chay llaqtachus wakmanta sayarinqa, muyuriq perqapas perqasqa kanqa chayqa, Eufrates mayu inti haykuy lado hap'iyqa manan kamachisqaykiñachu kanqa, nispa. 17Rey Artajerjestaq kutichirqan: Kamachikuq Rehumta, qelqaq Simsaita, Samaria llaqtapi tiyaq Eufrates mayu inti haykuy lado wakin llaqtakunapi tiyaq llank'aq-masiykichiskunatawanmi napaykamuykichis. 18Apachimuwasqaykichis cartataqa sut'ita t'ikrachispan leechirqani. 19Chaymi kamachirqani willakuy qelqata t'aqwinankupaq. Hinan tarinku chay llaqtaqa ñawpaqmantapacha mana chanin, mana kasukuq llaqta kasqanta, reykuna contra sayariq kasqantawan. 20Jerusalenpipas atiyniyoq reykunan kasqa, llapan chay Eufrates mayu inti haykuy lado hap'iyta kamachisqaku, chay reykunamanmi tukuy imamanta impuestota pagasqaku. 21Chay hinaqa, chay runakunata kamachiy ama llank'anankupaq, chay llaqtatapas ama wakmanta sayarichinankupaq ñoqaq kamachinaykama. 22Allintapuni chay runakunataqa qhawaychis, paqtan ñoqapaq mana allinkuna astawan yapakunman, nispa. 23Chay cartata Rehumpa, qelqaq Simsaipa, llank'aq-masinkunaq ñawpaqenpi leekuqtinmi, kaqrato Jerusalenpi judío runakunaman phawaspanku llank'asqankuta ancha kallpawan qolluchirqanku. 24Chaymi Jerusalenpi Dios yupaychana wasi llank'ayqa qollupurqan, qhepapurqantaq Persia suyu rey Darioq kamachikusqan iskaykaq watakama.

will be added

X\