1 Chayamusqanku qanchiskaq killa qallariytataq Israel runakunaqa llaqtankupi allinta tiyaykuspaña, llapan runakuna huk-nisqalla Jerusalenpi huñukurqanku. 2 Hinan Josadacpa churin Jesúa, sacerdote-masinkunapiwan, Salatielpa churin Zorobabelpas, wawqenkunapiwan llank'ayta qallarirqanku Israelpa Diosninpa altarninta sayarichinankupaq, ruphachina sacrificiota haywanankupaqwan, Dios sonqo runa Moisespa kamachikuynin qelqaman hina. 3 Chay suyupi tiyaq runakunataña manchakurqanku chaypas, ñawpaq kasqan cheqaspipunin altarta sayarichirqanku, chaypitaqmi ruphachina sacrificiota Señor Diosman haywarqanku tutamantapas tardenpas. 4 Chaymantataq Ch'uklla Ruway Fiestata ruwarqanku qelqasqa kasqanman hina, sapa p'unchaymi ruphachina sacrificiota haywarqanku hayk'atachus chay fiesta p'unchaypi haywanankuman hina. 5 Chay qhepatan sapa p'unchay ruphachina sacrificiokunatapas haywarqanku, Mosoq Killa Fiesta sacrificiokunatapas, Señor Diospaq unanchasqa wakin fiestakunapi sacrificiokunatapas, Señor Diosman tukuy sonqo ofrendakunatapas. 6 Ahinapin qanchiskaq killa qallariy p'unchaymantapacha ruphachina sacrificiokunata Señor Diosman haywarqanku, hinaña paypa wasi teqsin manaraq churasqachu kasharqan chaypas. 7 Chay qhepatan wasi perqaqkunaman k'ullu llaqllaqkunamanwan qolqeta qorqanku. Hinallataq Sidón llaqta Tiro llaqta runakunamanpas mikhunata, ukyanata, aceitetawan apachirqanku, cedro kurkukunata Libanomanta lamar-qochanta Jope llaqtakama apamunankupaq, Persia suyu rey Ciroq unanchasqanman hina. 8 Hinan Jerusalenpi Diospa wasinman kutimpusqanku qhepakaq wata iskaykaq killapi Zorobabel, Jesúa, llaqtamasinkuna, sacerdotekuna, Leví runakuna, kamachi-kaymanta Jerusalenman llapallan kutimpuqkunapiwan llank'ayta qallarirqanku. Leví runakunatataq iskay chunka watayoqmanta wichayman Diospa wasin llank'aqkunata kamachiqpaq churarqanku. 9 Chaymi Jesuapas churinkunantin wawqenkunantin, Hodaviaspa ayllunmanta Cadmielpas churinkunantin, Henadadpa ayllunmanta Leví runakunapas huk-nisqalla huñukurqanku Señor Dios yupaychana wasipi llank'aqkunata kamachinankupaq. 10 Wasi perqaqkuna Señor Dios yupaychana wasi teqsita churaqtinkutaq, sacerdotekunaqa sacerdote p'achawan p'achasqa trompetantin asuykurqanku, hinallataq Asafpa miraynin Leví runakunapas platillontin Señor Diosta yupaychanankupaq kasharqanku, Israelpa reynin Davidpa kamachikusqanman hina. 11 Hinaspan Señor Diosman graciasta qospanku takirqanku: Señor Diosqa sumaqmi, mana tukukuqmi Israel runakunapaq munakuyninqa, nispa. Llapa runan ancha kusisqa qaparispa Señor Diosta hatuncharqanku, paypa wasin teqsita churasqankumanta. 12 Yuyaqña kashaq askha sacerdotekuna, Leví runakuna, ayllu umalli runakunapiwanmi kunkayoqta waqarqanku teqsi churaqta rikuspa, paykuna ñawpaq yupaychana wasita rikusqankurayku. Hukkunañataq kusikuymanta qaparirqanku. 13 Runakunan sinchita qaparirqanku, chaymi mana pipas repararqanchu kusikuymanta qaparisqankutapas waqasqankutapas, qaparisqankutaq karumanraq uyarikurqan.
