Ezequiel 9

1Chaymantapas uyarillarqanitaqmi kunkayoq waqyakuqta: ¡Ñan chayamunkuña llaqtata muchuchiqkuna, sapankataq makinpi thuninanpaq q'asunayoqkama! nispa. 2Hinan rikurqani hawakaq patioq wichay qhawaq punkunta soqta runa haykumushaqta, q'asuna hap'intintakama. Chawpinkupitaq hamushasqa linomanta yuraq qoysu p'achayoq runa, cinturanpitaq apamusqa qelqanakunata. Haykuspataq sayaykurqanku bronce altarpa qayllanpi. 3Hinan Israelpa Diosninqa lliphipispa hatarirqan querubinkunaq patanpi kasqanmanta, hinaspan yupaychana wasi haykunaman rirqan. Payqa cinturanpi qelqanayoq linomanta yuraq qoysu p'achayoq runata waqyarispan 4nirqan: Jerusalén llaqtata puriykacharqamuy, hinaspataq mat'inpi marcamunki llapan millay qhelli mana chanin ruwasqakunamanta llakikuspa khuyay kaqkunata, nispa. 5Chaymantapas uyarillarqanitaq wakin runakunata nisqanta: Llaqta ukhunta riychis chay runaq qhepanta, wañuchimuychis ama khuyapayaykuspa. 6Ñoqa yupaychana wasimanta qallarispataq wañuchimuychis llapan kurak runakunata, waynakunata, sipaskunata, wawakunata, warmikunatapas mana ch'ullapas puchunankama. Ichaqa aman llamiykunkichischu marcayoq runakunataqa, nispa. Hinan paykunaqa wañuchiyta qallarirqanku Dios yupaychana wasiq ñawpaqenpi kaq kurak runakunata. 7Chaymantapas nillarqantaq: ¡Riychis! Yupaychana wasita qhellichamuychis, runa wañusqa ayakunawan pationta hunt'aykachiychis, nispa. Chaymi paykunaqa lloqsispa llaqtantinpi runa wañurachiyta qallarirqanku. 8Chayta paykuna ruwashaqtintaq, ñoqaqa sapallay kasharqani. Hinaspan pampakama k'umuykukuspa llakisqa waqyakurqani: ¡Ay, Apu Señor Diosníy! ¿Phiñakuyniykita Jerusalenman kachaykamuspachu Israelpi puchuq pisi runakunatapas tukupunki? nispa. 9Señor Diostaq kutichimuwarqan: Israel suyu runakunan Judá suyu runakunapiwan sinchitapuni huchallikunku, suyunkun wañuchinakuywan hunt'a kashan, llaqtataqmi mana chanin ruwaywan hunt'a kashan. Paykunataqmi ninku: Señor Diosqa wikch'upunmi suyunchista. ¡Payqa manan rikuwanchischu! nispa. 10Chayraykun manapuni khuyapayasaqchu, manapuni llakipayasaqchu, aswanmi tukuy imaymana ruwasqankumanta cuentata mañaspa muchuchisaq, nispa. 11Chaymantataq linomanta yuraq qoysu p'achayoq runaqa cinturanpi qelqanayoq kutirimuspa nirqan: Kamachiwasqayki ruwaytaqa tukuniñan, nispa.

will be added

X\