Ezequiel 8

1Kamachi-kaypaq apasqa kasqaykumanta soqta wataq soqta killanpa phisqa p'unchayninpin wasiypi tiyakusharqani Judá suyu kurak runakunapiwan, hinaspan qonqaylla Apu Señor Diosqa llamiykuwarqan. 2Rikurqanitaq rawrashaq runata hina. Cinturanmanta uranmanmi rikch'akusqa nina hina, chaymanta wichayninmantaq allin llusk'achasqa bronce hina k'anchasqa. 3Chay runataq makiman rikch'akuqta haywarimuwaspa chukchaymanta hap'irqowarqan. Hinan Diospa Espiritunqa wayrapi hoqarirqowarqan, Diospa rikhuriypi rikhuriwasqanpin Jerusalenman apawarqan, hinaspan churaykuwarqan yupaychana wasiq ukhukaq pationpa wichay qhawaq punkunman, Señor Diosta phiñachiq idolonkuq kasqanman. 4Chaypin Israelpa Diosninpa lliphlli-kaynin kashasqa pampapi rikusqay hinallataq. 5Niwarqantaq: Qan, runaq churin, wichay ladota qhawariy, nispa. Ñoqataq wichay ladota qhawarirqani, hinaspan rikurqani punku haykuna altar qayllapi Señor Diosta phiñachiq idolota. 6Nillawarqantaqmi: Qan, runaq churin, ¿rikunkichu Israel runakunaq millay p'enqayta kaypi ruwashasqankuta? Chay ruwasqankuwanmi wasiymantapas aswan-aswanta karunchachiwanku. Kunanpas rikullankitaqmi aswan millaykunataraq, nispa. 7Chaymantataq apawarqan patio haykuna punkuman, perqapitaq kasqa huk t'oqo. 8Hinan niwarqan: Qan, runaq churin, t'oqota hatunyachiy, nispa. Ñoqataq t'oqota hatunyachispa haykunata tarirqani. 9Nillawarqantaq: Haykuy, hinaspan chaypi rikumunki mana chanin millay ruwasqankuta, nispa. 10Haykuspa qhawariqtiytaq, llapan perqakunapi kashasqa k'iñaspa ruwasqa imaymana rikch'aq suchuq animalkuna, wak millay qhelli animalkuna, Israel llaqtaq millay idolonkunapiwan. 11Israel suyuq qanchis chunka kurak runankunan chaykunaq ñawpaqenpi sayashasqaku, paykunawanmi kashallasqataq Safanpa churin Jaazaniaspas. Sapankataq incienso q'apachina hap'intinkama, chaymantataq sankhu q'osñiraq sayarisqa. 12Hinan niwarqan: Qan, runaq churin, ¿rikunkichu Israel taytakunaq pakallapi idolonkuq wasichanpikama ruwashasqankuta? Paykunaqa ninkun: ¡Manan Señor Diosqa rikuwanchischu! ¡Suyunchistapas wikch'upunmi! nispanku. 13Chaymantapas nillawarqantaq: Aswan millay ruwashaqkunataraqmi rikunki, nispa. 14Apallawarqantaq Señor Diospa wasin wichay lado punku haykunaman. Chaypin warmikuna tiyarayashasqa Tamuz diosta waqapayaspanku. 15Nillawarqantaq: Qan, runaq churin, ¿rikushankichu kayta? Chaymantapas aswan millaytaraqmi rikullankitaq, nispa. 16Chaymantan apallawarqantaq Señor Diospa wasinpa ukhu pationman, yupaychana wasiman haykuna punkuwan altarpiwan tupaypin kashasqa iskay chunka phisqayoq Israel qharikuna, yupaychana wasita qheparparispanku. Inti haykuy ladoman qhawantinkama pampaman k'umuykukuspa intita yupaychashasqaku. 17Hinan Señor Diosqa niwarqan: Runaq churin, ¿rikunkichu kay ruwasqankuta? ¡Judá llaqta runakunaqa manan amikunkuchu kay hina p'enqay huchakunata ruwaspankupas! Chaymantapas awqanakuywanmi suyuntinta hunt'aykachishanku, kuti-kutirispan phiñachiwanku. Chaymi millay asnachisqanku senqayman chayamun. 18Chayraykun paykunata phiñakuspa muchuchisaq, manapunin khuyapayaykusaqpaschu. Qaparikuspaña waqyakamuwaqtinkupas, manapunin uyariqpas tukusaqchu, nispa.

will be added

X\