Ezequiel 7

1Señor Diosmi niwarqan: 2Qan, runaq churin, uyariway. Ñoqa Señor Diosmi Israel suyuta nini: ¡P'uchukaymi chayamunqaña! ¡Ñan teqsimuyuntinpaq p'uchukay kanqaña! 3Israel, qanpapas p'uchukayniykiqa chayamunqañan, qan patamanmi phiñakuyniyta chayachisaq. Imaynachus kasqaykiman hinan huchachasqayki, hinaspataqmi p'enqay ruwasqaykikunamanta muchuchisqayki. 4Manan khuyapayasqaykichu, manan llakipayasqaykichu, imaynachus kasqaykimanta p'enqay ruwasqaykikunamantawanqa muchuchisqaykipunin. Chaypin yachankichis ñoqa Señor Diosqa kasqayta. 5Apu Señor Diosmi nin: ¡Ñan hatun llakikuy p'unchay chayarqamushanña! 6¡Hatun llakipas qati-qatiraqmi chayarqamushan! ¡Chayarqamunñan p'uchukayniyki! ¡Chayarqamunñan tukukunayki! 7Suyupi tiyaqkuna, chayamunñan thunikunaykichis. Kunallanmi chayarqamunqa, chayarqamushallantaqmi taripay p'unchay. Orqokunapipas manañan kusikuy kanchu, aswanpas q'aqchakuyllañan. 8Kunanpachan qan contra phiñakusaq amikunaykamaraq. Lliwtan watusqayki ima ruwasqaykimantapas, hinaspan muchuchisqayki p'enqay ruwasqaykikunamanta. 9Manapunin khuyapayasqaykichu, manapunin llakipayasqaykichu, aswanmi lliwmanta cuentata mañasqayki, millay p'enqay ruwasqaykimantataq muchuchisqayki. Hinan qankuna yachankichis ñoqa Señor Diosqa ñak'arichiq kasqayta. 10¡Kayqa chay p'unchay! ¡Chayamunpacha! ¡Hamushanñan thunikuyniyki! Millay runakunan llanllarishan, anchaykachaymi t'ikarishan. 11Millay ruwaykunan wiñarispa mana chaninkunata paqarichin. Chaywanpas paykunaqqa manan imanpas qhepanqachu, qhapaq kayninkupas, imaymanayoq kayninkupas, allichachaq-kayninkupas. 12¡Chayamunmi kunanqa chay p'unchay! Manan qhatuqpas imamantapas llakikunan kanchu, manallataqmi rantiqpas imamantapas kusikunan kanchu, llapankumanpunin phiñakuyniytaqa chayachisaq. 13Qhatuqqa manapuniñan qhatusqanta wakmanta tarinmanñachu, unaytaña kawsaspapas. Millay runaqa huchan hawan kawsayninta mana waqaychayta atinmanchu. 14Awqa-tinkuy trompetan waqamun, llapataqmi wakichikunku, ichaqa manan pillapas maqanakuqqa lloqsinchu, llapanmanpunin phiñakuyniytaqa chayachisaq. 15Hawapin maqanakuy kashan, ukhupitaqmi onqoywan yarqaywan kashan. Campopi kaqkunan hatun maqanakuypi wañunqaku, llaqta ukhupi kaqkunataqmi onqoypi yarqaypiwan wañunqaku. 16Chaymanta orqokunaman llapan ayqekuqkunataq sapankanku huchankumanta waqanqaku qheswa wayq'omanta mancharichisqa urpikuna hina. 17Lliwpa makinmi sayk'upunqa, moqonkupas mancharikuymantan tiwlikinqa. 18Llakikuymantan qhasqa p'achawan churakunqaku, lliw ukhunkun chhaphchikunqa, hinallataq p'enqasqa uyantin chukchankupas ruturqosqa rinqaku. 19Qolqenkutapas qorinkutapas callekunamanmi q'opata hina wikch'upunqaku, manan qorinkupas qolqenkupas qespichinqachu Señor Diospa phiñakuyniy p'unchaypiqa. Qori-qolqeqa manapunin yarqaytapas thanichinmanchu, manallataq wiksamanpas hunt'aykunmanchu, aswanmi huchaman tanqaykurqan. 20Sumaq k'anchaq alhajankuwanmi umata hoqarirqanku, chaykunawantaqmi millakuy diosninkuta ruwakurqanku. Chayraykun alhajankuta tukuchisaq paykunaq millakunanman. 21Wak llaqta runakunatan chayarqachimusaq suwarqonanpaq, kay pachantinpi cheqnisqa runakunan hamunqaku paykunamanta qechunanpaq, hinaspan qhapaq kayninkuta millakuyman tukuchinqa. 22Ñoqataqmi kay llaqtamanta hataripusaq. Hamunqataqmi suwakuna, ñoqa yupaychana munasqay wasiman haykuspan millakuyman tukuchinqaku. 23Suyuntinpin wañuchinakuy kashan, llaqtantinpitaq awqanakuy kashan, chayrayku fierro cadenata ruway. 24Ñoqan pusamusaq kay pachantinpi cheqnisqa runakunata, paykunan kay llaqtaq wasinkunata hap'ikapunqa. Atiyniyoqkunaq uma hoqariynintaqa chinkachipusaqmi, wak'a diosninku yupaychana cheqaskunapas lliwmi qhellichasqa kanqa. 25Manchay llakikuy p'unchay chayamuqtinmi, thak-kayta munanqaku, manataq tarinqakuchu. 26Chayamunqan llakikunapas qati-qatiraq, mana allin willaykunapas yapa-yaparaq. Yanqanpaqmi huk profetata maskhanqaku paykunaman rikhuriypi rikusqanta willaykunanpaq, manan kanqachu sacerdotepas paykunaman Diospa kamachikuyninta yachachinanpaq, manallataq kurak runakunapas yuyaychaykunanpaq kanqachu. 27Reymi yana p'achawan lutokunqa, kamachikuqmi khuyay llakisqa kanqa, llaqtataqmi khatatatanqa. Ruwasqankuman hinan muchuchisaq, imaynatachus hukkunata juzgarqanku chay hinatan paykunatapas juzgasaq. Ahinapin yachanqaku ñoqa Señor Diosqa kasqayta, nispa.

will be added

X\