Ezequiel 6

1Señor Diosmi niwarqan: 2Qan, runaq churin, Israel orqokunata qhawarispa contrankupi sutiypi niy: 3Israel orqokuna, moqokuna, wayq'okuna, Apu Señor Diospa nisqanta uyariychis. Paymi nin: Qankuna pataman hatun maqanakuyta chayachimunaypaqñan kashani, hinaspan wak'a dioskuna yupaychanaykichis cheqaskunata thunisaq. 4Ñut'utapunin ruwasaq incienso q'apachina altarniykichiskunata, sacrificio haywana altarniykichiskunatapas, hinallataq runaykikunata wak'a diosninkuq qayllanpi wañurachisaq. 5Israel runakunaq ayantan wikch'usaq idolonkuq qayllanman, tullunkunatapas wikch'urparisaq altarkunaq muyuriqninman. 6Israel runakunaq hinantin tiyasqanku llaqtakunapas thunisqan kanqa, wak'a diosninku yupaychana cheqaskunapas raqay-raqaymi purunyapunqa. Altarninkupas pasaq thunisqan kanqa, wak'a diosninkupas ñut'urqarisqan kanqa, incienso q'apachinanku altarpas kumpasqan kanqa, paykunaq llapan ruwasqankuqa pasaqtan thunikunqa chinkapunqataq. 7Qankuna ukhupi askha runakuna wañuqtinmi ñoqaqa Señor Diospuni kasqayta yachankichis. 8Hinantin suyukunaman ch'eqechisqaypin wakinniykichis wañuymanta puchunqa, 9kamachi-kaypitaq kawsanqaku. Chay suyukunapi kawsashaq puchuqkunataqmi ñoqata yuyariwanqaku, yuyarillawanqakutaqmi imaynachus wasanchay huchankumanta llakikusqayta, paykunaqa ñoqamantan t'aqarikurqanku wak'a diosninku yupaychanankupaq. Paykuna kikinkun millakunqaku llapan mana allin ruwasqankumanta, millay p'enqaykuna ruwasqankumantawan. 10Hinaspan reqsiwanqaku ñoqapuni Señor Diosqa kasqayta, hinallataq hatun llakikunawan manchachisqayqa mana yanqachu kasqantapas, nispa. 11Apu Señor Diosmi nin: Israel runakunan wañunqaku awqa-tinkuy maqanakuypi, yarqaypi, onqoypiwan. Chayrayku, qaparkachay t'aqllapakuspa hayt'apakuspa ima. Israelpa p'enqay mana chaninkuna ruwasqankumantawan nanaywan qaparkachay. 12Karupi kaqkunan onqoywan wañunqaku, qayllapi kaqkunataqmi awqa-tinkuy maqanakuypi wañunqaku, puchuqkunañataqmi yarqaymanta wañuranqaku. Ahinapin paykunata muchuchispa phiñakuyniyta thasnukusaq. 13Ayakunatataq rikunqaku chuta-chutata wak'a diospa muyuriqninpi, altarkunaq muyuriqninpi, suni orqo patakunapi, orqo ñawch'i patakunapi, q'omer mallki chakikunapi, rakhu encina mallki chakikunapipas, chaykunapin idolonkuta inciesowan q'apachirqanku. Chaykuna sucedeqtinmi yachankichis ñoqallapuni Señor Diosqa kasqayta. 14Makiytan haywarisaq muchuchinaypaq uray ladopi ch'inneqmanta, wichay ladopi Ribla llaqtakamaraq, suyuntan llapa llaqtakunatawan musphana mancharikuy purunman tukuchisaq. Chay hinapin ñoqa Señor Dios kasqayta reqsiwanqaku, nispa.

will be added

X\