Ezequiel 5

1Señor Diosqa nillawarqantaqmi: Qan, runaq churin, kunan hap'iy huk espadata allin filollataña, sunkha k'isunata hina, chaywantaq rutukuy chukchaykita sunkhaykitawan. Balanzapi pesaspataq kinsaman t'aqanki, chukchaykita sunkhaykitawan. 2Llaqtaq awqankuna muyuykuyta tukuqtinkutaq, llaqtaq chawpinpi chay chukchaykiq kinsaman t'aqasqaq huk t'aqanta kanaykunki. Chaymantataq espadata hap'ispa, wakin t'aqanta ñut'urqospa llaqtaq muyuriqninman wisñimunki, puchuqnintataq wayrawan aparparichinki. Ñoqataqmi paykunaq qhepanta risaq espadantin. 3Wakin chukchakunatataq hoqarispa p'achaykiq ch'ullpanman watarqonki. 4Chay watasqa kaqmanta huk pisita hoqarispataq ninaman wikch'uykunki ruphananpaq. Chaymantan nina lloqsimunqa llapan Israel llaqtata ruphananpaq. 5Apu Señor Diosmi nin: Kayqa Jerusalenmi kashan, ñoqan kay pachaq chawpinman churarqani, chaymi llapa suyukunaq llaqtakunaqpas muyuykusqan kashan. 6Jerusalenmi ichaqa kamachikuyniyta unanchayniytawan manapuni munarqanchu, hinaspan payqa muyuriqninpi llaqtakunamanta suyukunamantapas aswan mana chaninraq kapun. Kamachikuyniytan manapuni munarqanchu, unanchayniytapas manan kasurqanchu. 7Chayraykun Apu Señor Diosqa nin: Kamachikuyniyta mana kasukuspan qankunaqa aswan millaypuni kankichis, muyuriqniykichispi llaqtakunamantapas. Manapunin kasukurqankichischu muyuriqniykichispi tiyaq llaqtakunaq kamachikuy siminkunallatapas. 8Chayraykun Jerusalén, Apu Señor Diosqa qan contra kashan. Hinallataq llapan suyukuna rikushaqtin pay kikin qanta muchuchisunki. 9Manataq hayk'aqpas chay hinataqa ruwarqanchu, manañataq ruwanqapaschu, millay mana chanin ruwasqaykirayku. 10Qankuna ukhupiqa kanqan wawan mikhuq taytakuna, taytankuta mikhuq wawakunapas. Ñoqa kikiymi muchuchisqayki, wakin kawsaqkunatataq wayrawan hina llapa ladoman ch'eqechisaq. 11Ñoqa Apu Señor Diosmi cheqaqtapuni jurani, imaynan qankunapas millay mana chanin ruwayniykichiswan ch'uya wasiyta qhellicharqankichis, chay hinatan qankunatapas mana khuyapayaykuspa chhallusqaykichis, manapunin llakipayasqaykichischu. 12Huk kinsakaq t'aqa runakunan chawpiykipi wañunqaku onqoywan yarqaymantawan, huk kinsakaq t'aqañataq wañunqaku muyuriqninpi awqanpa wañurachisqan, wakin kinsakaq t'aqatañataq wayrawan hina hinantinman aparparichisaq, hinan qhepanta risaq espada hap'intin. 13Chaymantataq sonqoy tiyaykuqtin phiñakuyniy thasnukuqtin, thak kapusaq, manañataq imanasqaykichispaschu. Chaykuna qhepatan yachankichis ñoqa Señor Diosqa qankunamanta anchata sientespa phiñakusqayta. 14Jerusalén, ñoqan qanta purunyachisqayki, hinan llapan muyuriqniykipi kaq llaqtakunapas llapan qayllaykita puriqkunapas pisichasunkiku. 15Ñoqa qan contra k'araktapuni phiñakuspa pasaqta muchuchiqtiymi, muyuriqniykipi suyukuna k'amisunkiku, millayta nisunkiku, hinallataq qanta rikuspa sinchita mancharikunqaku, hinaspa wanapunqaku. Ñoqa Señor Diosmi chayta nini. 16Ñoqan kachamusqaykichis manchay yarqayta, wañuchiq wach'ita hinaraq. Aswan-aswantan yarqay q'oñirinqa, hinan mikhunaykichista qechupusqaykichis. 17Kachamullasaqtaqmi yarqayta salqa animalkunatapas wawaykichista mikhunanpaq, hinallataq kachamusaq onqoyta, maqanakuyta, wañuytawan qankunata wañurachinaypaq. Ñoqa Señor Diosmi chayta nini, nispa.

will be added

X\