Ezequiel 45

1Sapanka aylluman tupaqnin hallp'ata phasmipunaykichispaqmi sorteankichis, Señor Diospaqtaqmi hallp'ata t'aqankichis, wask'anman chunka iskayniyoq kuskannin kilometrota, anchonmantaq chunka kilometrota hina. Chay t'aqasqa hallp'aqa ch'uyapunin kanqa. 2Chay t'aqasqa hallp'a chawpipitaqmi Dios yupaychana wasipaq huk cheqas kanqa iskay pachak phisqa chunka metro tawantin ladoman. Chay cheqastataq muyurinqa iskay chunka phisqayoq metro anchoyoq yanqa pampa. 3Señor Diospaq t'aqasqa hallp'apin qankunaqa tupunkichis wask'anman chunka iskayniyoq kuskannin kilometrota, anchonmantaq phisqa kilometrota, chay tupusqaykichis hallp'apin kanqa Dios yupaychana Ch'uyay-ch'uya Cheqas. 4Hinallataq tupusqaykichis hallp'aqa suyuntinmanta aswan ch'uya kanqa, Dios yupaychana wasipi Señor Diosta serviq sacerdotekunaman qonapaq kanqa, chaypin wasinkupas kanqa. Kallanqataqmi Dios yupaychana wasipaq Ch'uya Cheqas. 5Tupusqaykichis hallp'a ladopin kanqa huk hallp'a wask'anman chunka iskayniyoq kuskannin kilómetro, anchonmantaq phisqa kilómetro. Chay hallp'an kanqa Dios yupaychana wasipi llank'aq Leví ayllu runakunapaq, chaypin kanqa tiyananku llaqtakuna. 6Tupusqaykichis hallp'aq huk ladonpipas kallanqataqmi huk hallp'a wask'anman chunka iskayniyoq kuskannin kilómetro, anchonmantaq iskay kilómetro kuskannin. Chaypitaqmi kanqa Israel runakunaq tiyanan llaqta. 7Suyupiqa kallanqataqmi kamachikuqpaq qosqa hallp'apas. Huk t'aqan kanqa Diospaq t'aqasqa hallp'amanta suyuq inti lloqsimuy lado qorpankama, hukkaq t'aqañataq Diospaq t'aqasqa hallp'amantaqa inti haykuy lado lamar-qocha patakama. Wichay lado qorpanpas uray lado qorpanpas chaypi tiyaq ayllukunaq qorpanwanmi kanqa. 8Chay hallp'aqa Israel llaqtapi kamachikuqpaqmi kanqa, chay hinapin kamachikuqkunaqa llaqtayta mana k'utupayanqachu, aswanmi hinallata qhawanqa Israel suyuntinpi wakin hallp'akuna ayllunkunaqllapuni kananpaq, nispa. 9Apu Señor Diosmi nin: ¡Israel kamachiqkuna chaykamalla kachun! Amaña millay loqhe sonqochu kaychis, amañataq sarunchaychischu, aswanpas cheqaqkaqta chaninkaqtawan ruwaychis. Amaña llaqtaypa hallp'anta qechuychischu. Ñoqa Apu Señor Diosmi chayta nini. 10Llapaykichispa kachun chanin arroba, chanin balanza, chanin tupunapiwan. 11Rurukuna pesanapaq kasqallantaqmi kanqa vinota, aceiteta tupunapaqpas. Llapanmanta hatunmi kanqa, iskay pachak iskay chunka litroq haykunan otaq huk fanega. Vinopas aceitepas tupunapaqmi iskay chunka iskayniyoq litro kanqa, rurukuna pesanapaqtaq huk arroba kanqa. 12Gera nisqa pesanan gramoq kuskannin, siclo nisqa pesanataqmi iskay chunka gera, mina nisqa pesanañataq soqta chunka siclo. 13Cosechankumanta qokuy apamunanku trigomantapas cebadamantapas sapa fanegamanta huk arrobaq soqta p'akinta, 14aceitemantapas apamunanku iskay litro kuraktan. Aceiteqa bato nisqawanmi tupukun, chunka bato aceiteqa iskay pachaq iskay chunka litron, chayqa huk homermi. 15Israel suyuq allin q'achunpi mikhuq ovejakunamanta sapa iskay pachak ovejamanta hukta hap'inqaku. Llapan chay t'aqasqakuna apamusqankun kanqa ruru ofrendakunapaq, ruphachina sacrificiokunapaq, sumaq kawsay ofrendakunapaq, llaqtaq huchan pampachasqa kananpaq. Ñoqa Apu Señor Diosmi chayta nini. 16Suyuntinpi llapan runakunan Israelpi kamachikuqman chaykunata apamunqaku. 17Chay kamachikuqpa ruwanantaqmi kanqa ruphachina sacrificiokunata qoy, ruru ofrendakunata qoy, hich'aykunapaq vino ofrendakunatawan qoy, Mosoq Killa Fiestakunapi, samana p'unchaykunapi, Israel llaqtapi Diospa llapan unanchasqan fiestakunapiwan. Hinallataq qonqa hucha pampachay ofrendatapas, ruru ofrendatapas, ruphachina sacrificiotapas, sumaq kawsay ofrendatapas, Israel llaqtaq huchan pampachasqa kananpaq, nispa. 18Apu Señor Diosmi nillantaq: Wata qallariy p'unchaymi mana imanasqa torillota haywawankichis, Dios yupaychana wasita ch'uyanchanapaq. 19Sacerdoten hucha pampachaypaq nak'asqa uywaq yawarninta huk pisita aparikuspa llusiykamunqa Dios yupaychana wasi punkupi sayaq k'aspikunata, altarpa tawantin esquinanta, ukhu patioman haykunapi k'aspikunatapas. 20Kaqllatataq ruwankichis chay killaq qanchiskaq p'unchayninpipas mana piqpa willaykusqan mana yuyaypi huchallikusqa huchamanta pampachaypaq. Chay hinapin Dios yupaychana wasita ch'uyanchanqaku. 21Chay killaq chunka tawayoq p'unchayninpitaq qankunapas ruwankichis Pascua Fiestata, qanchis p'unchaynintinmi mana qonchuyoq t'antata mikhunkichis. 22Chay p'unchaymi llaqta kamachikuq qonqa huk torillota pay kikinpa huchanmanta, llapan runaq huchanmantawan. 23Qanchisnintin fiesta p'unchaykunapitaqmi qonqa mana imanasqa allinnin qanchis torillota, qanchis borregotawan Señor Diosman ruphachispa sacrificiota haywanapaq, chaymantapas sapa p'unchaymi huk orqo cabrata qollanqataq hucha pampachasqa kananpaq. 24Chay sapanka torillotawan, sapanka borregotawanmi qollanqataq ruru ofrendata huk arroba ruruta, kinsa litro kuskannin aceitetawan. 25Ch'uklla Ruwana Fiestan qallarinqa qanchiskaq killaq chunka phisqayoq p'unchayninpi, kamachikuqtaqmi qonqa qanchis p'unchaynintinpacha chay qosqanta hinapuni hucha pampachaypaq ofrendakunata, ruphachina sacrificiokunata, ruru ofrendakunata, aceitetapas, nispa.

will be added

X\