Ezequiel 44

1Wakmantan runaqa pusallawarqantaq Dios yupaychana wasiq inti lloqsimuy lado hawakaq punkuman, chaytaq wisq'asqa kashasqa. 2Chaypin Señor Diosqa niwarqan: –Kay punkuqa wisq'asqallapunin kanqa, manan pipas kicharinqachu, manataqmi pipas chaynintaqa haykunqachu Israelpa Diosnin ñoqa Señorpa chayninta haykusqayrayku. Chaymi chayqa wisq'asqallapuni kanqa. 3Suyu kamachikuqllan chaypi tiyaytaqa atinman ñawpaqeypi ch'uya mikhunata mikhunanpaq. Haykuytaqa atinqa Dios yupaychana wasi qhaway punkuntan, chayllantataq lloqsipunqapas, nispa. 4Runaqa wichay lado punkunta haykuchispan Dios yupaychana wasiq ñawpaqenman pusaykuwarqan. Chaypin rikurqani Señor Diospa lliphlli-kayninqa Diospa wasinman hunt'aykushaqta, hinaspan pampaman uyanpamanta wikch'ukurqani. 5Hinan Señor Diosqa niwarqan: –Qan, runaq churin, allinta qhawarispa makilla uyariway wasiypi ruwananku kamachikuykunamanta nisqayta. Wakillanmi wasiymanqa haykuytapas lloqsiytapas atin, wakinqa manan, chaytan allinta qhawanki. 6Mana kasukuq Israel runakunata niy, Apu Señor Diosmi nin: ¡Yaw, Israel runakuna, cheqnikusqay ruwasqaykichista wikch'uychis! 7Qankunan wasiyman pusaykurqankichis mana kasukuq wak llaqta runakunata, paykunaqa manan qhari-kaynin señalasqachu karqanku. Chaymi mikhunata, wirata, yawartawan qankuna haywashawaqtiykichis paykunaqa wasiyta qhellicharqanku. Chay hinapin rimanakusqanchista p'akirqankichis cheqnikusqay huchaykichisman aswanta yapaykuspa. 8Qankuna kikiykichismi ch'uya ruwanakunata hunt'anaykichistaqa wak llaqtayoqkunaman ruwananpaq saqerparirqankichis. 9Chayraykun ñoqa Apu Señor Diosqa nini: Wasiymanqa manapunin mayqen wak llaqtayoqpas haykunqachu, mana kasukuq kasqanrayku, aychanpipas mana señalniyoq kasqanraykupiwan, Israel runakunawan tiyaqkunaña kanku chaypas, nispa. 10Israel runakuna ñoqata wasanchawaspa idolonkuman kutirikapushaqtin, kutiriysikuq Leví runakunaqa huchankumanta muchunqapunin. 11Hinan wasiypiqa punkukuna qhawanata, wakin imakunachus ruwana kashan chaykunata ruwanqaku. Paykunan kanqa ruphachina sacrificiopaq uywakunata wak sacrificiopaq uywakunatawan nak'aqkuna, chaymantapas llaqta runakunata servillanqakutaq. 12Paykunan idolokunata servirqanku, chaywanmi Israel runakunata huchallichirqanku, chayraykun ñoqa Apu Señor Diosqa hatunta rimarirqani paykunaqa huchankumanta muchuchisqapuni kanankupaq. 13Chay Leví runakunan cheqnikusqay millaykuna ruwasqankumanta p'enqachisqa muchunqaku, chayraykun manapuniña sacerdoteykunachu kanqaku, manallataq atinqakuchu ñoqapaq t'aqasqakunaman ch'uyay-ch'uya ofrendakunaman qayllaykuytapas. 14Chaywanpas paykunataqa wakin llank'anakunallamanmi churasaq, wasiypi imakunatapas ruwanankupaq. 15Israel runakuna ñoqamanta t'aqarikapushaqtinmi Leví ayllu Sadocpa miraynin sacerdotekunalla wasiypiqa hunt'aq-yuyaywan servishawarqanku. Chayraykun ñoqa Apu Señor Diosqa nini, paykunaqa ñawpaqeypi serviqnillaypuni kanankuta. Paykunallan qayllaykamuwaspa wirata yawartawan haywamuwayta atinqaku. 16Paykunallan Ch'uya Cheqasniyman haykuyta atinqaku, paykunallataqmi altarman qayllaykuspa servimuwaytapas atinqaku. 17Ukhu patioq punkunta haykuspaqa, lino p'achawanmi churakunqaku. Ukhu patio kamachita ruwashaspapas wasiypi kamachita ruwashaspapas aman millmamanta p'achawanqa churakunqakuchu. 18Umankupas linomanta k'uyunawan wataykusqan kanqa, linollamantataqmi calzoncillonkupas kanqa, cinturankutaqa aman imawanpas chumpikunqakuchu mana hump'inankupaq. 19Runakunaq kasqan hawa patioman lloqsimpunankupaqqa, kasqan p'achakusqanku ch'uya wasikunapin ch'utikampunqaku chay kamachi ruwasqanku p'achankutaqa, hinaspan wak p'achankuwan churakapunqaku lloqsimunankupaq, chay ch'uya p'achaqa llaqtatan ch'uya-kayninwan k'irinman. 20Chukchankutaqa aman p'aqlatachu rutukunqaku, aman sinchi hatunkamapas wiñachikunqakuchu, makillan rutukunqaku. 21Aman mayqen sacerdotepas vinota ukyaspaqa ukhu patioman haykunqachu. 22Manallataqmi casarakuytapas atinqakuchu wak viudawanpas, t'aqanasqa warmiwanpas, aswanmi Israel llaqta sipaswanpas sacerdoteq viudanwanpas casarakunqaku. 23Sacerdotekunan llaqtayta yachachinqaku ch'uyakaqta qhellikaqmanta reparanankupaq, ñoqapaq t'aqasqa kaqta, runapaq kaqtapas reparanankupaq. 24Quejakunatan paykunaqa chaninchanqaku, chanin juezkuna hinan juzganqakupas kamachikuy simiyman hina. Kaqllataqmi llapan unanchasqaña fiestakunapi hunt'anqaku kamachikuyniykunata, unanchasqa simiykunatawan, samana p'unchaykunatapas ñoqapaqmi t'aqanqaku. 25Sacerdotekunaqa atinqan llamiykuyta taytanpa ayanta, mamanpa ayanta, churinpa ayanta, ususinpa ayanta, wawqenpa ayanta, mana casarasqa pananpa ayantapas, wak runaq ayantan ichaqa manapuni llamiykullanqapaschu mana qhellichakunankupaq. 26Llamiykunqakuchus chayqa ch'uyanchakunqakuraqmi, chaymantapas suyanqaku qanchis p'unchaytaraqmi ch'uya kanankupaq. 27Ukhu patioman haykuspa serviwanqaku chay p'unchaypiqa huk sacrificiotan kikinkuq huchankumanta haywawanqaku. Ñoqa Apu Señor Diosmi chayta nini. 28Sacerdotekunaq chaskinan herenciaqa ñoqallan kani, ima hayk'anpiwanpas. Manan paykunamanqa Israel suyupi ima chhikan hallp'allatapas qonqakuchu, ñoqallan kani hallp'anku hinaqa. 29Paykunaqa Israel runakunaq ñoqapaq t'aqasqanku kaqkunatan mikhunqaku, hucha pampachaypaq ofrendakunamanta, ruru ofrendakunamanta, kutichipuna ofrendakunamantawan. 30Kaqllataq sacerdotekunaqa chakra llank'asqaq ñawpaq rurunpa ñawinninta chaskinqaku llapan apamuwasqakunatawan. T'antata ruwakuspaykichispas paykunamanraqmi allinnintaqa haywarinkichis, chay hinapin wasiykichista saminchasaq. 31Imapas paymantakama wañuqtaqa, urpitapas, uywatapas, ima salqa animalpa wañuchisqan kaqtapas sacerdotekunaqa manan mikhunqachu, nispa.

will be added

X\