Ezequiel 43

1Runataq pusawarqan inti lloqsimuy lado punkuman. 2Hinan rikurqani Israelpa Diosninpa lliphlli-kaynin inti lloqsimuy ladomanta hamushaqta. Uyarirqanitaq Señor Diospa kunkanta askha unuq phaqchasqanta hina, kay hallp'ataq lliphlli-kayninwan k'ancharqan. 3Kay mosqoypi hina rikhuriyta rikusqaymi Jerusalén llaqta thuniq Señor Diospa hamusqan rikusqayman rikch'akurqan, hinallataq Quebar mayu patapi rikusqaywan tuparqan. Chaymi ñoqaqa pampaman uyanpamanta wikch'ukurqani. 4Señor Diospa lliphlli-kaynintaq inti lloqsimuy lado punkunta haykuspa, Dios yupaychana wasiman hunt'aykurqan. 5Chaymantan Diospa Espiritunqa hoqariwaspa aparikuwarqan ukhu patiokama, chaypin rikurqani imaynatachus Señor Diospa lliphlli-kaynin yupaychana wasiman hunt'aykusqanta. 6Runataq ñoqawan kuska sayaykurqan, uyarirqanitaq Diospa wasinmantapacha rimapayamuwasqanta. 7Niwarqanmi: Qan, runaq churin, uyariway, kamachikuy tiyanaymi kaypi kanqa, kaypin ñoqa kasaq, Israel runakunawantaq wiñaypaq tiyasaq. Kunanqa manan paykunapas reyninkupas ch'uya sutiytaqa wakmanta sarunchanqakuñachu, mana hunt'aq kayninkuwanpas reyninkuq ayankunawanpas. 8Chay reykunan wasiy k'uchuman wasinkuta k'askachimuspa punkuytawan kuska punkunkuta ruwakurqanku, huk perqallan t'aqarqan ñoqaqtawan paykunaqtawan. Paykunaqa ch'uya sutiytan saruncharqanku cheqnikusqayta ruwaspanku. Chayraykun paykunapaq phiñakuspa wañurachirqani. 9Kunanqa ñoqamanta karunchachichunku mana hunt'aq-kayninkuta reyninkuq ayankunatapas, ñoqan paykuna ukhupi wiñaypaq tiyasaq. 10Qan, runaq churin, Israel runakunaman willay wasiymanta llapan rikusqaykita huchankunamanta p'enqakunankupaq. Allinta yuyaykuchunku imayna ruwana kasqantapas. 11Lliw imaymana ruwasqankumanta p'enqarikuqtinkuqa lliwtan willanki imaynachus wasiy kananta, imakunachus chaypi kanantawan, lloqsinankunata, haykunankunata, llapan imayna ruwanapaq yuyaykusqanta, kamachikuy simi hunt'anankunatawan. Chaykunatan seq'espa paykunaman rikuchinki sut'ita rikunankupaq, chayman hina tukunankukama ruwanankupaq. Qelqapullankitaqmi lliw kamachikuykunata hunt'anankupaq. 12Kaytaqmi yupaychawananku wasiypa kamachikuy simin: Orqo patapi yupaychawananku wasiq muyuriqnin hallp'aqa ch'uyay-ch'uyapunin kanqa, nispa. 13Altar ruwanapaq tupusqataq kay hina: Dios yupaychana wasi tupusqa tupunawanmi altartapas tupun. Altarpa teqsinmi kasqa kuskan metro hina hallp'a ukhupi, k'awchinmanta perqa k'uchunmantaq kuskan metro hina p'alta pata muyurisqa, k'awchintakamataq huk t'aqlla altoyoq kancha muyurisqa yarqha hina. 14Yarqha ukhumanta urakaq k'awchinkamataq huk metro hina kasqa, chay k'awchinmantataq huk kuskan metro hina p'alta pata muyurisqa. Chay p'alta patamanta chawpikaq k'awchikamataq iskay metro hina kasqa, chay k'awchimantataq kuskan metro hina p'alta pata muyurisqa. 15Chawpikaq p'alta patamanta ofrenda ruphachina pataq k'awchinkamaqa iskay metro hinan kasqa. Chay pataq tawantin esquinanpitaq tawa waqrakuna sayasqa. 16Altarpa ofrenda ruphachina patantaq tawa esquinayoq p'alta pata kasqa, sapanka ladontaq soqta metroyoqkama kasqa. 17Chawpikaq p'alta patapas tawa esquinayoqmi kallasqataq, sapa ladontaq qanchis metroyoqkama kasqa. Chay p'alta pataq k'awchintan muyurisqa iskay chunka phisqayoq centímetro hina altoyoq kancha. Chay p'alta patataq kuskan metro hina anchoyoq kasqa. Altarman seqana gradastaq inti lloqsimuy ladonta kasqa. 18Chaymantataq Apu Señor Diosqa niwarqan: Qan, runaq churin, uyariway. Altar perqayta tukuspankun kay kamachikuyman hina altar patapi sacrificiokunata ruphachinqaku, altartapas yawarwan ch'aqchunqaku. 19Leví ayllumanta Sadocpa miraynin serviqniy sacerdotekunamanmi torillota qonki hucha pampachay ofrenda kananpaq. Ñoqa Apu Señor Diosmi chayta nini. 20Chaymantataq huk pisi yawarta aparikuspa hawiykunki altarpa tawantin waqranta, tawantin esquinanta, ofrenda ruphachina pataq k'awchinkunatawan. Chay hinapin altartaqa ch'uyanchaspayki ñoqapaq t'aqanki. 21Hinaspa chay torillo haywasqataqa yupaychawananku wasiq hawanpi ruphachinki, chaypaq nisqa cheqaspipuni. 22Qhepantin p'unchaypas haywallankitaq mana imanasqa orqo cabrata hucha pampachay sacrificiopaq, yawarninwantaq altarta ch'uyanchanki, imaynatan torillowanpas ruwarqanki hinata. 23Chay ruwanakunata tukuspaykin nak'allankitaq mana imanasqa torillota borregotawan. 24Hinaspataq ñoqaman haywawanki, sacerdotekunataq kachiwan t'akaykuspa sutiypi ruphachinqaku. 25Sapa p'unchaymi qanchis p'unchaynintin orqo cabrata ruphachinki hucha pampachay sacrificiopaq, kaqllataq mana imanasqa torillota, borregotapas haywanki. 26Qanchis p'unchaynintinmi sapa p'unchay sacerdotekunaqa altarta ñoqapaq t'aqaspa ch'uyallataña ch'uyanchanqaku. 27Pusaqkaq p'unchayñataq sacerdotekunaqa ruphachina ofrendaykichiskunata sumaq kawsay ofrendaykichiskunatawan haywanqaku. Chaymi qankunata chaskisqaykichis. Ñoqa Apu Señor Diosmi chayta nini, nispa.

will be added

X\