Ezequiel 42

1Dios yupaychana wasiq ñawpaqenmantan runaqa horqowarqan wichay ladoman, hinaspan pusaykuwarqan wichayneqpi wasikunaq kasqanman, chay wasikunaqa ukhu patiopin kasqa Dios yupaychana wasimanta chunka metro hinallapi. 2Wichay qhawaq wasin kasqa wask'anman phisqa chunka metro hina, anchonmantaq iskay chunka phisqayoq metro hina. 3Iskay wasikunan kasqa, hukkaqmi Dios yupaychana wasimanta chunka metropi hina, hukkaqtaqmi hawa patio qayllapi hina kasqa. Iskaynin wasikunan kinsa pata kasqa, sapanka patataq qhawapunakuqkama kasqa. 4Chay iskaynin wasiq chawpinta pasanapaq kasqa phisqa metro hina anchoyoq, wask'anmantaq phisqa chunka metro hina, punkunkunataq wichayta qhawasqa. 5Kinsa patakaq altos wasikunaqa huch'uykaman kasqa chawpinpi kaq wasikunamantapas pampanpi kaq wasikunamantapas, purinan cheqas aswan p'alta kasqanrayku. 6Chay wasikunan karqan kinsa pata altosniyoqkama, ichaqa manan karqanchu tusankuna patiopi wasikunaq hinaqa, chaymi kinsakaq pata wasikunaqa aswan huch'uylla kasqa chawpikaq wasikunamanta pampapi kaq wasikunamantawan. 7Dios yupaychana wasi qayllapi kaq wasiqa wask'anman kasqa phisqa chunka metro hinan, ñawpaqen hawa patioman qayllapi kaq wasitaq wask'anman kasqa iskay chunka phisqayoq metro hina. Chay wasiq perqa k'uchunmantan aysakusqa inti lloqsimuy ladoman yanqa perqalla, chaytaq kasqa wask'anman iskay chunka phisqayoq metro hina. 9Chay wasiq inti lloqsimuy ladon hawa patio perqawan tupaynintan haykunaqa kasqa. Dios yupaychana wasiq uray ladonpipas kallasqataqmi wasikuna, ukhu patiopiraq Dios yupaychana wasimanta chunka metropi hinalla. 11Chay wasikunan kasqa wichay ladopi wasikuna kikillan wask'anpas anchonpas sayayninpas. 12Kallasqataq chawpipi pasanapas, punkunkunapas kaq sayayllataq kasqa. Chay wasiq inti lloqsimuy ladon perqa tupaynintan haykuna kasqa. 13Runataq niwarqan: Uranpi wasikunapas, wichayninpi wasikunapas ch'uyan. Señor Diospa ñawpaqenpi serviq sacerdotekunan chaypi mikhunqaku ch'uya ofrenda haywasqata. Chay wasikunaqa ch'uyapunin, chayraykun chayman waqaychanqaku: ch'uya ofrendakunata, ruru ofrendakunata, hucha pampachaypaq sacrificiokunata, kutichipuna ofrendakunatawan. 14Sacerdotekuna Dios yupaychana wasiman haykuspanmi, hawa patiomanqa mana lloqsimuyta atinqakuchu, Señor Dios servinanku p'achankuta mana ch'utikuspaqa, chay p'achaqa ch'uyapuni kasqanrayku. Runakunaq kasqanman lloqsinankupaqqa wak p'achawanmi churakunanku kanqa, nispa. 15Dios yupaychana wasita patiokunantinta tupuyta tukuspataq runaqa pusawarqan inti lloqsimuy lado haykunanta, hinaspan muyuriq hawantañataq tupurqan. 16Tupunan k'aspita hap'ispataq tupurqan inti lloqsimuy ladonta, chaytaq iskay pachak phisqa chunka metroyoq hina kasqa. 17Chaymantan tupullarqantaq wichay ladonta, hinan chaypas iskay pachak phisqa chunka metroyoq hina kasqa. 18Chaymantataq tupurqan uray ladonta, chaypas iskay pachak phisqa chunka metroyoq hina kasqa. 19Chay qhepatataqmi tupurqan inti haykuy ladonta, hinan chaypas iskay pachak phisqa chunka metroyoq hina kallasqataq. 20Tawantin lado perqa qhepantan tupurqan, Dios yupaychana wasiq hallp'antaq muyuriq perqayoq kasqa, tupusqataq kasqa tawantin ladonpas iskay pachak phisqa chunka metroyoqkama. Chay perqan Dios yupaychana wasi cheqastaqa muyuykurqan, chay ukhun ch'uya kasqa, qhepantaq qhellikaqpaq kasqa.

will be added

X\