1 Señor Diosmi niwarqan: Qan, runaq churin, adobeta hap'iy, hinaspa ñawpaqeykiman churaykukuy, patanpitaq Jerusalén llaqtaq rikch'ayninta dibujanki. 2 Hinaspa llaqta muyuykusqa kasqanta rikunankupaq hark'achita ruwanki hallp'a montosqa seqanatawan, ruwallankitaq perqa thunina carretakunata, muyuriqpitaq soldadokunaq karpankunata. 3 Chaymantataq fierromanta qhata sartenta churaykukunki qanmanta llaqtamantawan t'aqananpaq, huk fierro perqapas kashanman hinata, hinaspataq llaqtata chay qhepamanta qhawanki. Llaqtaqa awqanpa muyuykusqan hinan kanqa, qanmi chay muyuykachiqqa kanki. Chaytaqmi Israel runakunaq qhawananpaq señal kanqa. 4 Qantaq lloq'e ladonpi chutarayanki, Israel llaqtaq huchanwanmi ñit'iykachisqayki chay chutarayasqayki p'unchaykunapi. 5 Israelpa sapa wata huchanmantan huk p'unchaytakama chutarayanki, chaypin kanqa kinsa pachak isqon chunka p'unchay. 6 Chay p'unchaykuna tukukuqtintaq, paña ladonpiñataq chutarayanki, Judá suyuq huchanwan ñit'iykusqa tawa chunka p'unchayta, sapa wata huchamanta huk p'unchaytakama. 7 Qhawarinkitaq awqanpa muyuykusqan Jerusalén llaqta ladoman, makiykita q'enpirqokuspataq paypa contranpi willanki. 8 Huk watanawanmi t'eqerqosqayki mana kutiriyta atinaykipaq, llaqtaq muyuykusqa kasqan p'unchaykuna tukukunankama. 9 Kunantaq hap'inki trigota, cebadata, mijota, centenota, habasta, lentejastapas, llapanta chhaqrunki huk puruñallapi, chaymantataq mikhunaykipaq t'antata ruwakunki. Kinsa pachak isqon chunka p'unchaynintin chutarayasqaykipin chayllata mikhunki. 10 Churasqa horallapin mikhunki, sapa p'unchay media librata hinalla. 11 Kaqllataqmi unutapas ukyanki churasqa horallapi, sapa p'unchaytaq huk botella unullata ukyanki. 12 Llapa runaq rikushasqanmi t'antata ruwakunki runaq hatun hisp'aynin sansa patapi, hinaspan mikhunki cebada t'antata hina, nispa. 13 Señor Diosqa nillarqantaqmi: Chay hina qhelli mikhunatan Israel runakunaqa mikhunqaku ñoqaq ch'eqerqarichisqay suyukunapi, nispa. 14 Chaymi ñoqaqa nirqani: ¡Apu Señor Diosníy! Erqe kasqaymantapachan manapuni hayk'aqpas qhelli mikhunakunataqa mikhuqchu kani, manallataqmi paymantakama wañusqa aychatapas, salqa animalkunaq sipisqan aychatapas, manapunin malliykullaqpaschu kani, nispa. 15 Hinan Señor Diosqa niwarqan: Chay hinaqa, waka q'awa sansa patapi t'antaykita chayachinki, amaña runaq hatun hisp'aynin sansa patapichu, nispa. 16 Chaymantataq niwarqan: Runaq churin, Jerusalenpin mana mikhuna kanqachu, mikhuna kaqpas tupusqallan kanqa, runakunapas llakisqan mikhunqaku. Unupas tupusqallan kanqa, manchan-manchanmi ukyanqakupas. 17 Mikhunanku ukyananku tukukuqtinmi, imayna kasqankuta qhawanakuspa sinchi llaksasqa kanqaku. Huchankumantataqmi aswan-aswanta laqhoyanqaku, nispa.
