Ezequiel 39

1Qan, runaq churin, Gog contra profetizaspa niy, Apu Señor Diosmi nin: Yaw Gog, qanmi kanki Tubal suyuq Mesec suyuq umallinkunaq qollanan, ñoqan kani awqayki. 2Kutirichimuspaymi aysamusqayki karuy-karu wichay ladomanta, hinaspan pusamusqayki Israelpi orqokuna contra. 3Chaymantataqmi lloq'e makiykipi hap'isqayki p'eqtaykita p'akisaq, paña makiykipi wach'ikuna apasqaykitapas kacharichisqaykin. 4Qantaqmi soldadoykikunantin, puriysiqniyki llapa suyukunantin Israel orqokunapi wañurankichis. Chaypin ayaykichista qaraykusaq imaymana rikch'aq phalaq animalkunaman, salqa animalkunamanwan. 5Q'ala pampapin urmankichis, ñoqa Señor Diosmi chayta nini. 6Magog suyutan ninawan kanaykusaq lamar-qocha patapi llakhilla tiyaq llaqtakunatawan, chaywanmi reqsiwanqaku ñoqa Señor Diosqa kasqayta. 7Israel llaqtay chawpipin ch'uya kasqayta reqsichikusaq, ñoqaq sutiyta sarunchawanankutaqa manañan hinallatachu qhawasaq, wak suyukunataq yachanqaku ñoqa Señor Diosqa, Israelpi Ch'uya Dios kasqayta. 8Apu Señor Diosmi nillantaq: Rimasqay p'unchayqa chayamunqapunin. 9Chay p'unchaymi Israel suyu llaqtakunapi tiyaqkuna lloqsispa imaymana rikch'aq armakunawan wayk'ukunqaku, chay hinapin ruphachinqaku p'eqtakunata, wach'ikunata, chanqana lanzakunata, maqanakunata, escudokunatapas. Chaykunan kanqa qanchis watantin nina rawrachinapaq llant'a hina. 10Chay armakunan kanqa wayk'unankupaq, chaymi manaña llant'ata llant'aqpas pampakunata rinqakuchu, manallataq sach'a-sach'akunapi ch'eqtata ch'eqtaqpas rinqakuñachu. Paykunan llat'ananqaku ñawpaq llat'anaqninkuta, ch'utinqakutaq ñawpaq ch'utiqninkuta. Ñoqa Apu Señor Diosmi chayta nini. 11Chay p'unchaypin Israelpi huk cheqasta Gogman qosaq p'ampasqa kananpaq. Chay cheqasqa Kachi Qochaq inti lloqsimuy ladonpi “Puriqkunaq Wayq'on” nisqan. Chaypin Gogtaqa llapan soldadonkunantinta p'ampapunqaku, hinan ñan purinata hark'anqa, sutintataqmi churanqaku: “Gogpa Soldadonkunaq Wayq'on” nispanku. 12Israel runakunan suyunkuta ch'uyanchanankupaq qanchis killantin ayakunata p'ampanqaku. 13Llapan runakunan aya p'ampasqallankupiña usqhanqaku, atipaspa hatunchasqa kasaq chay p'unchaymi paykunapas chay ruwasqankumanta alabasqa kanqaku. Ñoqa Apu Señor Diosmi chayta nini. 14Qanchis killa qhepatan huk t'aqa runata kachanqaku suyuntinta qhawaraqta, paykunan ima ayatapas tarimuspankuqa p'ampamunqaku, chay hinapin paykunaqa suyukunata ch'uyanchanqaku. 15Chay runakunamanta mayqellanpas suyuntinta purisqanpi runa tulluta rikunqa chayqa, chay cheqastan tuyruykunqa aya p'ampaqkunaq “Gogpa Soldadonkunaq Wayq'on” nisqapi p'ampanankupaq. 16Chay hinapin suyuta ch'uyanchanqaku. Chay wayq'o qayllapiqa kallanqataqmi huk llaqta “Soldadokunaq Llaqtan” nisqa. 17Qan, runaq churin, uyariway, ñoqa Apu Señor Diosmi niyki: Waqyay llapan salqa animalkunata, phalaq animalkunatawan, hinantinmanta huñukamuspa Israelpi orqokunaman hamunankupaq. Chaypin paykunapaq hatun sacrificiota wakichishani, aychatan mikhunqaku, yawartan ukyanqaku. 18Allin qharikunaq aychantan mikhunqaku, kay pacha kamachikuqkunaq yawarnintan ukyanqaku. Chay soldadokunan kanqa Basán suyumanta wirayachisqa borregokuna, anejokuna, orqo cabrakuna, torokuna hina nak'asqa. 19Chay wakichisqay mikhunamantan wiranta mikhunqaku onqonankukamaraq, yawartapas ukyanqaku machanankukamaraq. 20Mesaypin saksanqaku caballo aychawan, sillakuqkunaq aychanwan, soldadokunaq aychanwan, allin qharikunaq aychanpiwan. Ñoqa Apu Señor Diosmi chayta nini. 21Chay hinapin qhapaq-atiyniyta rikuchisaq wak suyukunaman, llapan suyukunataq yachanqaku paykunata hap'irqospa muchuchiq kasqayta. 22Chay p'unchaymantapachan Israel runakunaqa yachanqaku ñoqa Diosninku Señor Dios kasqayta. 23Yachallanqakutaqmi wak suyukunapas Israel runakunaqa wasanchawasqanku huchankumanta kamachi-kaypaq aparparisqa kasqankuta. Mana chanin kasqankumantan ñoqapas qheparparipurqani, hinaspan awqankuman hap'iykachirqani, hinan awqa-tinkuypi wañupurqanku. 24Ñoqaqa millay mana chanin kasqankuman hinapunin muchuchirqani, chaymi qheparparirqani. 25Chayraykun ñoqa Apu Señor Diosqa nini: Kunanqa wakmantan Jacobpa mirayninta t'ikarichisaq, hinaspan llapan Israelta khuyapayasaq. Ch'uya sutiymantapas sientesaqtaqmi. 26Huk kutimantawanmi suyunkupi mana piqpa rimapayasqan tiyakunqaku, chay pachataqmi paykunaqa qonqapunqaku ñoqa wasanchawasqanku huchankutapas, p'enqakuyninkutapas. 27Awqankuq suyunkunapi ch'eqesqakunata huñuykuspaymi, chay suyukunamanta kutichimpusaq. Chaywanmi ch'uya kasqayta suyukunaman reqsichikusaq. 28Hinan llaqtaypas yachanqa ñoqaqa Diosninku Señor Dios kasqayta, hinaña kamachi-kayman aparichirqani chaypas, kaqtan suyunkuman kutichimpusaq mana hukllatapas wikch'umuspa. 29Manañataqmi qheparparisaqñachu, aswanpas Israel runakunamanmi Espirituyta kachaykamusaq. Ñoqa Apu Señor Diosmi chayta nini, nispa.

will be added

X\