1 Señor Diosmi niwarqan: 2 –Qan, runaq churin, Magog suyu ladoman kutirispa, rey Gog contra profetizay. Paymi Tubal suyuq Mesec suyuq umallinkunaq qollananqa. 3 Payta niy, Apu Señor Diosmi nin: Yaw, Gog, qanmi kanki Tubal suyuq Mesec suyuq umallinkunaq qollanan, ñoqan kani awqayki. 4 Qantan kutirichisqayki, simiykiman ganchowan churaspaymi qanta llapan ejercitoykikunatawan hawaman aysarparisqayki. Qanpan kan caballoykikuna, armantinkama caballoyoq soldadoykikuna, mana yupay atiy soldadoykikuna, llapallankun escudoyoq espadayoq kanku, ichaqa llapantapunin aysarparisaq. 5 Qanwanmi kashallanqataq Persia suyu soldadokuna, Etiopía suyu soldadokuna, Libia suyu soldadokunapas, llapankutaq cascoyoq escudoyoq kanku. 6 Kaqllataq qanwan kashanqa Gomer suyu llapan soldadokuna, wichay lado karu suyu Bet-togarma llapan soldadokunapas, chay hinapin askha suyukuna qanwan kashanqa. 7 Yaw, Gog, wakichikuy q'epichakuy, ladoykipi llapan soldadokunantin, munayniykiman hina paykunata kamachiy. 8 Unay p'unchaykuna qhepamanmi qanta waqyasqayki. Israelpi orqokunan pasaq purunyachisqa kasqa. Runankunan hinantin suyumanta huñukamuspa chay orqokunaman kutimpurqanku. Thunisqa suyunkun wakmanta allichasqa kapun, kunanqa llakhiñan Israel runakunaqa tiyashanku. Qanmi ichaqa qhepa watakunaman chay suyuman awqa-tinkuq phawaykunki. 9 Chaymi qanqa chayanki pacha phuyu hinaraq suyuntinta p'ampanaykipaq, hinallataq phawaykunki tutuka hatun wayra hinaraq, llapan mana yupay atiy soldadoykikunawan, llapan chay suyukunapiwan. 10 Ñoqa Apu Señor Diosmi nini: Chay p'unchaymi mana allinta yuyaykuspa mana chanin yuyaykunata kamarispa, ninki: 11 Mana yanapaqniyoq suyu contran phawaykusaq, chay runakunan mana imata yuyarispa llakhilla tiyashanqaku, llaqtankunapas mana perqayoq, mana punkuyoq, mana chakanayoq kashaqtin. 12 Chay runakunan hinantin suyukunamanta kutimurqanku, hinaspan wakmanta raqay-raqayta allichaspa tiyakapurqanku, kunantaq pachaq pupunpi tiyashanku, askha uywakunayoq askha kaqniyoq. Chaymi ñoqa paykuna contra sayarispa suwasaq llat'anasaq, nispa. 13 Hinan Sabá runakuna, Dedán runakuna, Españamanta comerciantekuna, allin qharinkunapas tapusunkiku: ¿Suwakuqchu hamurqanki? ¿Mana yupay atiy soldadoykita huñurqospachu llat'anaq hamurqanki? ¿Apallankitaqchu qorita, qolqeta, qhapaq kaykunata, uywakunatapas? ¿Askhatapunichu llat'anasqaykikunata apanki? nispa. 14 Chayrayku, qan, runaq churin, Gogta niy, Apu Señor Diosmi nin: Israel llaqtay llakhilla tiyakushaqtinmi, qan puririnki. 15 Wichay lado karuy-karu suyuykimantapachan qanqa askha suyukunapiwan hamunki. Mana yupay atiy ejercitokunan qanwan hamunqa, llapankutaq caballopikama. 16 Qanmi, Gog, Israel llaqtayman pacha phuyu hinaraq phawaykunki. Hamuq p'unchaykunapin pusamusqayki llaqtay contra, qanta imaynatachus ruwaspaymi suyukunaman rikuchisaq ñoqaqa ch'uyapuni kasqayta. 17 Apu Señor Diosmi nin: Unay p'unchaykunañan rimasharqani Israelpi kamachiy profetakunawan, chaypiqa qanmantan rimarqani. Paykunan haqay p'unchay askha kutita willakurqanku qanta pusaspa Israelman kachaykunayta, nispa. 18 Apu Señor Diosmi nin: Israelta Gog phawaykuqtinmi manchanatapuni phiñakuyniy rawrarinqa. 19 Sinchi k'arakta phiñakuspaymi sut'inchani Israel suyupi chay p'unchay sinchi pacha chhaphchiy kananta. 20 Qochapi challwakuna, alton phalaq animalkuna, salqa animalkuna, pampan suchuq animalkuna, pachantinpi llapan runakunapas lliwmi ñawpaqeypi khatatatanqa. Orqokunan thunikamunqa, ranrakunan kumpakamunqa, llapan perqakunataqmi lliwlla thunikunqa. 21 Ñoqan Gogman chayachisaq imaymana rikch'aq mana allinkunata manchakuywan p'ampaykusqa kananpaq. Runakunataq paykunapura espadawan wañuchinakunqaku. 22 Onqoywanmi qonqay wañuywanmi ñak'arichisaq, pay pataman soldadonkuna pataman puriysiq-masin suyukuna patamanwanmi kachaykusaq para lloqllata, chikchita, azufre ninatawan. 23 Chay hinapin askha suyukunaman rikuchisaq hatun-kayniyta ch'uya-kayniytawan. Ñoqa kikiytapunin paykunaman reqsichikusaq, hinan reqsiwanqaku ñoqa Señor Diosqa kasqayta. Ñoqa Apu Señor Diosmi chayta nini, nispa.
