Ezequiel 37

1Señor Diosmi llamiykuwarqan, hinan paypa Espiritunqa apawarqan askha tullukunawan hunt'a kashaq wayq'oman. 2Chaypin Señor Diosqa hinantin cheqasman tullukunaq kasqan wayq'opi pusaykachawarqan, pampapitaq rikurqani askhallaña mullpha tullukunata. 3Hinan Señor Diosqa tapuykuwarqan: –¿Qan, runaq churin, yachankichu kay tullukunaq kawsarinanta? nispa. Ñoqataq nirqani: –Qanllan yachanki, Apu Señor Diosníy, nispa. 4Chaymi payqa niwarqan: –Chay tullukunaman profetizaspa niy, ¡yaw, ch'aki tullukuna, uyariychis Señor Diospa siminta! 5Apu Señor Diosmi nisunkichis: Qankunamanmi qosqaykichis kawsay samayta, hinan kawsaripunkichis. 6Hank'ukunatan churasqaykichis, aychawanmi hunt'achisqaykichis, patanmantaqmi aycha qarawan churasqaykichis, hinaspan kawsay samayta qosqaykichis, qankunataq kawsarimpunkichis. Hinan reqsiwanqaku ñoqa Señor Diosqa kasqayta, nispa. 7Ñoqataq rimarqani paypa kamachiwasqanta hina, rimashaspaytaq chhaqaqaqaqta uyarirqani, pampa kuyuriymi karqan hinan ch'ulla-ch'ullamanta tullukuna huñuykunakurqan. 8Qhawashallaqtiymi hank'unkuna rikhurirqorqan, chaymantaqa aychañataq hunt'aykurqan, patanmantaq aycha qarawan qataykurqan, ichaqa manan kawsay samayniyoqraqchu karqanku. 9Hinan Señor Diosqa niwarqan: –Qan, runaq churin, profetizaspa kawsay samayta niy, Apu Señor Diosmi nin: Hamuy kawsay samay, kay pachaq tawantin ladomanta, hinaspa chay ayakunaq sonqonman phukuykuy kawsarinankupaq, nispa. 10Ñoqataq profetizarqani paypa kamachiwasqanman hina, hinan kawsay samayqa paykunaman haykurqan, paykunataq kawsarispa sayarirqanku, mana yupay atiy soldadokunataq kasqaku. 11Chaymi Señor Diosqa niwarqan: –Runaq churin, Israel llaqta runapas chay ch'aki tullu hinan. Paykunan ninku: Ñoqanchispa tullunchisqa ch'akillañan kashan, manan ima suyakuyninchispas kanñachu, hukpaqkama chinkasqa hinan kanchis, nispanku. 12Chayrayku, paykunata niy, Apu Señor Diosmi nin: Llaqtalláy, aya p'ampanaykichistan kicharisaq, hinaspan chaymanta horqomusqaykichis, hinaspataq Israel llaqtaman kutichipusqaykichis. 13Aya p'ampanaykichista kicharispa chaymanta horqomuqtiymi, qankunaqa reqsiwankichis ñoqa Señor Diosqa kasqayta. 14Ñoqan qankunaman kawsayniyta samaykusqaykichis, hinan qankunaqa kawsarinkichis, kikin hallp'aykichismantaqmi churaykapusqaykichis. Hinaqtinmi yachankichis ñoqa Señor Diospa rimasqayta hunt'asqaytapas. Ñoqa Señor Diosmi chayta nini, nispa. 15Señor Diosmi niwarqan: 16–Qan, runaq churin, hap'iy huk k'aspita, chaypitaq kay hinata qelqay: Uray ladopi kaq Judá suyu runakunapiwan, nispa niqta. Chaymanta hoqarillaytaq huk k'aspita, hinaspa chaypi qelqay: Wichay ladopi kaq Josepa miraynin Efraín suyu runakunapiwan, nispa niqta. 17Chaymantataq iskaynin k'aspikunata makiykipi ch'ulla k'aspita hinalla ch'antarqonki. 18Llaqtamasiyki runa: ¿Ima ninantan chay ruwasqayki nin? Willawayku, niqtintaq, 19paykunata niy, Apu Señor Diosmi nin: Josepa miraynin Efrainpa k'aspintan hap'isaq, hinaspan ch'antasaq Judapa k'aspintawan makiypi ch'ulla k'aspillaman tukuchinaypaq, nispa. 20Paykunaq rikushasqanmi makiykipi hap'inki chay qelqasqayki iskaynin k'aspita, 21ninkitaq, Apu Señor Diosmi nin: Israel runakunatan horqomusaq hinantin suyukunapi kasqanmanta, hinantinmantan huñurqamusaq hinaspan llaqtankuman kutichimpusaq. 22Israelpa orqonkunapin huk suyullaman paykunata tukuchisaq, hinan ch'ulla reyllayoq kanqaku, manan t'aqanasqachu kanqaku, manan iskay suyupaschu kanqaku. 23Manañan qhellichakunqachu millay mana chanin idolokunata yupaychaspanku, manan imaymana millay huchatapas ruwanqakuñachu. Ñoqan paykunata qespichisaq ñoqata wasanchawaspa huchallikusqankumanta, huchankumantapas ch'uyanchapusaqmi. Hinan paykuna llaqtay kanqa, ñoqataq Diosninku kasaq. 24Kamachiy Davidmi paykunaq reynin kanqa, llapankutan michinqa. Paykunaqa kamachikuy simiykunatan kasukunqaku, unanchasqay simiykunatapas hunt'anqakun. 25Tiyakapunqakutaqmi kamachiy Jacobman qosqay hallp'api. Maypichus ñawpa taytankupas tiyarqan chayllapipunin paykunapas, wawankupas, llapan mirayninkupas tiyakunqaku, kamachiy Davidllapunitaqmi kamachiqninkupas kanqa. 26Paykunawanmi rimanakusaq, thak-kayllapi kawsaspa kanankupaq, chayqa wiñaypaq rimanakusqan kanqa. Takyachispaymi askhayachisaq, paykuna chawpipitaqmi ch'uya wasiyqa kallanqapuni. 27Paykuna ukhupin tiyakusaq, hinaspan Diosninku kasaq, paykunataq llaqtay kanqaku. 28Paykuna chawpipi ch'uya wasiyta wiñaypaq churaqtiymi, wakin suyukuna reqsiwanqaku Israelta ñoqapaq t'aqasqa kananpaq akllakusqayta, nispa.

will be added

X\