Ezequiel 36

1Qan, runaq churin, Israelpa orqonkunata profetizaspa niy, Israelpa orqonkuna, Señor Diospa siminta uyariychis. 2Apu Señor Diosmi nin: Awqaykichismi qankunamanta nirqan: ¡Hahaháy! ¡Chay ñawpa orqokunaqa ñoqaqñan! nispa. 3Chayrayku profetizay, Apu Señor Diosmi nin: Hinantin cheqasmantan qankunaman awqaykichisqa phawaykamuspa llat'anarqasunkichis, llapan wak llaqtayoqkunan qankunata munaychakurqasunkichis, hinaspataq runakuna pisicharqasunkichis rimakurqasunkichis ima. 4Chayrayku, Apu Señor Diospa rimasqanta uyariychis Israelpi orqokuna, moqokuna, k'ahakuna, wayq'okunapas. Señor Diosmi qankunata raqay-raqay kaqkunata, ch'usaqyachisqa llaqtakunata nin: Muyuriqniykichispi suyukunan llat'anarqasunkichis asipayarqasunkichis, 5chaymi ñoqa Apu Señor Diosqa k'arakta phiñakuspa rimarirqani wakin suyukuna contra Edom contrapiwan. Paykunan millay yuyaywan hatun kusikuypiwan hallp'ayta munaychakurqanku pasaqtapuni llat'ananankupaq, nispa. 6Chayrayku, Israel suyumanta profetizaspa, orqokunata, moqokunata, k'ahakunata, wayq'okunatapas niy, Apu Señor Diosmi nin: Wak suyukunan qankunata pisichaspa asikurqanku, chaymantan ñoqaqa sonqo nanasqa phiñasqa kashani. 7Chayraykun makiyta hoqarispa ñoqa Apu Señor Diosqa jurani, muyuriqniykichispi suyukunapas pisichasqa asipayasqa kanankupaq. 8Qankunataq Israel suyu orqokuna, k'allmasapa mallkikunaq wiñasqan kankichis, askhatataq ruruchinkichis Israel wawaykunaq mikhunanpaq, paykunaqa kutimunan patapiñan kashanku. 9Ñoqan qankunata yanapasqaykichis, hinan tarpusqa t'akasqa kankichis. 10Israel llaqtayta qanpi tiyaykachispaymi askhatapuni mirachisaq. Llaqtakunamanmi runakuna hunt'aykunqa, raqaykunaq kasqanpin wakmanta wasichakunqaku. 11Qankuna patamanmi miraykachisaq runakunata uywakunatapas askhallaña kanankupaq. Ñawpa hinan askha wasikuna kapunqa, qankunapas ñawpaqmantaqa astawan allinmi kapunkichis. Hinaspan reqsiwanqaku ñoqa Señor Diosqa kasqayta. 12Israelpi orqokuna, qankuna patapin llaqtay runata purichisaq, paykunataqmi qankunata herenciankupaq hap'ikapusunkichis, hinan qankunaqa mana hayk'aqpas wawankuta qechunkichisñachu, nispa. 13Apu Señor Diosmi orqokunamanta nillantaq: Qankunamantan rimanku: Runakunata mikhuq, llaqtaq wawankuna ch'usaqyachiq, nispa. 14Chay hinaqa, amañayá kunanmantaqa runa mikhuqchu kanki, amataq llaqtaq wawan ch'usaqyachiqpaschu kanki. Ñoqa Apu Señor Diosmi chayta nini. 15Manan munanichu wak suyukunaq wakmanta k'aminasuykichista, manañan chay suyukunaq asipayasqanta uyarinkichisñachu, qankunaqa manañan llaqtaq wawan ch'usaqyachiqñachu kankichis. Ñoqa Apu Señor Diosmi chayta nini, nispa. 16Señor Diosmi niwarqan: 17Qan, runaq churin, uyariway. Suyunkupi tiyashaspankun Israel runakunaqa qhellichakapurqanku millay ruwasqankuwan. Paykunaq kawsayninkun ñoqapaqqa karqan killanwan kashaq warmiq qhellin hina. 18Chaymi k'arakta phiñakuspa paykunata muchuchirqani, suyupi runakunata wañuchisqankumanta idolokunata yupaychaspa hallp'ata qhellichasqankumantawan. 19Kaqllataq hinantin llaqtakunaman suyukunamanwan ch'eqeykachirqani, ñoqan juzgarqani ruwasqankuman hina. 20Ichaqa hinantin chayasqanku suyupin ch'uya sutiyta pisicharqanku, chay runakunataq nirqanku: Kaykunaqa Señor Diospa llaqtanmi, chaywanpas ichaqa suyunkumantan qarqochikamurqanku, nispa. 21Israel runakunan hinantin suyuman chayasqankupi ch'uya sutiyta pisicharqanku, chayraykun yuyaykurqani sutiyta mana pisichanankupaq. 22Chay hinaqa Israel runakunata niy, Apu Señor Diosmi nin: Israel runakuna, hinantin suyukunaman chayasqaykichispin ch'uya sutiyta pisicharqankichis. Kunan imatachus ruwasaq chayqa manan qankunaq allinniykichispaqchu kanqa, aswanmi ch'uya sutiy hatunchasqa kananpaq kanqa. 23Qankunan sutiyta suyukunapi pisicharqankichis, ñoqataqmi suyukunaman rikuchisaq may ch'uyataq hatuntaq sutiyqa kasqanta, hinan paykuna yachanqaku ñoqa Señor Diosqa kasqayta. Qankunata imaynatachus ruwasqaywanmi suyukunaman rikuchisaq ñoqa ch'uya kasqayta. Ñoqa Apu Señor Diosmi chayta nini. 24Chay hinantin llaqtakunamanta suyukunamantawanmi ñoqa horqokampusqaykichis, huñurqospaymi suyuykichisman kutichimpusqaykichis. 25Ch'uya unuwanmi ch'aqchusqaykichis, hinan qankuna ch'uyanchasqa kankichis. Ch'uyanchasqaykichismi llapan qhelliykichiskunamanta idoloykichiskunamantawan. 26Mosoq sonqotawan mosoq yuyaytawanmi churasqaykichis. Qechupusqaykichismi chay rumi sonqoykichista, hinaspan kasukuq sonqota churasqaykichis. 27Qankunamanmi Espirituyta qosqaykichis, hinaspan kamachikuy simiykunata unanchasqa simiykunatawan kasukuqta ruwasqaykichis. 28Ñawpa taytaykichisman qosqay suyupitaqmi tiyakapunkichis, hinaspan llaqtay kankichis, ñoqataq Diosniykichis kasaq. 29Lliw qhellichaqniykichismantan qespichisqaykichis. Chakraykichistan kamachisaq askha trigota ruruchinanpaq, yarqaywanpas manañataqmi muchuchisqaykichischu. 30Hinallataq mallkikunatapas mikhuykunatapas allinta ruruchisaq, manañan yarqay kanqachu wak suyukunaq qayllanpi p'enqasqa kanaykichispaq. 31Chaymantataq millay-kayniykichismanta mana chanin ruwasqaykichismantawan yuyarispaykichis, qankuna kikillaykichismanta millakapunkichis huchaykichismanta millay ruwasqaykichismantapas. 32Israel runakuna, ñoqa Apu Señor Diosmi nini: Allinta yachaychis, kaytaqa ruwani manan qankunaraykuchu, aswanpas millay mana chanin ruwasqaykichismanta p'enqakunaykichispaqmi, nispa. 33Ñoqa Apu Señor Diosmi nini: Lliw huchaykichiskunamanta ch'uyanchaqtiymi, tiyakapunkichis llaqtaykichispi, hinaspanmi raqaykunata allicharispa wasichakapunkichis. 34Ch'inneq purunman tukupuq hallp'an yanqa ch'in kashanantaqa tarpusqa kapunqa, llapa chayninta puriqkunaq qhawarinankupaq. 35Hinan ninqaku: Kay ch'in hina kapuq hallp'amá, kunanqa Edén huerta hinaraq kapusqa, thunisqa q'asuykusqa raqay-raqay llaqtapas kunanqa wasikunawan hunt'aykusqan, allin perqasqa pakakuna llaqtan kapusqa, nispa. 36Chay hinapin muyuriqniykichispi suyukuna yachanqaku ñoqa Señor Diosqa thunisqaytapas sayarichiq kasqayta, purunyasqatapas tarpuq kasqayta. Ñoqa Señor Diosqa nisqaytaqa ruwasaqpunin, nispa. 37Ñoqa Apu Señor Diosmi nillanitaq: Huk kutimantawanmi Israel runakunaq mañakusqanta uyarisaq, hinallataq paykunata askhayachisaq ovejata hinaraq. 38Thunispa purunyachisqa raqay-raqay llaqtakunan askha runawan hunt'aykusqa kanqa, Jerusalenpi fiestaman ovejakunata sacrificanapaq qatimunku chay hinaraqmi kanqa. Chay hinapin reqsiwanqaku ñoqa Señor Diosqa kasqayta, nispa.

will be added

X\