Ezequiel 34

1Señor Diosmi niwarqan: 2Qan, runaq churin, Israel michiqkuna contra profetizay, hinaspa niy, Apu Señor Diosmi nin: ¡Imaraqmi Israelpa michiqninkunamanta, paykunaqa kikillankutan michikunku! ¿Manachu michiqkunaqa ovejakunata michinanku? 3Qankunaqa ovejaq lechentan ukyankichis, millmanmantapas p'achata ruwakunkichis, allin wiranta nak'akunkichis, manataq ovejataqa michinkichischu. 4Qankunaqa manan toqti ovejatapas yanapaykunkichischu, onqosqatapas manan hampiykunkichischu, chakin p'akisqatapas manan chaqllaykunkichischu, k'itakuqtapas manan kutichimunkichischu, chinkakuqtapas manan maskhamunkichischu, aswanpas munasqaykichistan ruwarqankichis awqa sonqowan qhawarispa. 5Mana michiqniyoq kaspan ovejaykunaqa ch'eqesqa kashanku, chaytataq salqa animalkuna mikhupushan. 6Ovejaykunaqa ch'eqeriykapurqanmi hinantin orqo-orqoman, chinkapurqankutaq hinantin pachakunaman, ovejaykunataqa manan pillapas qhawarirqanchu nitaq maskhaqpas rirqanchu. 7Chay hinaqa, michiqkuna, nisqayta allinta uyariwaychis: 8Ñoqa Apu Señor Diosmi sutiyrayku juraspa nini, suwakunan, imaymana rikch'aq salqa animalkunan ovejaykunata mikhuykapusqa, mana michiqniyoq kasqankurayku. Michiqniykunaqa manan oveja maskhaq rirqankuchu, aswanpas paykunallatan michikurqanku oveja michinankutaqa. 9Chayrayku, michiqkuna, simiykunata allinta uyariwaychis: 10Ñoqa Apu Señor Diosmi michiqkunaq awqan kani, chaymi ovejaykunamanta manuchasaq. Michiq-kayninkumantan qarqopusaq, paykuna kikinkutapas manaña michikunankupaq. Paykunamantaqa qechupusaqmi ovejaykunata, ama hinalla mikhushanankupaq. 11Chay hinaqa, ñoqa Apu Señor Diosmi nini: Ñoqa kikiymi ovejaykunata maskhaspa michikapusaq. 12Imaynan michiqqa ch'eqechisqa kasqanmanta huñuykuspa ovejankunata cuidan, chay hinatan ñoqapas cuidasaq. Huk p'unchaymi yana phuyuq pakasqan kaspa hinantinman ch'eqeykurqanku, chaymantan qatikampusaq. 13Wak llaqtakunamantapas horqokampuspa huñurqospaymi kikin hallp'ankuman qatikapusaq. Israelpa orqonkunaman, mayukunaq qayllanman, llaqtakunaq qayllanmanwan qatispay michimusaq. 14Allinnin q'achutan mikhuchimusaq, Israelpa orqonpi allin q'achuq kasqanpin kanqaku, chaypiraqmi samaraykunqaku, sumaq q'achutataq mikhunqaku. 15Ñoqa kikiymi ovejaykunaq michiqnin kapusaq, ñoqapunin pusakapusaq samakunankupaq, ninmi Apu Señor Diosqa. 16Chinkasqa ovejakunatapas maskhampusaqmi, k'itakuqtapas kutichikampusaqmi, chakin p'akisqatapas chaqllaykusaqmi, onqosqatapas hampiykusaqmi. Wirankunata allininkunatataqmi nak'apusaq, ñoqan michisaq imaynatachus michinata hinapuni. 17Chay hinaqa, ovejaykuna, ñoqan nishaykichis: Ovejapurata chaninchasaq, kaqllataq anejota orqo cabratawan. 18¿Manachu wakinniykichisqa mikhuwaqchis allinnin q'achuta, chakiykichiswan puchunta sarunaykichistaqa? Ch'uya unutan ukyankichis, wakinnintataq chakiykichiswan qonchuyachinkichis. 19Hinan wakin ovejaykunaqa sarusqaykichis q'achukunata mikhushanku, qonchuyachisqaykichis unutataq ukyashanku. 20Chayraykun ñoqa Apu Señor Diosqa niykichis: Tullu ovejakunatawan wira ovejakunatawanmi juzgasaq. 21Qankunan tanqarparirqankichis tullu ovejakunata, waqraykichiswan waqraspataqmi qatirparirqankichis. 22Ñoqan ichaqa ovejaykunata waqaychasaq, manan hinallatachu suwanankuta qhawasaq. Juzgasaqpunin ovejapuratapas. 23Kamachiy Davidtan kamachikuqta churasaq, pay sapallanmi michiq kanqa, paytaqmi ovejaykunata qhawaspa michinqa. 24Ñoqa Señor Diosmi Diosninku kasaq, kamachiy Davidtaqmi qollananku kanqa. Ñoqa Señor Diosmi chayta nini. 25Paykunawanmi rimanakusaq, thak kawsayta paykunaman qonaypaq. Suyuntinmantan salqa animalkunata chinkachipusaq, mana ima llakillayoqmi ch'inneqkunapi tiyanqaku, sach'a-sach'akunapipas puñunqaku. 26Ñoqan paykunata ch'uya orqoy muyuriqpi tiyachisaq, hinaspataqmi saminchasaq, paranan mitapin saminchay parata chayachisaq. 27Mallkikunapas rurunqan, hallp'apas rurunqan, hinan paykunaqa mana ima llakillayoq kikinkuq hallp'ankupi tiyanqaku. Hap'iqninkuq makinmanta kamachi-kaymanta qespichispa horqoqtiymi, reqsiwanqaku ñoqa Señor Diosqa kasqayta. 28Wak llaqtayoqkunapas manañan paykunata wakmanta llat'ananqañachu, manallataq salqa animalkunapas mikhunqañachu. Mana ima llakillayoqmi tiyakunqaku mana piqpa manchachisqan. 29Qosaqmi allin mikhuypa wiñanan chakrakunata, manañan yarqaymanta muchunqakuchu, manataq wak suyukunapas paykunamanta asikunqakuñachu. 30Hinan reqsiwanqaku ñoqa Apu Señor Diosninkuqa paykunawan kashasqayta, Israelpas llaqtay kasqanta. 31Qankunan michinay ovejaykuna kankichis, qankunan llaqtay kankichis, ñoqataq Diosniykichis kani. Ñoqa Apu Señor Diosmi chayta nini, nispa.

will be added

X\