Ezequiel 33

1Señor Diosmi niwarqan: 2Qan, runaq churin, llaqta-masiykikunata niy: Huk suyu contra awqata apamuqtiymi, chay llaqta runakuna paykuna ukhumanta llaqta qhawaqta akllakunqa, 3hinan chay llaqta qhawaqqa awqanpa soldadonkuna qayllaykamuqta rikuspa, trompetanta tocanqa runakunaman uyarichinanpaq. 4Trompetaq waqasqanta uyarishaspa mana kasukuqtaqa awqanmi chayarqamuspa sipirqapunqa, ichaqa pay kikillanpunin wañunanpaqqa huchayoq kanqa. 5Trompeta waqaqta uyarishaspa mana kasukuqqa, pay kikillanpunin wañusqanmanta huchayoq kanqa. Uyarispa kasukuqqa manan wañunmanchu karqan. 6Chay qhawaqtaqchus llaqtanman awqanpa chayamusqanta rikushaspa, trompeta tocaywan runaman mana willanmanchu chayqa, awqaq mayqen wañuchisqanpas kikinpa huchanmantan wañunqa, ichaqa chay runaq wañusqanmantaqa qhawaqtan huchachasaq, nispa. 7Runaq churin, qantan Israel llaqta qhawaqta churarqayki. Qanmi willamusqaykunata makilla uyarinki, hinaspan Israel runakunaman nimusqaykunata willanki. 8Huk huchasapata niyman: Yaw, huchasapa, wañunkipunin, nispa, chay runamantaq mana willawaqchu huchanta saqepunanpaq chayqa, chay runaqa wañunqan kaq huchanpi. Ñoqataq ichaqa wañusqanmanta qanta huchachasqayki. 9Qantaqchus chay huchasapaman huchanta saqepunanpaq willanki, paytaq mana kasukunqachu chayqa, kikin huchallanpin wañupunqa, qantaq ichaqa mana huchachasqañachu kanki, nispa. 10Qan, runaq churin, Israel runakunata niy, qankunaqa nishankichis: Ñoqanchisqa kashanchis millay huchanchiskunaq ñit'iykusqanmi. Chayraykun kawsayninchispi t'awiykapushanchis. ¿Imaynatapunitaq kawsaytari atisun? nispa. 11Chay hinaqa niy, Apu Señor Diosmi nin: Sutiyrayku juraspan nini, manan munanichu huchasapaq wañunanta, aswanmi huchankuta saqepuspa kawsanankuta munani. Qankunapas, Israel runakuna, millay huchaykichista wikch'upuspa ñoqaman kutirikampuychis. ¿Imanaqtintaq huchaykichispiri wañuwaqchis? nispa. 12Qan, runaq churin, llaqta-masiykikunata niy: Chanin runachus huchallikunqa chayqa, ñawpaq chanin kasqanwanqa manan qespisqachu kanqa. Kaqllataqmi huk millay huchasapapas saqepunqa millay kayninta chayqa, ñawpaq millay-kayninmantaqa manan wañunqachu. Chanin runapas huchallikunqa chayqa, ñawpaq chanin-kayninqa manan valenchu kawsashanallanpaq. 13Ñoqataq niyman chanin runata: Kawsankin, nispa, paytaq chanin-kayninman hap'ipakuspa, mana allinkunata ruwapunqa chayqa, ima allin ruwasqankunapas mana valeqmi kapunqa, aswanpas wañullanqapunin mana allin ruwasqankunamantaqa. 14Huk huchasapa runatachus niyman: Cheqaqtapuni huchaykimanta wañunki, nispa, chay runataq hucha ruwayta saqepuspa allinkaqta chaninkaqtawan ruwapunman chayqa, kawsanqapunin. 15Kutichipunmantaq manumanta ima hap'isqatapas suwakusqanmantapas, kawsananpaq kamachikuy simiytapas hunt'allanmantaq, lliw huchallikuykunatapas saqepunmantaq chayqa, cheqaqtapunin mana wañunqachu. 16Allin kaqtataq chaninkaqtawan ruwapunqapas chayqa, kawsallanqapunin, ñawpaq millay hucha ruwasqankunapas manañan yuyarisqañachu kanqa. 17Chaywanpas llaqta-masiykikunaqa ninkun: Señor Diospa ruwasqankunaqa manan chaninchu, nispanku, ichaqa paykunan mana chanin ruwaqkunaqa kashanku. 18Huk chanin runataq chanin-kayta saqepuspa mana allinkunata ruwapunman chayqa, wañullanqapunin ruwasqanmantaqa. 19Huk huchasapa runataqchus millay kayninta wikch'upuspa allinkaqta chaninkaqtawan ruwapunman chayqa, kawsallanqapunin. 20Chaywanpas, Israel runakuna, qankunaqa nishallankichispunin: Señor Diospa ruwasqankunaqa manan chaninchu, nispaykichis. Ñoqataqmi qankunata ruwasqaykichisman hina juzgasqaykichis, nispa. 21Kamachi-kaypaq apachikusqaykumanta chunka iskayniyoq wataq chunka killanpa phisqakaq p'unchayninpin huk ayqekuq runa Jerusalenmanta chayamurqan, hinaspan willawarqan: ¡Jerusalenmi awqakunaq makinman urmaykun! nispa. 22Ayqekuq runaq chayamunan ñawpaq ch'isin ñoqata Señor Diosqa llamiykuwarqan. Hinan tutamanta runa chayarqamuqtinpacha upa-kayniymanta Señor Diosqa rimarichiwarqan. 23Chaymantataq Señor Diosqa niwarqan: 24Runaq churin, Israel suyuq raqay-raqayninpi tiyaq runakunan kay hinata rimakuspa purishanku: Hinaña Abrahamqa sapallan karqan chaypas, suyuntin hallp'an paypaqa karqan. Ñoqanchisqa askhamá kanchis, chay hinaqa, llapanmi ñoqanchispa, nispanku. 25Chayrayku paykunata niy, Apu Señor Diosmi nin: Qankunaqa aychatan yawarnintinta mikhunkichis, idolokunatan yupaychankichis, runakunatan wañuchinkichis. ¿Chaychu suyuntintaraq hap'ikapuyta munankichis? 26Qankunaqa maqanakuq, usqhaylla phawariq, cheqnikusqaykuna ruwaq, llapallaykichis runa-masiykichispa warminwan wasanchaqkunan kankichis. ¿Chay hina runachu suyuntinta hap'ikapuwaqchis? nispa. 27Nillaytaq: Apu Señor Diosmi nin: Sutiyrayku juraspan nini, chay raqay-raqaypi tiyaq runakunapas wañuchisqan kallanqakutaq, wak pampakunapi tiyaqkunatataqmi salqa animalkuna mikhupunqa. Qaqa wasikunapi pakakuqkunatataqmi onqoywan wañuchisaq. 28Suyutaqa llapantapunin purunyachipusaq, uma hoqarichiq kallpantapas chinkachisaqpunin. Israelpa orqonkunapas ch'inmi kapunqa, manapunin pillapas chaynin puriqqa kanqachu. 29Millay p'enqay huchallikusqanmanta kay suyuta llapanta purunyachiqtiymi, reqsiwanqaku ñoqa Señor Diosqa kasqayta, nispa. 30Nillawarqantaq: Qan, runaq churin, llaqta-masiykikunan qanmanta rimanku perqa k'uchukunapi, wasi punkukunapi. Hukmanta huktaq asikuspa ninakunku: Hamuychis, uyarisun ima willakuychá Señor Diospa kashan chayta, nispa. 31Hinaspan llaqtay hamuspa uyariq chimpaykamusunkiku, imaynan parlasqaykitaqa uyariq hamullankupuni chay hinata, ñawpaqeykipin tiyaykunku, ichaqa manan kasukunkuchu. Paykunaqa simillankuwanmi ñoqamanta sumaqta rimarinku, sonqonkuwantaq ichaqa qolqellatapuni munapakushanku. 32Paykunaqa sumaq takiqta, munay kunkawan takiqta, allin arpa tocaqta hinallan qhawarisunkiku. Rimasqaykitapas uyarinkun, ichaqa manan ruwaytapuniqa munankuchu. 33Chaywanpas lliwpunin hunt'akunqa, hunt'akuqtintaqmi yachanqaku paykuna ukhupi huk profeta kasqanta, nispa.

will be added

X\