Ezequiel 32

1Chunka iskayniyoq wataq chunka iskayniyoq killanpa qallariynin p'unchaypin Señor Diosqa niwarqan: 2Qan, runaq churin, Egipto rey Faraonman runankunamanwan kay llaki takita takipuy: Suyukunaq leonninmi kani ninkin, ichaqa qochapi cocodrilollataq kanki. Mayuykipin qhospashanki, unutapas chakiykiwanmi qonchuchashanki, phawanantapas qholluqechispa. 3Chaymi Apu Señor Diosqa nin: Askha huñusqa llaqtakunaq qayllanpin pataykiman llikayta wikch'uykamusaq, paykunataqmi chay llikaywan aysasunkiku. 4Hallp'amanmi aysarqamusqayki, chaypitaqmi pampaman wikch'upusqayki. Chaymanmi phalaq animalkunapas pataykiman chayamunqaku, llapan salqa animalkunan aychaykiwan saksaykunqaku. 5Hinantin orqokunamanmi aychaykita ch'eqechisaq, hinantin wayq'okunamanmi asnariq aychaykita hunt'achisaq. 6Yawarniykiwanmi pampataraq ch'aqchusaq, yawarniykin orqokunamanraq chayanqa, chaywantaqmi mayuq k'aktunkunapas hunt'a kanqa. 7Qanta thunirqoqtiyqa hanaq pacharaqmi tutayanqa, ch'askakunaraqmi ayphayanqa. Intitapas phuyuwanmi pakachisaq, killapas manañan sut'imunqachu. 8Qan patamanmi llapan hanaq pachapi k'anchaqkunata laqhayachimusaq, suyuykitapas pasaqtan tutayaykachisaq. Ñoqa Apu Señor Diosmi chayta nini. 9Thunikusqaykimanta willakuy mana reqsisqayki suyukunaman chayaqtinmi, askha llaqtakuna khuyayta llakikunqaku. 10Qan hawan askha llaqtakuna llaksakunqaku, reyninkupas pasaqtan q'aqchakunqaku, qayllankupi espadayta k'ancharichiqtiy. Qan urmaykuqtiykin paykunaqa wañunankumanta mancharikuspa khatatatanqaraq. 11Ñoqa Apu Señor Diosmi rey Faraonta nini: Babilonia reymi espadantin qan contra chayamunqa. 12Chay mana yupay atiy runaykikunan awqa sonqo allin qhari runakunaq k'irisqan wañunqa. Egiptoq uma hoqariynintan chinkachipunqa, mana yupay atiy runaykikunatapas p'uchukachipunqa. 13Sapanka mayuykipi ukyaq llapan uywakunatan tukupusaq, manañataqmi hayk'aqpas runapas uywapas sarusqankuwan qonchuyachimunqañachu. 14Hinan unuqa ch'uyayanqa, mayupas ima sumaqta suchunqa. Ñoqa Apu Señor Diosmi chayta nini. 15Egipto suyuta ch'usaqman tukuchiqtiymi, suyuntin ch'usaq mana runayoq kaqtinmi, ñoqa Señor Dios kasqayta reqsiwanqaku. 16Chayqa wañuqpaq takina harawin, ahinatataqmi Egipto suyumanta runankunamantawan waqakuspa askha suyu warmikuna takinqaku. Ñoqa Apu Señor Diosmi chayta nini, nispa. 17Chunka iskayniyoq wataq qallariy killanpa chunka phisqayoq p'unchayninpin Señor Diosqa niwarqan: 18Qan, runaq churin, Egipto suyuq askha runankunamanta harawiy. Wañuy-pachaman paykunata kachapuy, wakin allichachaq suyukunaq runankunatawan wañuqkunaq kasqanman kachapuy. 19Paykunata niy: ¿Qankunari wakinkunamanta aswan sumaqchu kankichis? Uraykuychis siriykuychis mana iñiqkunawan kuskapacha, nispayki. 20Paykunapas awqa-tinkuypi wañuqkunawan kuskan urmaykunqaku. Espadaqa makillapiñan kashan paykunata wañuchinanpaq. Payqa runankunapiwanmi aysarparisqa kanqa. 21Wañuy-pachapi kaq allin atiyniyoq umallikunan Egipto runakunamanta yanapaqninkunamantawan ninqaku: ¡Uraykarqamusqakuñan chay awqa-tinkuypi mana iñiqkunawan kuska chutarayanankupaq! nispanku. 22Chaypin Asiriapas kashan, muyuriqninpitaq soldadonkuna p'ampasqapas chuta-chutalla kashan. Llapan paykunaqa awqa-tinkuypin wañurqanku. 23Kawsashaspaqa chay soldadonkunapas pasaqtan wak suyukunata llaksarqan, ichaqa paykunapas wañupullarqankutaqmi, kunantaq aswan ukhu t'oqopi p'ampaykusqa Asiriaq muyuriqninpi chuta-chutalla kashanku. 24Chay hinallataqmi Elampas kashan, muyuriqninpitaq llapan soldadonkuna p'ampasqapas chuta-chutalla kashanku. Paykunapas awqa-tinkuyllapitaqmi wañurqanku, mana iñiq kaspankun Wañuy-pachaman uraykapurqanku. Kawsashaspaqa q'aqchakuqmi karqanku, kunantaq ichaqa aya p'ampanapi ima p'enqayraq kapushanku. 25Elamqa wikch'urayashan llapan wañuq soldadonkuna ukhupin. Llapan paykuna mana iñiyniyoqqa awqa-tinkuypin wañurqanku, kunanqa aya p'ampanapin chuta-chutalla kapushanku. Kawsashaspaqa paykunapas q'aqchakuqmi karqanku, kunantaq aya p'ampanapi wañuchisqa runakunawan kuska ima p'enqayraq kapushanku. 26Chhaynallataqmi Mesecpas Tubalpas llapan soldadokunaq chawpinpi wikch'urayashan. Llapan chaykunaqa mana iñiqkaman karqanku, kawsashaspaqa lliwtan llaksarqanku, chayraykun paykunaqa awqa-tinkuypi wañupurqanku. 27Paykunaqa manan llaqtanrayku ñawpa wañuqkuna hina p'ampasqachu karqanku. Llaqtanrayku ñawpa wañuqkunaqa p'ampasqa kasqaku llapa maqanantin, espadallan sawnaykusqa, escudollanwan qataykusqa. Kawsashaspaqa paykunapas lliw suyukunatan llaksasqaku. 28Qanpas, rey Faraón, mana iñiqkunawan kuskan wañuchisqa kanki, awqa-tinkuypi wañuqkunawan kuskan chutarayanki. 29Edompas hina atiyniyoqpachan chaypi kashan reyninkunantin kamachikuqninkunantin. Awqa-tinkuypi wañuqkunawan kuska, mana iñiqkunawan p'ampaykusqa kashanku. 30Chayllapitaqmi kashan llapan wichay lado suyukunaq umallinkunapas Sidón llaqta runakunapas. Atiyniyoqmi karqanku, lliwtan llaksarqanku, kunantaq awqa-tinkuypi wañuqkunawan kuska p'ampasqa ima p'enqayraq kapushan. Mana iñiyniyoqmi karqanku, awqa-tinkuypi wañuqkunawan kuskataq chutarayapushanku, wañuqkunawan kuska ima p'enqayraq. 31Rey Faraonmi llapan runankunapiwan chay wañuqkunata rikunqa, hinan rey Faraonqa llapan runakunaq wañusqanmanta sonqochakunqa. Ninmi Señor Diosqa. 32Faraonwanmi lliw suyukunata q'aqchachirqani, chaywanpas mana iñiqkunaq chawpinpin awqa-tinkuypi wañuqkunawan kuska chutarayashan, hinallataq mana yupay atiy soldadonkunapas. Ñoqa Apu Señor Diosmi chayta nini, nispa.

will be added

X\