Ezequiel 31

1Chunka hukniyoq wataq chunka kinsayoq killanpa qallariy p'unchayninpin Señor Diosqa niwarqan: 2Qan, runaq churin, Egipto rey Faraonta llapan runankunatawan niy: ¿Hatun kayniykiqa imamantaq rikch'akunman? Qhawariy Asiria suyuta: 3Rikch'akunmi ciprés mallkiman, huk niypitaq Líbano cedroman, mallki-mallkitan sumaq k'allmanwan llanthushan, hatun-kayninpas phuyumanraq aypashan. 4Paytaqa unun wiñananpaq yanaparqan, pukyumanta unukunan wiñachirqan, muyuriqninpin mayu hinaraq puririrqan, puririspataq campo mallkikunatapas qarparqan. 5Askha unuq kasqanraykun mallki-mallkipi mallkimanta aswanta wiñarqan, k'allmankunan yapakuspa phanchirirqan. 6Imaymana rikch'aq urpikunan k'allmankunapi q'esachakurqan, llapan salqa animalkunapas paypa llanthunpin miraykurqan, llapa hatun suyukunan llanthuyninpi tiyarqanku. 7Ancha sumaq hatun mallkin karqan phanchirisqa hatuchachaq k'allmakunayoq, saphinkunapas hallp'a ukhu unumanraqmi ayparqan. 8Diospa huertanpi cedropas manan pay sayayqa karqanchu, manan mayqen pinopas pay hina k'allmayoqqa karqanchu, manan mayqen plátano mallkipas pay hina k'allmayoqqa karqanchu, Diospa huertanpi mayqen mallkipas manan munay-kayninpi rikch'akurqanchu. 9Ñoqan sumaqyachirqani askha k'allmakunawan, Diospa huertanpi mallkikunapas llapanmi envidiakurqanku, nispa. 10Chayraykun Apu Señor Diosqa nin: Mallkitaq wiñarqan ñawinpas phuyuman aypanankamaraq, sinchita wiñaspataq umata hoqarirqan. 11Chayraykun ñoqaqa wikch'uspa, hinata hap'iykachirqani wak atiyniyoq suyukunaq umallinman, chay umallin mallkita muchuchirqan millay kasqanman hina. 12Awqa sonqo wak llaqtayoqkunataq wit'urqospa wikch'usqata saqepurqan. K'allmankunan hinantin orqo-orqoman wayq'okunamanwan urmaykurqan, suyuntin k'aktukunapin p'akikurqan. Hinan llanthunpi tiyaq llapan suyukunaqa payta wikch'uspa ayqerikapurqanku. 13Kumpasqa mallkimanqa imaymana rikch'aq urpikunan tiyakuq hamurqanku, kaqllataq salqa animalkunapas k'allmanpi siriykurqanku. 14Chaymi kunanmantaqa manaña mayqen mallkipas unu patapiña kashaspapas chay sayaytapuniqa wiñanqañachu, hinaña allin qarpasqa kanqa chaypas manapunin ñawinqa phuyukamaraq taripanqañachu, chay hina sayayniyoq kanankamaqa. Llapanmi huchachasqa wañunanpaq kashan, Ukhu-pachaman haykuspa wañuqkunaman huñukuspa aya p'ampanapi kanankupaq. 15Apu Señor Diosmi nillantaq: Hatun mallki kumpakuspa Ukhu-pachaman haykuqtinmi, hallp'a ukhu unupas llakikuymanta lutokurqan, mayutapas phawaq unutapas kasqanpin sayachirqani. Ñoqan Líbano orqotapas tutayachirqani, hinan llapan sach'akunapas naq'epurqan. 16Wañusqakunaq kasqanman wañuqkunawan huñukuq haykupuqtinmi, kumpakusqanpa raqhaqaqayninqa suyukunataraq kuyurichirqan. Hinan chay hallp'aq ukhunpiña kashaq Edenmanta mallkikuna Libanomanta sumaq qarpasqa allinnin mallkikunapas paypa urmasqanmanta kusikurqanku. 17Chay mallkiq llanthunpi tiyaqkunapas paypa yanapaqninkunapas haykupullarqankutaqmi paywan kuska, ñawpaq awqa-tinkuypi wañupuqkunawan huñuykukuq. 18Edenpi mallkikunamantaqa manan mayqenpas pay hina karqanchu sumaq kayninpipas sayayninpipas, chaywanpas wakin mallkikuna hinan chinkaykurqan chay Ukhu-pachaman, mana iñiyniyoq runakunaq kasqanman, hinallataq awqa-tinkuypi wañuqkunaq kasqanman. Chay mallki, rey Faraonqa llapan runankunapiwanmi wañunqa. Ñoqa Apu Señor Diosmi chayta nini, nispa.

will be added

X\