1 Señor Diosmi niwarqan: 2 Qan, runaq churin, profetizaspa niy, Apu Señor Diosmi nin: Khuyayta qaparispa niy: ¡Ay, Señor Diospa muchuchinan p'unchaymanta! nispayki. 3 Chay p'unchaymi qayllaykamushanña, yana phuyuq hunt'aykusqan p'unchay, suyukunaqpas mancharikunan p'unchay. 4 Egipto contran awqa-tinkuy kanqa, chaypiqa askhatan wañuchinqaku, qhapaq kayninkutan suwanqaku, Egiptotaqa teqsinmantan thuninqaku. Etiopía suyuqa llakikuy p'unchaypin rikukunqa. 5 Egipto runakunawan kuskan espadawan wañuchisqa kanqaku: Etiopía suyu runakuna, Libia suyu runakuna, Lidia suyu runakuna, Arabia suyu runakuna, Cub suyu runakuna, Egiptowan rimanakuq wakin suyukunapas, nispa. 6 Apu Señor Diosmi nillantaq: Egipto yanapaqkunaqa espadawanmi wañuchisqa kanqaku, wichay ladopi Migdol llaqtamanta uray ladopi Asuán llaqtakaman llapankupuni wañunqaku. Egiptoq alabakusqan atiyninqa huch'uyyachisqan qhepakunqa. Ñoqa Apu Señor Diosmi chayta nini. 7 Egipto suyun llapan suyumanta aswan purunyachisqa kanqa, llaqtankunapas raqay-raqaypin rikukunqa. 8 Egipto suyuta kanaykuqtiymi, yanapaqnin suyukunapas atipasqa rikukuqtinmi, ñoqa Señor Diosqa kasqayta reqsiwanqaku. 9 Egiptoq muchuchisqan kanan p'unchay chayamuqtinmi, ñoqamanta willaqkunata barcopi kachasaq, Etiopía suyupi llakhi kashaq runakunata mancharichinanpaq, chaymi llaksakunqaku. ¡Chay p'unchaymi qayllaykamushanña! nispa. 10 Apu Señor Diosmi nillantaq: Babilonia rey Nabucodonosorwanmi Egipto suyuq aqo t'iyu runanta ch'usaqyachisaq. 11 Paymi hamunqa millay awqa sonqo soldadokunantin suyuta thuninankupaq. Egiptomanmi espadantinkama phawaykunqaku, hinaspan ayakunawan hunt'aykusqata suyuta wikch'unqaku. 12 Nilo mayutapas ch'akichisaqmi, hinaspan suyuntinta millay runakunaq makinman hap'iykachisaq, chay wak llaqtayoqkunawanmi purun raqay-raqayman suyuntinta tukuchisaq, lliw imakunachus chaypi kaqkunatawan. Ñoqa Señor Diosmi chayta nini. 13 Apu Señor Diosmi nillantaq: Menfis llaqtaq wak'a diosninkunatan thunisaq, yanqa idolonkunatapas tukupusaq. Egiptoqpas kamachiqnin manan pipas kapunqachu, suyuntinpi runakunatan llaksasaq. 14 Egipto suyuq uray ladon Patrostan raqay-raqayman tukuchisaq, Zoán llaqtatan ninawan kanaykusaq, Tebas llaqtatataqmi ñak'arichisaq. 15 Egipto runakunaq hap'ipakunan allin perqasqa Sin llaqtamanmi phiñakuyniyta chayachisaq, hinallataq Tebaspa aqo t'iyu runantapas chinkachisaq. 16 Egipto suyutaqa ninawanmi kanaykusaq, Sin llaqtapas nanaymantan q'ewiykachakunqa, Tebaspa perqankunatan wamphurqarimunqaku, Menfis llaqtapas llakisqallapunin kashanqa. 17 On llaqtaq waynankunan, Bubastis llaqtaq waynankunan awqa-tinkuypi wañunqaku, wakin runakunatataq kamachi-kaypaq apapunqaku. 18 Egiptoq munaychakuyninta thunispa alabakusqan atiyninta chinkachiqtiymi, Tafnes llaqtata intiraq tutayanqa, Egiptotataq yana phuyuraq p'ampanqa, llaqtanpi runakunatataq kamachi-kaypaq apapunqaku. 19 Chay hinatan Egipto suyuta muchuchisaq, hinan reqsiwanqaku ñoqa Señor Diosqa kasqayta, nispa. 20 Chunka hukniyoq wataq qallariy killanpa qanchis p'unchayninpin Señor Diosqa niwarqan: 21 Qan, runaq churin, uyariway, Egipto rey Faraonpa rikrantaqa ñoqan p'akirqani, chaytataqmi mana pipas hampiykurqanchu, manallataq wataykurqankupaschu, qhaliyaspa espadanta hap'inanpaq. 22 Chayraykun ñoqa Apu Señor Diosqa nini: Egipto rey Faraonpa awqanmi kani. Chaymi iskaynin rikranta p'akisaq, allin kaqtawan p'akisqaña kaqtawan, espadata mana hap'iyta atinanpaq. 23 Egipto runakunatataqmi hinantin suyukunaman ch'eqeykachisaq, hinallataq llapan suyukunaman wisñiykusaq. 24 Hinaspan Babilonia reyta kallpachaspa makinman espadayta hap'iykachisaq, rey Faraonpatataq rikranta p'akipusaq, hinan payqa Nabucodonosorpa ñawpaqenpi k'irisqa wañunayashaq runa hina qaparinqa. 25 Babilonia reytaqa kallpachasaqmi, rey Faraonmantataqmi kallpanta qechupusaq. Babilonia reypa makinman espadayta hap'iykachiqtiymi, payqa Egipto contra sayarinqa, reqsiwanqakutaqmi ñoqa Señor Diosqa kasqayta. 26 Egipto runakunataqa llaqtakunaman suyukunamanwanmi ch'eqeykachisaq, hinan paykunaqa reqsiwanqaku ñoqa Señor Diosqa kasqayta, nispa.
