Ezequiel 3

1Niwarqantaq: Qan, runaq churin, kay qelqa k'uyuta mikhuy, hinaspa phaway Israel runakunata rimapayaq, nispa. 2Hinan ñoqaqa simiyta hanllarirqani, paytaq qelqa k'uyuta mikhunaypaq qowarqan. 3Chaymantataq niwarqan: Kay qelqa qosqayta mikhuspa saksaykuy, nispa. Mikhuykuqtiytaq sumaq kasqa miel misk'i hina añakallaña. 4Chaymantataq niwarqan: Qan, runaq churin, ¡phaway! Israel llaqtaman imatachus ñoqaq “paykunaman niy” munasqayta willamuy. 5Manan qantaqa kachasqayki mana yachasqa sasa rimay rimaq llaqtamanchu, aswanpas Israel llaqtallamanmi. 6Manallataqmi qanpa mana yachasqayki sasa rimaykunata rimaq askha suyukunamanpaschu kachasqayki. Chay llaqtakunaman kachaqtiypas chaykunaqa uyarisunkipunin. 7Israel llaqtaymi ichaqa manapuni uyariytapas munasunkichu, mana ñoqata kasuyta munawasqankurayku. Llapanmi Israel llaqtaqa mana kasukuq k'ullukuna kanku. 8Ñoqataqmi qanta ruwasqayki paykuna hina k'ulluta mana nanachikunaykipaq. 9Qespi rumita hinan ch'ilata ruwasqayki, qaqamantapas aswan ch'ilataraq. Paykunataqa amapunin manchakunkichu, millay mana kasukuq uyantinña kashaqtinkupas, nispa. 10Chaymantapas nillawarqantaq: Qan, runaq churin, allintapuni uyariy lliw ima nisqaytapas, allinta hap'iy sonqoykipi. 11Hinaspataq riy kamachi-kaypi kashaq llaqta-masiykikunaman, hinaspa nimuy: Ahinatan nin Apu Señor Diosqa, nispayki, uyarichunkupas amapas, nispa. 12Hinan Diospa Espiritun hoqariwarqan, qhepaypitaq uyarirqani manchay raphapapayta: “Señor Diospa lliphlli-kayninta hanaq pachapi yupaychaychis”, nispa nishaqta. 13Chay raphapapaytaqa kawsashaqkunaq raphrankunan ruwasqa paykunapura waqtanakuspan, hinallataq paykunawan kaq ruedakunapas. Chay raphapapaytaq karqan pacha kuyuy hinaraq. 14Diospa Espirituntaq chaymanta horqorqowaspa aparikuwarqan, ñoqataq kasharqani khuyaytaq phiñasqataq, Señor Diostaq ichaqa qaqatapuni makinwan hap'ishawarqan. 15Hinan chayarqani Quebar mayu patapi Tel-Abibman. Chaypin kamachi-kaypaq apasqa Israel runakuna tiyasharqanku, ñoqataq paykunawan qanchis p'unchayta tiyaykuspa, mana imata ruwaspa musphasharqani. 16Qanchis p'unchay qhepatataq Señor Diosqa niwarqan: 17Qan, runaq churin, Israel llaqta qhawaqtan churayki. Chay hinaqa allinta uyariway, ñoqaq sutiypitaq anyay, nispa. 18Huk huchayoq runata: Wañunkipunin, nishaqtiy mana willankichu manataq rimapayallankipaschu: Huchallapi kawsayniykita saqepuy kawsanaykipaq, nispa chayqa, huchan hawan payqa wañupunqa, ñoqataq qanmanta cuentata mañasqayki chay runaq wañusqanmanta. 19Qantaqchus huchasapata anyanki chayqa, paypuni millay ruwayninta huchallikuynintapas mana saqenqachu chayqa, huchan hawan wañupunqa, qantaqmi ichaqa qespikunki. 20Huk chanin runa chanin kayninta saqepuspa mana chaninta ruwanman, ñoqataq chay runaq urmananpaq hina pruebata churayman, qantaq mana payta: Paqtataq wañuwaq, nispa niwaqchu chayqa, chay runan huchan hawa wañupunqa, ichaqa wañusqanmantan cuentata mañasqayki. 21Qantaqchus chay chanin runata niykuwaq ama huchallikunanpaq, paypas manataq huchallikunmanchu chayqa, kawsanqapunin, willasqata kasukusqanrayku, qanpas kawsayniykita qespichikunkin, nispa. 22Chaymantataq Señor Diosqa llamiykuwaspa niwarqan: Sayarispa riy haqay pampaman, chaypin rimapayasqayki, nispa. 23Ñoqataq pampaman puririrqani, chaypitaq Señor Diospa lliphlli-kayninta rikumurqani, Quebar mayu patapi rikusqayta hina. Uyanpamantataq wikch'ukurqani, 24Diospa Espirituntaq ichaqa ñoqaman haykuykuwaspa sayarichiwarqan. Niwarqantaq: Riy wasiykita hinaspa wisq'akamuy. 25Qan, runaq churintaqa watanakunawanmi wataykusunkiku, chay hinapin llaqtaman mana lloqsiyta atinkichu, manañataq paykunawanpas kayta atinkichu. 26Chaymantapas ñoqan qalluykita simiykiman k'askarqachisaq upayapunaykipaq, manataq paykunata anyayta atinkichu millay mana kasukuq uyantin kaqtinkupas. 27Ñoqa rimaykuqtiymi simiykiqa kicharikapunqa, hinan paykunata ninki: Ahinatan Apu Señor Diosqa nin, nispa, pipas uyariyta munan chayqa uyarichun, mana uyariyta munaqqa amapas uyarichunchu, mana kasukuq llaqta kasqankurayku, nispa.

will be added

X\