Ezequiel 29

1Chunka wataq chunka killanpa chunka iskayniyoq p'unchayninpin Señor Diosqa niwarqan: 2Qan, runaq churin, Egipto rey Faraonman kutirispa pay contra llapan Egipto suyu runakuna contrapiwan niy, 3Apu Señor Diosmi nin: Egipto suyu rey Faraón, qanmi kanki hatun cocodrilo hina mayuykikunapi wikch'urayaq. Qanmi ninki: Nilo mayuqa ñoqaqmi, ñoqapaqpunin ruwakurqani, nispayki. Kunantaqmi ñoqa awqayki kani. 4Qhaqlliykimantan ganchowan aysasqayki, mayuykikunapi challwakunatan sarphaykiman k'askachimuspa, llapan challwakuna sarphaykipi warkuykusqata horqosqayki. 5Ch'inneqmanmi wikch'urparisqayki mayuykikunapi llapan challwatawan. Hinan q'ala pampaman urmaykunki, manataqmi pipas hoqarisunkichu p'ampanasuykipaq. Salqa animalkunan mikhusunki, alton phalaq ankakunan t'aphsasunki. 6Egiptopi llapan runakunan reqsiwanqaku ñoqa Señor Diosqa kasqayta. Israel llaqtan hap'ipaykukuyta munarqasunki, ichaqa soqos hinallan kasqanki. 7K'iraykukuspa qanman tawnaykukuqtinkun qanqa p'akikuspa waqtannintaraq allarqanki. Qanman hap'ipaykukuyta munaqtinkun p'akikuspa wasantaraq k'irirqanki. 8Chayraykun ñoqa Apu Señor Diosqa nini: Contraykipin espadantinwan phawaykachisqayki, hinaspan runaykikunatapas uywaykikunatapas lliwta wañuchisaq. 9Yanqa ch'inniqmanmi tukuchisqayki, hinan runaykikuna reqsiwanqaku ñoqa Señor Diosqa kasqayta. Qantaq nirqanki: Nilo mayuqa ñoqaqmi, ñoqaq ruwakusqaymi, nispayki. 10Chayraykun ñoqaqa kunan qan contra mayuykikuna contrapiwan kapuni, chaymi kunan mancharikuy ch'inneq mana runayoq yanqa purunman tukuchisqayki wichay qorpa Migdol llaqtamanta Etiopía suyu qorpapi Asuán llaqtakamaraq. 11Runapas uywakunapas chaynintaqa manan purinqachu, manataqmi pipas tawa chunka watantin chaypi tiyanqachu. 12Yaw, Egipto, qantan tukuchisqayki yanqa purun suyuman. Tawa chunka watantinmi lliw llaqtaykikuna purunyasqa kanqa, wakin llaqtakunamantapas aswan raqay-raqayraq, runaykikunatataqmi ch'eqerparichispa wak llaqtakunaman suyukunamanwan aparparichisaq. 13Chaywanpas ñoqa Apu Señor Diosmi nini: Tawa chunka wata qhepataqa Egipto runakunata kaqtan huñuykapusaq, may suyukunapichus ch'eqechisqa kasqankumanta. 14Kamachi-kaypi kashaq Egipto runakunatan kutichimpusaq paqarisqanku Egipto suyuq uray ladon Patrosman. Chaypin huk suyuta hatarichikunqaku, manañataq kallpayoqchu kanqa. 15Llapan suyukunamanta aswan sullk'a suyun kapunqa, manataqmi hayk'aqpas wakin suyukunamanta aswan allinqa kanqañachu. Wakin llaqtakunata mana kamachinanpaqmi Egiptotaqa huch'uy llaqtallata ruwasaq. 16Israel llaqtapas manañataqmi Egipto suyumanqa hap'ipakunqañachu, aswanmi Egipto suyuq thunikusqanqa Israel runakunata yuyarichinqa Egiptopi hap'ipakuspa huchallikusqankuta. Hinan reqsiwanqaku ñoqa Apu Señor Diosqa kasqayta, nispa. 17Iskay chunka qanchisniyoq wataq qallariy killanpa ñawpaqkaq p'unchayninpin Señor Diosqa niwarqan: 18Qan, runaq churin, uyariway. Babilonia rey Nabucodonosormi soldadonkunata sinchitapuni maqanachirqan Tiro llaqta contra umankupas p'aqlayanankamaraq, rikrankupas llulluyanankamaraq. Chaywanpas manan paypas soldadonkunapas imatapas chaskirqankuchu, Tiro llaqta contra maqanakuspanku. 19Chayraykun ñoqa Apu Señor Diosqa nini: Rey Nabucodonosormanmi Egipto suyuta qosaq, paytaqmi lliw qhapaq kayninta apakapunqa. Lliw suyuntintan llat'ananqa, chaywantaqmi soldadonkunaman maqanakusqanmanta pagapunqa. 20Nabucodonosorwanmi Egiptota munaychachisaq Tiro llaqta contra maqanakusqanmanta qopuspay, paymi soldadonkunapiwan ñoqapaq llank'apuwarqanku. Ñoqa Apu Señor Diosmi chayta nini. 21Chay p'unchaymi Israel llaqtaq kallpan t'ikarinqa, hinan qan Ezequielqa sut'itapuni paykunaman rimarinki. Chaymantan paykunaqa reqsiwanqaku ñoqa Señor Dios kasqayta, nispa.

will be added

X\