Ezequiel 28

1Señor Diosmi niwarqan: 2Qan, runaq churin, Tiro llaqta reyta niy, Apu Señor Diosmi nin: Sinchi uma hoqariq kaspaykin, “diosñan kani” ninki, lamar-qochaq chawpinpi huk diospa tiyananpi tiyaspayki. Hinaña yachaysapa kaspa diosman tukunki chaypas, qanqa runallan kanki, manan dioschu. 3¿Danielmanta aswan yachaysapachu kanki? ¿Lliw imaymana yachaqchu kanki? 4Yachayniyoq kayniykiwan, yuyayniyoq kayniykipiwanmi sinchitapuni qhapaqyarqanki, qori-qolqeykitapas k'ullu cajamanmi hunt'aykachirqanki. 5Qhatuypaq kusallaña kasqaykiwanmi qhapaq kayniykita yapaykukurqanki, qhapaq kayniykitaqmi umata hoqarichirqasunki. 6Chayraykun ñoqa Apu Señor Diosqa nini: Yachaysapa kasqaykiwan diosman tukunki chayqa, 7wak llaqtayoqkunatan contraykipi pusamusaq, sinchi yana alma runakunatan kachamusaq, hina sumaq yachayniyoqtapacha espadanwan wañuchinasuykipaq, k'acha kayniykipas pampatan phawanqa. 8Manchay ukhumanmi chinkaykachisunki, qochaq millp'usqanmi qonqaylla wañupunki. 9¿Qanta wañuchiy munaqkunaq qayllanpipas: Ñoqaqa diosmi kani, niwaqchu? Wañuchiqniykikunaq qayllanpiqa, yanqa runallan kanki, manan dioschu. 10Wak llaqtayoqkunaq makinpin wañunki, imaynan mana iñiqkuna wañunku hinata. Ñoqa Apu Señor Diosmi chayta nini, nispa. 11Señor Diosmi niwarqan: 12Qan, runaq churin, Tiro llaqta reymanta kay harawita takispa niy, Apu Señor Diosmi nin: Kawsayniykipin rikukurqan lliw imapas k'apakkama, yachaywan hunt'aykusqa, ima sumaq k'achallañan karqanki. 13Diospa huertan Edén ukhupin tiyakurqanki, imaymana rikch'aq umiña rumikunawan k'achanchasqa p'achayoqmi karqanki, puka umiñawan, q'ellu umiñawan, ch'ila-qespi umiñawan, q'omer umiñawan, yanayoq-yuraq umiñawan, yana-puka umiñawan, anqas umiñawan, siwar umiñawan, nina-q'ellu qespi umiñapiwan. K'achanchakunaykiqa qorimantan karqan, kamasqa kasqayki p'unchaymantañan chaykunaqa ruwasqa karqan. 14Manchakuna querubinta hinan qanta churarqayki qhawanaykipaq, Diospa ch'uya orqonpin kasharqanki, chhipipiq rumikuna chawpipin puriykacharqanki. 15Ruwayniykikunapas allinmi karqan kamasqa kasqayki p'unchaymantapacha mana chanin hucha ruwasqayki p'unchaykama. 16Ancha askha qhatunayki hawan waq'a sonqoman tukurqanki, hinaspa huchallikurqanki. Chaymi ch'uya orqoymanta wikch'upurqayki, waqaychaq querubín, chhipipiq rumikuna chawpimantan wikch'umpurqayki. 17Munayllaña rikch'ayniykiwanmi umata hoqarirqanki, mentasqa-kayta munaspan yachayniykita waqllichirqanki. Chaymi ñoqaqa pampaman wikch'umpurqayki, reykunaq ñawpaqenpipas p'enqay asipayanamanmi tukuchirqayki. 18Askhatan huchallikurqanki, qhatusqaykipin runakunamanta suwakurqanki, chay hinapin yupaychana wasiykikunata qhellichakurqanki. Chaymi ninawan llaqtaykita pasaqta ruphachipurqani, kunanqa lliwmi usphaman tukusqata pampapi rikusunkiku. 19Reqsiqniyki lliw suyukunan qanta rikuspa llaksakunqaku, millay mancharikuymanmi tukupunki, wiñaypaqmi qanqa chinkapunki, nispa. 20Señor Diosmi niwarqan: 21Qan, runaq churin, Sidón llaqtaman kutirispa contranpi niy, 22Apu Señor Diosmi nin: Sidón llaqta, ñoqan awqayki kapuni, qanta chinkachispaymi hatunchasqa kasaq. Runaykita muchuchispaymi, ch'uya kayniyta rikuchikuqtiymi, ñoqapuni Señor Diosqa kasqayta reqsiwanqaku. 23Onqoykunawanmi kachaykusqayki, calleykikunatapas yawar unun puririnqa. Runaykikunapas wañusqan urmaykapunqa llapa ladomanta phawaykuspa espadawan wañuchisqan kanqa. Chaypin reqsiwanqaku ñoqa Señor Diosqa kasqayta, nispa. 24Señor Diosmi niwarqan: Israelpa qorpanpin pisichaqnin llaqtakuna karqan, khiskawan allaspa nanachiqnin hina, chaykunaqa manan kapunqakuñachu. Hinan ñoqa Señor Dios kasqayta reqsiwanqaku, nispa. 25Apu Señor Diosmi nillawarqantaq: Ñoqan Israel runakunata hinantin llaqtapi ch'eqechisqamanta huñumusaq, chay hinapin ch'uya-kayniyta lliw suyukunaman rikuchisaq. Kamachiy Jacobman qosqay suyupipunin Israel runakunaqa tiyakapunqaku. 26Chaypin mana ima llakillayoq tiyakapunqaku, wasikunatapas hatarichikunqaku, uvas chakrakunatapas llank'akunqaku. Ñoqataqmi Israel llaqtaq llapan pisichaqnin llaqtakunata muchuchisaq, chay hinapin Diosninku Señor Dios kasqayta yachanqaku, nispa.

will be added

X\