Ezequiel 26

1Chunka hukniyoq wataq ñawpaqkaq killanpa qallariynin p'unchaymi Señor Diosqa niwarqan: 2Qan, runaq churin, uyariway, Tiro llaqta runakunan Jerusalenmanta nirqanku: ¡Waleq! ¡Jerusalenqa thunisqan kapushan! Llapa llaqtakunaq punkunmi karqan. Jerusalenqa purunyachisqañan kapushan, kunanqa ñoqañataqmi qhapaqyapusaq, nispa. 3Chayraykun ñoqa Apu Señor Diosqa nini: Yaw, Tiro llaqta, qanpa awqaykin kani, askha suyukunatan qan contra kachamusaq lamar-qochaq phoqchiqeyninta hinaraq. 4Perqaykikunatan thuninqaku, torreykikunatan kumpanqaku. Hallp'aykitapas lliwtan pichachisaq, llusk'a qaqallatañan saqesqayki. 5Lamar-qocha ukhupin qhepakunki llika ch'akichina qaqa hinan kanki, ñoqa Apu Señor Diosmi chayta nini. Qan Tiro llaqtan suyukunaq llat'anasqan kanki, 6lamar-qocha pata hallp'api tiyaq runaykikunan espadaq ñawch'inpi wañunqaku. Chay hinapin reqsiwanki ñoqa Señor Diosqa kasqayta, nispa. 7Ñoqa Apu Señor Diosmi nillanitaq: Yaw, Tiro llaqta, wichay ladomantan qan contra Babilonia rey Nabucodonosorta apamusaq. Chay sinchi munayniyoq reytan pusamusaq, caballokunayoqta, carretakunayoqta, allin sillakuy yachaq soldadokunayoqta askha runakunayoqta ima. 8Espadawanmi wañurqarichinqa lamar-qocha pata hallp'api tiyaq runaykikunata, muyuriqniykipin mana pipas ayqenanpaq hark'achita ruwanqa, hallp'a montosqa seqanatan perqa muyuriqniykipi ruwanqa. Escudowan pakasqa soldadokunan qan contra phawaykamunqaku. 9Perqa thunina carretakunawanmi perqaykita takanqa, Torreykikunatan q'asushaspalla thuninqaku. 10Perqa q'asanta phawaykuq soldado hina Babilonia rey punkuykita haykumuqtinmi, caballoq aysasqan llapan carretakunaq phawasqanwan perqakunaraq chhaphchikunqa. Askha caballonkunaq hallp'a q'osñichisqanwanmi p'ampasunkiraq, 11caballonkunaq phapatunkunan calleykikunata t'ustunqa. Paymi runaykita espadawan wañuchinqa, wasi tanqaq tusaykikunatan thunirqarinqa. 12Qhapaq kayniykikunatan llat'anasunkiku, qhatunaykikunatan suwaykusunkiku. Perqaykikunatan thuniykunqaku, sumaq wasiykikunatan lliwta kumpaykunqaku. Rumiykikunata, kurkuykikunatapas, llapa thunisqa kaqtapas, lamar-qochamanmi wikch'uykunqaku. 13Chay hinapin takisqaykita ch'inyachisaq manañataqmi arpaykiq waqasqanpas uyarikunqachu. 14Llusk'a qaqamanmi tukuchisqayki, lamar-qocha ukhupi llika ch'akichina qaqaman. Manataq hayk'aqpas sayarinkiñachu. Ñoqa Apu Señor Diosmi chayta nini, nispan nin, Señor Diosqa. 15Ñoqa Apu Señor Diosmi Tiro llaqtamanta nillanitaq: Qan thunisqa rikukuqtiyki, k'irisqakuna nanaymanta qapariqtinkun, runaykikuna wañuraqtinkun, lamar-qocha muyuriq pata suyukunapi tiyaqkuna khatatatanqaku. 16Chay suyukunaq reyninkunan kamachikuy tiyanankumanta uraykunqaku, hinaspan capankuta sumaq k'achanchasqa p'achankutapas ch'utikunqaku. Qanta rikuspataq llaksasqa q'aqchasqaraq pampapi tiyanqaku khatatatakuspallaña. 17Hinaspan kay llaki harawita takipusunkiku: ¡Ay, ikiraqmi thunisqa kashanki! ¡Ay, imaraqmi qochamanta ch'usaqyarqapunki, lliwpa reqsisqan llaqta! Qanqa runakunantinmi lamar-qochapi munayniyoq karqanki, qanqa lamar-qocha muyuriqpi suyukunatan q'aqcharqanki. 18Kunan urmaykapuqtiykin, lamar-qocha muyuriqpi suyukuna manchakuymanta khatatatanku. Kunan ch'usaq tukurqapuqtiykin, lamar-qochapi islakuna llaksakunku, nispa. 19Ñoqa Apu Señor Diosmi nini: Runaq mana tiyananta hinan raqay-raqay kanaykikama thunisqayki. Lamar-qochawanmi millp'uchisqayki, 20hinaspan chinkaykachisunki wañuqkunaq kasqankamaraq, ñawpa runakunaq kasqanman. Wiñaypaq raqay-raqay kaq ukhumanmi wikch'uykusqayki, wañupuqkunawan kuskan kapunki. Chaymantaqa manapuniñan kutimunkiñachu, manataqmi wakmanta sayarichisqañachu kanki kay pachapi tiyaqkunawan kanaykipaq. 21Manchakuymanpunin tukuchisqayki, hinan mana kapunkiñachu, maskhasunkikun, manapunitaq pillapas tarisunkikuñachu. Ñoqa Apu Señor Diosmi chayta nini, nispa.

will be added

X\