Ezequiel 25

1Señor Diosmi niwarqan: 2Qan, runaq churin, Amón runakunaman kutirispa contrankupi niy: 3Apu Señor Diospa siminta uyariychis: Yupaychawananku wasi pisichasqankumanta, Israel suyu purunyachisqankumanta, Judá runakunaq kamachi-kaypaq apasqa kasqankumantawanmi qankunaqa kusikuymanta qaparkacharqankichis. 4Chayraykun qankunata qaraykusqaykichis inti lloqsimuy ch'inneqmanta hamuspa phawaykuq runakunaman. Chay runakunan suyuykichispi karpakunata ruwakuspa tiyaykunqaku, paykunan pallasqaykichis rurukunata mikhunqaku, lecheykichistapas ukyanqaku. 5Rabá llaqtatan camello michinaman, Amón suyutapas oveja michinaman tukuchisaq. Hinan qankuna reqsiwankichis ñoqa Señor Diosqa kasqayta. 6Ñoqa Apu Señor Diosmi nini: Qankunaqa Israeltan mana kaqpaq qhawarparispaykichis kusikuymanta t'aqllakuspaykichis sarupakurqankichis. 7Chayraykun makiyta haywarimusaq qankunata muchuchinaypaq, wak llaqtakunamanmi llat'ananasuykichispaq hap'iykachisqaykichis. Qankunaqa manañan suyuman yupasqachu kapunkichis, manallataqmi llaqtaman yupasqapasñachu, pasaqtapunin thunipusqaykichis. Hinan reqsiwankichis ñoqa Señor Diosqa kasqayta, nispa. 8Apu Señor Diosmi nin: Moab runakunan Edom runakunapiwan ninku: Judá suyuqa wakin suyukuna kasqallantaqmi, nispa. 9Chayraykun Moabpa qorpanpi hark'apakuq llaqtakunata mentasqa llaqtankunatawan Bet-jesimot-ta, Baal-meonta, Quiriataimtawan atipachisaq. 10Inti lloqsimuy lado ch'inneqpi tiyaq runakunamanmi Moab suyuta Amón suyutawan qopusaq, chay hinapin manaña mayqen suyukunapipas yuyarinqañachu Amón runakunata. 11Ñoqan Moab runakunata muchuchisaq, chay hinapin reqsiwanqaku ñoqa Señor Diosqa kasqayta, nispa. 12Apu Señor Diosmi nin: Edom runakunan Judá runakunata mana khuyapayaykuspa vengakurqanku, chaywanmi paykunaqa pasaqtapuni huchallikurqanku. 13Chayraykun ñoqa Apu Señor Diosqa makiyta haywarisaq Edom suyuta muchuchinaypaq, hinaspan uywankunata runankunatawan wañuchisaq. Suyuntintapunin raqay-raqayman tukuchisaq, Temán llaqtamanta Dedán llaqtakaman runakuna wañunqaku espadawan sipisqa. 14Ñoqaqa Israel llaqtaywanmi aynita kutichisaqpuni Edom llaqtaman. Israel llaqtaymi Edom llaqtata muchuchinqa sinchi phiñakusqayman hina. Chay hinapin Edom runakuna yachanqaku ayni-kutichiq kasqayta. Ñoqa Apu Señor Diosmi chayta nini, nispa. 15Apu Señor Diosmi nin: Filistea runakunan vengakurqanku sinchi pisipaq qhawariq sonqonkuwan, Israelpa ñawpaqmanta awqan hinapuni, paykunan yuyaykurqanku Judá suyu runakunata chinkachipuyta. 16Chayraykun ñoqa Apu Señor Diosqa makiyta haywarisaq Filistea runakunata muchuchinaypaq. Llapantapunin tukusaq Ceret runakunata, hinallataq lamar-qocha patapi tiyaqkunatapas. 17Paykunamanmi manchakuytapuni aynita kutichisaq, k'arakta phiñakuspaymi muchuchisaq. Chayta ruwaqtiymi reqsiwanqaku ñoqa Señor Diosqa kasqayta, nispa.

will be added

X\