Ezequiel 24

1Isqonkaq wataq chunka killanpa chunka p'unchayninpin Señor Diosqa niwarqan: 2Kunan p'unchaypa hayk'añachus kasqanta qelqay, kunan p'unchaymi Jerusalenta Babilonia rey muyuykun. 3Kay mana kasukuq llaqtamantaq kay rikch'anachiy simita willay, Apu Señor Diosmi nin: Hatun mankata ninaman churaykuy, unutataq mankaman hich'aykuy, 4aycha kuchusqakunata chayman churaykuy, allinnin aychakunata, chakanta wasantawan, hinallataq tullunkunatapas allinninta, 5ovejakunaq allinninta churaykullaytaq. Llant'awantaq pachanmanta qonuykuy allinta t'impunanpaq tullunkunapas chayanankama, nispa. 6Apu Señor Diosmi nin: ¡Ay, imaraqmi runa wañuchiq llaqtamanta! ¡Ay, ikiraqmi yanayasqa mankamanta! ¡Yanayasqaqa manan pichakunchu! Mana sorteaspalla ch'ulla-ch'ullamanta aychanta ch'usaqyachiy. 7Llaqtan kashan sinchi yawarkama, manataq pampaman ch'aqchukunchu hallp'api chinkapunanpaq, aswanpas q'ala p'alta qaqa patakunallapin. 8Chay hinaqa, ñoqan yawarta saqesaq q'ala p'alta qaqa pataman, manapuni hayk'aqpas pichakunanpaq, chaymanta qaparimuspa phiñakuy ayni-kutichiyta mañakamunanpaq, nispa. 9Chayraykun Apu Señor Diosqa nin: ¡Ay, ikiraqmi runa wañuchiq llaqtamantaqa! Ñoqa kikiymi pasaqta qonuykusaq. 10Askha llant'ata apamuspa rawrachiy, aychata allinta chayachiy asnapakunawan churaspa, pachanpi tulluq ruphanankama. 11Chaymantataq ch'usaq mankata sansa pataman churaykuy, cobremanta manka puka sansa tukunankama qhellinmanta pichakunanpaq, yanayasqanpas chinkapunanpaq. 12Chaywanpas qhellillapunin kashan, ninapipas manapunin pichakunchu, yanqapaqmi ima ruwasqapas. 13Yaw, Jerusalén, qanpa kacharisqa puriyniykin chay manka yanayasqaqa, ñoqan pichayta munarqayki, ichaqa manapunin ch'uyayankichu. Qanpi phiñakuyniyta thasnukullaqtinñachá ch'uyanchakunki. 14Ñoqa Señor Diosmi nini, ahinapin chayqa kunan kanqa. Ñoqa kikiypunin chaytaqa ruwasaq, manan hinachu kanqa. Manan khuyapayasaqchu, manallataqmi yuyaykusqaytapas p'akisaqchu. Qantaqa muchuchisqayki imaynachus kawsasqaykiman, ruwasqaykiman hinan. Ñoqa Apu Señor Diosmi chayta nini. 15Señor Diosmi niwarqan: 16Qan, runaq churinmantan qonqaylla qechurqosqayki ancha munakusqayki warmita. Qanqa aman llakikunkichu, aman waqankipaschu, amallataqmi weqeykitapas sut'uchinkichu. 17Ch'inllan muchukunki, amataqmi lutokunkichu. Aman q'ala umapas q'ala chakipas purinkichu, aman uyaykita llakiy nanaymanta pakakunkichu, amallataq llakiypi mikhunakunatapas mikhunkichu, nispa. 18Tutamantanmi runakunawan parlasharqayku, ch'isinmantaq warmiy wañurqakapurqan. Paqarisnintaq Señor Diospa niwasqanta hina ruwarqani. 19Hinan runakunaqa niwarqan: ¿Ima niytan munan kay ruwasqayki? Willawayku, nispa. 20Ñoqataq nirqani: Señor Diosmi niwarqan: 21Israel runakunata niy, Apu Señor Diosmi nin: Qankunan ñoqa yupaychana wasiwan umata hoqarinkichis mana hayk'aq thunikuqpas kanman hina, qankunan chay wasita sinchitapuni munakunkichis, ñoqataqmi chay wasita pasaqta pisichapusaq. Jerusalenman churiykichista ususiykichistapas saqemusqaykichismi wañuchisqa kanqaku. 22Chaymi qankunapas Ezequiel hina ruwallankichistaq, aman llakikuymanta uyaykichistaqa qatakunkichischu, aman chay hina llakikuykunapi mikhunatapas mikhunkichischu. 23Aman q'ala umapas q'ala chakipas purinkichischu. Aman llakikunkichischu waqankichispaschu. Millay huchaykichismantan pisi-pisimanta kallpaykichis chiriyaykapunqa, hinaspan qankuna ukhullapi phutikunkichis. 24Qankunapaqqa Ezequielmi yachaqakunaykichispaq kanqa. Paypa lliw ruwasqankunatan qankuna ruwankichis. Chaykuna kaqtintaqmi reqsiwankichis ñoqa Apu Señor Dios kasqayta, nispa. 25Señor Diosmi niwarqan: Qan, runaq churin, uyariway. Israel runakunamantan pukarankuta qechupusaq, chayqa yupaychawananku wasin, chaytan sinchitapuni munakurqanku uma hoqarinankukama, chaywanmi kusikurqanku. Hinallataqmi qechupusaq churinkuta ususinkutawan. 26Chay p'unchay Jerusalenmanta ayqekuqmi willaq hamusunki. 27Chay p'unchaytaqmi upa kayniykimanta rimaripunki, ayqekamuqwanpas parlaykunki. Chay hinapin llaqtaq yachaqakunan kanki, hinan paykuna reqsiwanqaku ñoqa Señor Dios kasqayta, nispa.

will be added

X\