1 Señor Diosmi niwarqan: 2 Qan, runaq churin, uyariway. Iskay warmikunan karqan huk mamaq ususinkunalla. 3 Chay sipaskunan warma kayninkumantapacha Egipto suyupi qhelli huchapi puriyta yachaykapurqanku. Chaypin hinallata ñuñunkuta q'apichikurqanku, hinaspan doncella kayninkuta chinkachikapurqanku. 4 Kurakkaqpa sutinmi Ahola, chaymi Samaria karqan, sullk'akaqtaq Aholiba, chayñataq Jerusalén karqan. Paykunaqa ñoqaqmi karqan, wachapuwarqankutaq qhari wawakunata, warmi wawakunatapas. 5 Ahola kaqqa ñoqaqña kashaspapas qhelli hucha kawsayllapin purisharqan, paymantakaman Asiria qharikunata maskharqan. 6 Chaykunataqmi karqan Asiria soldadokuna sumaq sani-puka p'achayoq, llapankutaq kamachikuq umallikuna, sumaq rikch'ayniyoq waynakuna caballopi sillarqarisqakama. 7 Asiria runakunamanta aswan allinninkunawanmi Aholaqa wasanchakurqan, idolonkunawanpas sonqonta suwachikuspan qhellichakurqan. 8 Egiptopi kasqanmantapachan qhelli huchapi puriyta yachaykapurqan, chaytataqmi manaña qonqanñachu. Warma sipas kasqanmantapachan lliwpas paywan puñukullarqan, hinallan ñuñuntapas q'apichikurqan, munasqankutan ima qhelli huchatapas paywan ruwarqanku. 9 Chayraykun munaqnin Asiria qharikunaq makinman qoykapurqani, sonqonta chaykunawan suwachikusqanrayku. 10 Hinan paykunaqa cuerponta q'alararqanku, chaymantataq churinkunata ususinkunatawan qechupurqanku, paytataq espadawan wañuchipurqanku. Chay hinatan huchanmanta muchuchisqa karqan, chaymi huk warmikunapaqpas yachaqakuna rimay karqan. 11 Ñañan Aholibataq chayta rikurqan, chaywanpas payqa ñañanmanta aswantaraqmi sonqonta suwachikuspa qhelli huchapi puriykapurqan. 12 Payqa Asiria qharikunawanmi sonqonta suwachikurqan, paykunaqa llapallankun kamachikuq umallikuna kanku, allin maqanakuq munay p'achayoq sumaq rikch'ayniyoq waynakuna caballopi sillarqarisqa. 13 Chaypin repararqani paypas ñañanpa purisqanta hina purispa qhellichakusqanta. 14 Aholibaqa aswan millay qhelli huchapi puriqmi karqan. Paymi rikurqan perqakunapi ch'eqospa ruwasqa pukawan llunch'isqa, 15 Babilonia runakunata, Caldea runakunata llapankutaq umallikunaman rikch'akuq karqanku, kamachikuq hina, chumpikunayoq, uman watarqarisqa. 16 Chay Babilonia runakunata rikurqospan, paykunawan sonqonta suwachikurqan, hinaspan Babiloniakamaraq waqyamuqkunata kacharqan. 17 Babiloniamanta runakunataq hamuspa paywan munanakurqanku, hinaspa puñurqanku, aychankuta mana watakuspan payta qhellichaykapurqanku. Pasaqtapunin qhellichaykakapurqan qhepaman paykunata millakapunankamaraq. 18 Hinaspan sut'itapuni qhelli huchapi puriyta yachaykapurqan, q'ala kaynintapas rikuchikusparaq, imaynan kurak ñañanta millakurqani chay hinata paytapas millakunaykamaraq. 19 Ichaqa aswan-aswantaraqmi qhelli huchapi puriyman qoykakapurqan, Egiptopi sipas kaspa qhelli huchapi purisqantaraqmi yuyarisharqan. 20 Hinaspan Egipto runakunawan sonqonta suwachikurqan, asno hina caballo hina warmimanta phawaykachaq chay runakunawan. 21 Chay hinapin, qan Aholibaqa sipas kaspa kacharisqa phawaykachanaykimanta hawapi-ukhupi sonqoyoq karqanki, Egipto runakunaq ñuñuyki q'apinanmanta. 22 Chay hinaqa, yaw Aholiba, ñoqa Apu Señor Diosmi niyki: Chay millakusqayki wayllukuqniykikunatan awqaykiman tukuchisaq, hinantinmantan contraykipi hamuchisaq. 23 Babiloniamanta Caldea runakuna, Pecod suyu runakuna, Shoa suyu runakuna, Coa suyu runakuna, hinallataq llapan Asiria runakunapas hamunqaku, llapankun paykunaqa kanku sumaq rikch'ayniyoq waynakuna, kamachikuqkuna, oficialkuna, umallikunapiwan, llapankutaq paykunaqa caballopi sillaykusqakama. 24 Wichaymantapachan qan contra hamunqaku maqanakunapaq carretakunayoq, mikhuy apaq carretakunayoq, askha soldadokuna cascokunayoq, escudokunayoq, hinantin ladoykimantan muyuykusunkiku. Ñoqan paykunaman hap'iykachisqayki muchuchinasuykichispaq, paykunataqmi ñak'arichisunkichis paykunaq kamachikuy siminkunaman hina. 25 Ñoqan k'araktapuni qanwan phiñakusaq, chaymi paykunapas k'arakta phiñakuspa muchuchisunkiku, senqaykita ninriykitapas qhorusunkikun, qhepaq runakunatapas espadawanmi wañurachinqaku. Churiykikunatapas ususiykikunatapas lliwtan qechusunki, qhepallatañataqmi puchuqkunaqa ninaq ruphasqan kapunqa. 26 P'achaykikunatan ch'utisunkiku, k'achanchakunayki qori-qolqetan qechusunkiku. 27 Chay hinapin kacharisqa phawaykachanaykita, Egipto runakunawan qhelli huchapi purinaykitawan p'uchukachisaq, manañataqmi chaykuna ruwayta munapakunkiñachu, Egipto suyumantapas yuyarinkiñachu, nispa. 28 Apu Señor Diosmi nin: Chay millakuspa cheqnikusqayki suyukunaq makinmanmi hinata hap'iykachisqayki. 29 Paykunapas qanta cheqnikullasunkitaqmi, llank'apakuspa tarisqaykitan hap'ikapunqaku, hinaspan q'ala chichita wikch'upusunkiku aychaykipas q'ala-q'ala kanankama, millay qhelli huchapi puriyman qoykakapusqaykitan rikunqaku. Kacharisqa qhelli hucha puriypi phawaykachayniykin 30 chaykunataqa apamusunki, qanmi chay suyukunawan qhelli huchapi purirqanki, idolonkuta yupaychaysikuspaykitaq qhellichakurqanki. 31 Ñañaykiq purisqanta purisqaykiraykun muchuy vasota qoyki pay hina muchunaykipaq, nispa. 32 Chayraykun Apu Señor Diosqa nin: Ñañaykiq ukyasqan vasotan qanpas ukyallankitaq, maqma p'uktu hatun vasota. Chay vasoq hunt'a kasqanwanmi macharqapunki, runakunataq qanmanta asikunqaku pisichaspanku. 33 Chay Samaria ñañaykiq vasonqa q'alayaywan phutikuywan hunt'aykusqan kashan, chaywanmi machanki t'ili kanaykikama, pasaq llakisqa khuyay kanaykikama. 34 Machaykuspaykin vasotaraq ch'akichinki, chaymantapas ñut'ullataña chhallunki, chhallusqa k'arpawantaq ñuñuykitapas mat'akunki. Ñoqa Apu Señor Diosmi chayta nini. 35 Chayraykun ñoqa Apu Señor Diosqa nini: Ñoqata qonqapuwaspaykin qheparpariwarqanki, chayraykun ñak'arinkipuni kacharisqa purispa qhelli huchapi purisqaykimanta, nispa. 36 Señor Diosqa nillawarqantaqmi: Qan, runaq churin, ¿huchachankichu Aholata, Aholibatawan? Chay hinaqa, uyanpi laq'ay millay p'enqay ruwasqankunata. 37 Paykunan kanku wasanchaqkuna runa wañuchiqkuna. Paykunan idolokunata yupaychaspanku wasanchawanku, ñoqapaq wachakusqanku wawankutan wañuchirqanku idolonkuman ruphachispa. 38 Chay p'unchaykunapiqa aswankunataraqmi ruwarqanku, ñoqa yupaychana wasita qhellichaspanku samana p'unchayniykunatapas pisicharqanku. 39 Idolonkuta yupaychaspa wawanku kanasqanku p'unchaymi ch'uya wasiyman hamurqanku, hinaspan qhellicharqanku. ¡Chay hinatan wasiypiraqtaq ruwarqanku! 40 Karu llaqtamantan waqyaqkunawan qharikunata pusachikamurqan. Chaykuna chayamuqtintaq iskaynin ñañantin warmikunaqa maqchikuspanku ñawinkuta llusikurqanku, qori-qolqemanta k'achanchanawantaq churakurqanku. 41 Tiyaykurqankutaq k'achanchasqa puñunapi, mesapas wakichisqallamanña, chaymantaq churaykurqanku ñoqapaq t'aqasqa ch'uya inciensoyta aceiteytawan. 42 Chaymantataq uyarikurqan askha runaq kusikuymanta ch'aqwasqan, chaykunaqa ch'inneqmanta hamuq machasqa runakunan karqanku. Paykunan warmikunaq makinman brazaleteta churaspa sumaq coronawan umanman churarqanku. 43 Ñoqataq chay qhelli hucha puriypi payayaq warmimanta nirqani: Qhelli huchapi puriq warmitaqa qhelli kawsayninman hina rikuchunku, payqa chay hinapunin, nispa. 44 Chay machasqa runakunataq sapa kutilla puñurqanku chay millay Aholawan Aholibapiwan, rabona warmiwan puñuq runakuna hina. 45 Ichaqa chanin runakunan paykunaman tupaqnin sentenciata unanchanqaku qhelli huchapi purisqankumanta, runa wañuchisqankumantawan, paykunaqa qhelli huchapi puriq warmikuna, runa wañuchiqkuna kasqankurayku, nispa. 46 Apu Señor Diosmi nin: Paykuna contra sayarichun askha ch'aqwaqkuna, hinaspa sinchita llaksarqospa llat'anachunku. 47 Llapan ch'aqwaqkunataq rumiwan ch'aqespa espadawan sipipachun, wañuchichunkutaq churinkuta ususinkuta, hinaspataq wasinkutapas kanaykuchunku. 48 Ñoqan suyumanta ch'usaqyachisaq kay millay huchakunata. Chay hinapitaqmi llapan warmikuna yachanqaku, hinaspan manaña qhelli huchapi purinqakuñachu. 49 Chay iskay warmikunataqmi ichaqa qhelli huchapi purisqankumanta, idolokuna yupaychaysikusqan huchankumantawan ñak'ariyta chaskinqakupuni. Chay hinapin paykuna reqsiwanqaku ñoqallapuni Apu Señor Dios kasqayta, nispa.
