Ezequiel 22

1Señor Diostaq niwarqan: 2Qan, runaq churin, ¿runa wañuchiq millay llaqtata huchachankichu? ¿Huchachankipunichu? Chay hinaqa, rikuchiy llapan millay ruwasqankunata. 3Hinaspa niy, Apu Señor Diosmi nin: Qanmi runaykikuna wañuchiq llaqta kanki, idolokunata yupaychaspataq qhellichakurqanki, chayraykun ñak'arinayki chayamushanña. 4Runa wañuchisqaykimantan huchachasqa kanki, hinallataq ruwakusqayki idoloykikunawan qhellichakunki. Manaraq tiemponpin kawsayniykipas tukukapunqa, p'unchayniykipas p'uchukapunqa. Hinallataqmi llaqtakunawanpas k'amichisqayki, llapan suyukunawantaq asipayachisqayki. 5Yaw, lliwpa reqsisqan qhelli llaqta, ch'aqwaykunaq hunt'aykusqan llaqta, qayllaykipi kaqpas karupi kaqpas qantaqa asipayasunkikun. 6Chaypin Israelpa kamachiqninkuna kashan, chawpiykipi tiyaykuspa, runakunata wañuykachishan may atisqanta. 7Runaykikunaqa tayta-mamantapas pisichankun, wak llaqtayoqkunatapas, mana tayta-mamayoqkunatapas, viudakunatapas sarunchankun. 8Ch'uya kaqniykunatapas pisichankun, samana p'unchayniykunatapas mana kaqpaqmi qhawarinku. 9Wakin runaykikunan llullakuspa hukkunata wañurachinku, wakin runaykikunataq orqo patapi wak'a dioskunata yupaychanankupaq fiesta ruwaq purinku, hinaspan millay mana ruwanakunata ruwamunku. 10Wakintaqmi madrastankuwan puñukunku, wakintaq killan purishaqtinpacha warmikunata violanku, 11kaqllataq wakinqa runamasinpa warminwan puñukun, wakintaq p'enqaytaraq qhachuninwan puñukun, wakinñataq taytanpa ususinwan puñukun. 12Wakinkaq runaykiñataq hinallata rantichikun hukta wañuchinanpaq. Qolqetapas manunku askha interesniyoqta, runamasinta imaymana mana chaninta ruwaspan kallpantapas k'utun. Chay hinapin ñoqata qonqapuwarqanki. Ñoqa Apu Señor Diosmi chayta nini. 13Ñoqaqa sinchi phiñasqapunin kashani runa q'alanasqaykimanta runa wañuchisqaykimantawan. 14¿Ñoqawan churanakunaykipaq kallpayki kanmanchu qanta muchuchiqtiy? Ñoqa Señor Diosmi rimarirqani, rimarisqaytaqa hunt'asaqpunin. 15Hinantin llaqtamanmi wisñiykusqayki, llapan suyumantaqmi ch'eqeykachisqayki, pasaqtapunin qhellikayniykita picharparisaq. 16Chay hinapin wak suyukuna pisichasunki, qantaqmi reqsiwanki ñoqapuni Señor Diosqa kasqayta, nispa 17Señor Diosmi niwarqan: 18Qan, runaq churin, uyariway. Ñoqapaqqa Israel llaqtaqa mana valeq qolqeq qhoqan hinallan, qolqe unuyachisqamanta puchuq cobre, estaño, fierro, titi hinan. 19Chayraykun ñoqa Apu Señor Diosqa nini: Paykunaqa mana imapaq valeq qhoqañataq tukupunku chayqa, Jerusalén chawpillamanmi huñuykusaq. 20Imaynan qolqetapas, cobretapas, fierrotapas, tititapas, estañotapas chhaqruspa hornoman hich'aykunku, hinaspataq allinta ninawan unuyachinku, chay hinatan ñoqaq manchakuy phiñakuyniywan paykunata llaqtaman huñuykuspa unuyachisaq. 21Paykunata huñuykuspaymi aswantaraq phiñakuyniyta rawrarichisaq, hinan paykuna llaqtaq chawpinpi unuyachisqa kanqaku. 22Imaynan hornopi qolqeta unuyachinku hinan, paykunapas llaqta chawpipi unuyachisqa kanqaku, chay hinapitaqmi reqsiwanqaku ñoqaqa Señor Dios kasqayta, hinallataq paykunaman phiñakuyniyta chayachisqaytapas, nispa. 23Señor Diosmi nillawarqantaq: 24Qan, runaq churin, Israel suyuta niy: Qanmi kanki mana parayoq mana unuyoq muchuchisqa qhelli suyu. 25Kamachikuqniykikunapas león hinan qaparikuspa mikhunantapas mikhuq, kikin hallp'anpi runakunatapas oqon, qhapaq kaynintapas illankunatapas suwan, hinallataq askha warmikunaq qosankuta wañuchinku. 26Sacerdotenkupas yachachikuyniykunatan q'ewinku, ch'uya kaqniykunatapas pisichanku, manapunin reparankuchu Diospaq t'aqasqa kaqtawan mana t'aqasqa kaqtawanpas, manallataqmi hukkunamanpas yachachinkuchu qhelli kaqtawan ch'uya kaqtawan reparanankupaq. Manapunin yuyarinkuñachu samana p'unchayniykunatapas, ñoqatapas pisichapuwankun. 27Umalliykikunaqa mikhunanpaq aychata llik'irqariq lobokuna hinan kanku. Yawartan hich'anku, runakunatapas wañuchinkun, chaywantaqmi qhapaqyanku. 28Profetakunan cheqaq kaqta pakaspa llulla rikhuriypi rikusqankuta llulla watuchiykunatawan willakuspa, perqa llunch'iq hina chay ruwasqankuta pakanku. Paykunan ninku: “Apu Señor Diosmi khaynata nin”, nispa, ñoqaqa mana imallatapas paykunaman nishaqtiy. 29Llaqta runan millay mana chanin-kayman suwakuymanwan k'askakunku, wakchatan mana imayoqtawan q'alananku, yanqa qasin wak llaqtayoqkunata pisichanku. 30Chay runakuna ukhupin ñoqa maskharqani pillapas kay suyupaq allinnin ruwaq runata, hinallataq ama ima mana allintapas ruwanaypaq ñoqata valepakuwananpaq, ichaqa manan tarirqanichu. 31Chayraykun phiñakuyniyta paykuna pataman kachaykusaq, hinaspan phiñakuyniywan ruphachisaq, ruwasqankuman hina muchuchinaypaq. Ñoqa Apu Señor Diosmi chayta nini.

will be added

X\