Ezequiel 2

1Niwarqantaq: Qan, runaq churin, sayariy rimapayanaypaq, nispa. 2Rimapayashawanankamataq Diospa Espiritun hunt'aykuwarqan, hinaspa sayarichiwarqan. Chaymi rimapayawasqanta uyarirqani: 3Qantan Israel runakunaman kachasqayki, ñoqa contra sayarispa mana kasukuqkunaman. Paykunaqa ñawpa taytankumantapacharaqmi kunan p'unchaykamapas ñoqa contrallapuni sayarishanku. 4Paykunaqa coles uya, rumi sonqo runakunan kanku. Chaykunamanmi kachasqayki: Kay hinatan Señor Diosqa nin, nispa rimapayamunaykipaq. 5Chay millay mana kasukuq runakunaqa uyarichunkupas amapas, ichaqa yachanqakupunin paykuna ukhupi huk profetaq kasqanta. 6Qan, runaq churinqa, amapunin paykunata manchakunkichu, ima nispa nisqankutapas, hinaña qan reparakunki khiska sonqopi otaq alacrankunaq qayllanpi tiyashaq hina kasqaykita chaypas. Aswan millayña sayariqtinkupas, amapunin mancharikunkichu ima nisqankutapas millay uyankutapas. 7Qanqa willallankipunin simiyta, uyarichunkupas amapas, paykunaqa mana kasukuqkunan kanku. 8Qan, runaq churinqa, allintapuni uyariway, amayá paykuna hina mana kasukuqqa kaychu, simiykita hanllariy, hinaspa qosqayta mikhuy, nispa. 9Hinan rikurqani qelqa k'uyuta huk maki haywarimushawaqta. 10Chay makitaq ñawpaqeypi qelqata k'uyurarqan, chaypin qelqasqa kasqa ñawpaqenpi qhepantinpi sonqo nanay harawikuna, llakiy-llaki rimaykuna, anananaykuna ima.

will be added

X\