Ezequiel 19

1Qan, runaq churin, kay harawita takiy Israel umallikunapaq: 2China leonmi mamaykiqa karqan, leonkunaq chawpinpi aswan allinninmi karqan, malta leonkunaq chawpinpin chutarayarqan, chaypitaqmi uñankunata uywarqan. 3Hukkaqtan wiñarqachirqan hatun kanankama. Mikhunanpaq chakuytapas yacharqanñan, hinaspan runataña mikhupurqan. 4Paymanta rimaqtan suyukuna uyarirqanku, toqllankupin hap'irqorqanku, llawq'anayoq fierrowanmi aysarqanku, Egipto suyumanmi aparqanku. 5China leonpa suyakuyninmi manapuniña kapurqanchu, hukkaq uñantan hap'irqan, wiñanankamataqmi kallpacharqan. 6Hatun leonña kaspanmi, leonkuna chawpipi puriykacharqan, mikhunanpaq chakuytan yacharqan, hinaspan runataña mikhurqan. 7Allin perqasqa wasikunatan q'asurqan, llaqtakunatan thunirqan, manchay qapariyninwanmi suyuntinta kuyurichirqan. 8Pay contran sayarimurqan qayllanpi suyukuna muyuriqninpi llaqtakuna. Llikankutan mast'arqanku, toqllankumanmi urmaykachirqanku. 9Jaulamanmi llawq'anayoq fierrokunawan aysaykurqanku, hinaspan Babilonia reyman aparqanku. Chaypin pukara wasiman winarqanku, manañan pillapas waqyapakusqanta Israel orqokunapi uyarirqanñachu. 10Mamaykiqa uvas sach'amanmi rikch'akapurqan unu qayllapi mallkisqaman, k'allmasapan rurusapan karqan askha unu kasqanrayku. 11K'allmankunan rakhullaña karqan, reykunaq varanpaqpas kusallaña, sinchitan wiñarqan, phuyumanraqmi tariparqan, hatunllaña k'allmasapa kaqtin llapa runa rikurqan. 12K'arakta phiñakuspan t'irarqapurqanku, pampamantaq wikch'upurqanku. Inti lloqsimuy rupha wayran ch'akichipurqan, chaymi uvaspa rurunpas urmapurqan. Rakhu k'allmankunapas ch'akipurqan, ninataq ruphaykapurqan. 13Kunantaq ch'in pampapi mallkisqa kashan, mana unuq kasqan ch'aki pampapi. 14K'allmanmantataq nina rawrarirqan, ruruntan ch'ikchintawan ruphapurqan. Rakhu k'allmankunan mana kanñachu reypa kamachikunan varanpaq, nispa. Kayqa llakiy-llakiy harawin, llakikuykunallapitaqmi takikunqapas.

will be added

X\