Ezequiel 18

1Señor Diosmi niwarqan: 2¿Imataq Israelpi rimashanku chay rimayri: Taytanmi p'osqo uvasta mikhun, churinpa kiruntaq chhukukukun, nispa? 3Ñoqa Apu Señor Diosmi sutiyrayku jurani, Israelpiqa chay rimayta hinaqa manañan rimankichisñachu. 4Ñoqaqmi llapan runaqa, churinpas, taytanpas. Huchallikuq runaqa wañunqapunin. 5Chanin runan chaninkaqta allinkaqtawan ruwaqqa: 6Wak'a dioskuna yupaychanapaq orqo patapi mikhuna wakichisqakunapi mana mikhupakunchu, Israelpa yanqa idolonkunata mana qhawarinchu, runamasinpa warminwan mana wasanchanchu, warminpa killan purishaqtinpas paywan mana puñunchu. 7Manan pitapas sarunchanchu, manumanta ima hap'isqantapas kutichipunmi, manan pimantapas suwakunchu. Mikhuynintapas yarqasqakunamanmi qoykun, mana p'achayoqtapas p'achachinmi, 8qolqetapas manan interesniyoqpaqchu manun, manan pitapas mana allintaqa ruwanchu, runapuratapas allintan chaninchan. 9Kamachikuyniyman hinan ruwan, unanchay simiykunatapas allintapunin hunt'an. Chay runan chaninpuniqa, payqa manan wañunqapunichu. Ñoqa Apu Señor Diosmi chayta nini. 10Chay runaq churintaqchus kanman runa wañuchiqpas, loqhepas, chaykunamanta imakuna ruwaqpas, 11taytanpa mana ruwasqankunata ruwaysikuqpas, orqo patapi wak'a dioskuna yupaychanapaq mikhuna wakichisqata mikhuysikuqpas, runamasinpa warminwan wasanchaqpas, 12wakchakunata mana imayoqkunatawan sarunchaqpas, suwakuqpas, manumanta ima hap'isqanta mana kutichipuqpas, idolokunata yupaychaqpas, cheqnisqaykunata ruwaqpas, 13qolqenta interesniyoqta manuqpas, ¿chay hina runaqa kawsanmanchu? ¡Manapunin kawsanqachu! Chay millay cheqnisqakunata ruwaqqa wañunqapunin, pay kikillanpunin huchanmantaqa wañunqa. 14Chay millay runaq churintaqchus kanman taytanpa lliw imaymana huchakuna ruwasqanta rikushaspa mana chay ruwasqanta hina ruwaq. 15Payqa wak'a dioskuna yupaychanapaq orqo patapi mikhunakuna wakichisqamanta mana mikhuysikuqpaschu, manallataq Israelpa idolonkunata qhawariqpaschu, runamasinpa warminwanpas mana wasanchanpaschu, 16pitapas mana sarunchaqchu, manumanta ima hap'isqantapas mana hap'ipakuqchu, mana suwakuqpaschu, mana mikhunayoqkunaman mikhuyninpas qoykuq, mana p'achayoqmanpas p'achaykachiq, 17mana pitapas mana allin ruwaqchu, qolqentapas mana interesniyoqta manuq. Payqa kamachikuyniyman hinan ruwanpas, unanchasqay simiykunatapas allintapunitaq hunt'anpas chayqa, chay runaqa manan taytanpa huchanmanta wañunqachu, aswanpas kawsanqapunin. 18Taytantaqchus runa muchuchiq, suwakuq, llaqtan ukhupi mana allin ruwaq kanman chayqa, wañunqan pay kikinpa huchanmanta ñak'arispa. 19Qankunan ninkichis: Chayri, ¿imanaqtintaq taytanpa huchanmanta churinpas mana paganchu? nispa. Churinqa allintan chanintan ruwarqan, hinallataq kamachikuy simiykunatapas llapanta ruwaspa hunt'arqan, chayraykun payqa kawsanqapuni. 20Aswanpas pipas hucha ruwaqllan wañunqaqa. Manan churinqa taytanpa huchanmantaqa wañunmanchu, manallataq taytanpas churinpa huchanmantaqa wañunmanchu. Chanin runaqa chanin kaqllatapunin chaskinqa, mana chanin runataq mana chanin kasqanmanta ñak'ariyta chaskinqa, nispa. 21Huk millay runataqchus lliw hucha ruwasqanmanta t'aqakapunqa, hinaspataq llapan kamachikuyniykunatapas hunt'apunqa, allinkaqtapas chaninkaqtapas ruwanqa chayqa, kawsanqapunin, manan wañunqachu. 22Ñoqapas manañataqmi yuyarisaqñachu ima huchakuna ruwasqanmantapas, chaymi payqa kawsanqa lliw chaninkaqkuna ruwasqanrayku. 23¿Ñoqari huchayoqpa wañunanta munanichu? Manan, aswanmi munani yuyayta hap'ispa kutirikamuwananta hinaspa kawsananta. Ñoqa Apu Señor Diosmi chayta nini. 24Huk chanin runataqchus chanin-kayninta wikch'upuspa huchallikunman millay runaq ruwasqan cheqnikusqaykunata ruwaspa chayqa, ¿payri kawsanmanchu? Ñoqaqa manan yuyarillasaqpaschu llapan allinkuna ruwasqantaqa. Payqa mana hunt'aq kasqanmanta huchanmantawanmi wañunqa. 25Qankunan ichaqa nishankichis: Señor Diospa ruwasqanqa mana chaninmi, nispa. Chayrayku, yaw, Israel runakuna, uyariwaychis. ¿Ñoqaq ruwasqayqa manachu chanin? Aswanpas, ¿manachu qankuna mana chanin ruwaqqa kankichis? 26Chanin runataqchus chanin-kayninta wikch'upuspa mana allinta ruwapunqa chayqa, mana allin ruwasqan huchanmantan wañupunqa. 27Mana chanin runataqchus chay ruwasqankunamanta t'aqakapuspa allinkaqta chaninkaqtawan ruwapunqa chayqa, kawsaynintan qespichikunqa. 28Allinta qhawarispachus lliw mana allin ruwasqanmanta t'aqakapunqa chayqa, cheqaqtapunin kawsanqa, manataq wañunqachu. 29Israel llaqta runakunan ichaqa nishanku: Señor Diospa ruwasqanqa mana chaninmi, nispa. Yaw, Israel runakuna, ¿ñoqaq ruwasqayqa manachu chanin? Aswanpas, ¿manachu qankuna mana chanin ruwaqqa kankichis? 30Israel runakuna, ñoqaqa sapankaykichistan ruwasqaykichisman hina juzgasqaykichis. Ñoqa Apu Señor Diosmi chayta nini. Hukpaqkama mana allin ruwayniykichiskunata wikch'upuspa ñoqaman kutirikampuwaychis, chay hinapi huchaykichismanta mana muchuchisqa kanaykichispaq. 31Ñoqa contra llapan mana chanin ruwasqaykichismanta t'aqakuychis, maskhaychis mosoq sonqota mosoq yuyaytawan. Israel runakuna, ¿imanaqtinmi wañuwaqchis? 32Ñoqaqa manan pitapas wañunanta munanichu. Lliw mana allinmanta t'aqakuspa ñoqaman kutirikampuwaychis, hinan kawsankichis. Ñoqa Apu Señor Diosmi chayta nini, nispa.

will be added

X\