Ezequiel 14

1Israel llaqta wakin kurak runakunan hamuspa ñawpaqeypi tiyaykurqanku. 2Hinan Señor Diosqa nimuwarqan: 3Qan, runaq churin, uyariway. Kay runakunan idolonkumanpuni hap'ipakunku, hinaspan chay diosninkuwan huchallikunankupaq aysachikunku. ¿Chaychu ñoqata paykuna tapuwankuman? 4Chay hinaqa niy, Apu Señor Diosmi nin: Mayqen Israel runapas idolonkunaman hap'ipakuspa, chay dioskunawan huchallikunanpaq aysachikuspa, profetaman tapukuqraqtaq hamunman chayqa, ñoqa kikiymi payman kutichisaq millay idolokuna yupaychaq kasqanman hina. 5Llapan Israel runakunan idolonkurayku t'aqakuwanku, chayraykun chayta ruwasaq sonqonkuta wakmanta suwanaypaq. 6Chayrayku Israel runakunata niy, Apu Señor Diosmi nin: ¡Yuyayta hap'ispa ñoqaman kutirikampuwaychis! Millay p'enqay ruwasqaykichista, idoloykichistapas wikch'upuychis. 7Mayqen Israel runapas, Israel suyupi tiyaq wak llaqtayoq runapas ñoqata saqewaspa idolokunaman hap'ipakuspa, chay diosninkuwan huchallikunanpaq aysachikunqa, hinaspa huk profetaymanraqtaq tapukuq hamunmanpas chayqa, ñoqa kikiymi payman kutichisaq. 8Chay runaq awqanmi kapusaq, lliwpa rikunanpaqmi muchuchisaq chaymanta qhepaman parlanankupaq, llaqtaymantapas wikch'upusaqtaqmi. Chay hinapin yachankichis ñoqa Señor Diosqa kasqayta. 9Huk profetachus llullakunanpaq q'otuchikuspa willakunman chayqa, ñoqa Señor Diospa q'otusqay profetan kanqa, hinan ñoqaqa chay profetata ñak'arichisaq, Israel llaqtaymantapas wikch'upusaq. 10Profetapas payta tapukuq runapas iskayninkun huchachasqa kanqaku. 11Chay hinapin manaña Israel llaqtaqa astawan ñoqamanta t'aqakuwanqakuñachu, manañataq huchankuwan qhellichakunqakuñachu. Paykunan llaqtay kapunqaku, ñoqataq Diosninku kasaq. Ñoqa Apu Señor Diosmi chayta nini, nispa. 12Señor Diosmi niwarqan: 13Qan, runaq churin, uyariway. Suyuntin runachus ñoqa contra huchallikunkuman wasanchawankumantaq chayqa, ñoqan makiyta haywarispa llapantapuni mikhunankuta qechusaq. Paykunamanmi yarqayta kachaykusaq, hinan runakunapas uywakunapas wañuranqaku. 14Chay suyupitaqchus tiyanman Noepas, Danielpas, Jobpas chayqa, paykuna kinsantillanmi qespichisqa kankuman chanin kasqankurayku. Ñoqa Apu Señor Diosmi chayta nini. 15Salqa animalkunataña kachaykuyman suyuntinpi tiyaqkunata mikhunanpaq, hinataq chay animalta manchakuspa mana piqpa purinan ch'inneqman suyuntin tukupunman, 16chaypitaqchus chay kinsantin runakuna tiyashanman chaypas, manapuniñan wawankunata horqokapuyta atinkumanchu. Paykunallañan qespichisqa kankuman, suyuntintaqmi ch'inneqmanpuni tukupunman. Ñoqa Apu Señor Diosmi sutiyrayku jurani. 17Maqanakuytachus chay suyuman kachaykuyman, hinaspataq kamachiyman runata uywatawan wañuchinanpaq, 18chay kinsantin runakunataqchus chaypi tiyankuman chaypas, manapunin wawankunata horqokapuyta atinkumanchu, paykunallapunin qespichisqa kankuman. Ñoqa Apu Señor Diosmi sutiyrayku jurani. 19Onqoykunatachus chay suyuman kachaykuyman, phiñakuyniywantaq wañuyta t'akaykuspa wañurachiyman runakunata uywakunatawan, 20chaypitaqchus kashanman Noepas, Danielpas, Jobpas chayqa, manapunin wawankunata horqokapuyta atinkumanchu. Paykunallapunin qespichisqaqa kankuman, chanin runa kasqankurayku. Ñoqa Apu Señor Diosmi sutiyrayku jurani. 21Ñoqa Apu Señor Diosmi nillanitaq: Ñoqan Jerusalenta muchuchisaq tawa manchana ñak'ariykunawan: hatun maqanakuywan, yarqaywan, salqa animalkunawan, onqoypiwan. Chaykunan wañurachinqa runata uywakunatawan tukunankama, chay hinaqa, ¡imayna mancharikuyraqmi Jerusalenpaqqa kanqa! 22Chaywanpas iskay kinsallan kawsashaq ayqenqaku, chaykunallan wawakunantin lloqsinqaku. Paykuna qankunaman hamuqtinmi yachankichis imaynachus kasqankuta, imachus ruwasqankutawan, chayraqmi rikunkichis imamantachus Jerusalenta lliw ñak'ariykunawan kachaykusqayta. 23Qankunaqa rikunkichismi imachus ruwasqankuta imaynachus kasqankutawan, chay hinapin yachankichis Jerusalentaqa mana yanqa qasichu muchuchisqayta. Ñoqa Apu Señor Diosmi chayta nini, nispa.

will be added

X\