Ezequiel 13

1Señor Diosmi nillawarqantaq: 2Qan, runaq churin, niy Israelpa profetankuna contra, kikillankumanta rimaq profetakunata: ¡Uyariychis Señor Diospa siminta! 3Apu Señor Diosmi nin: ¡Imanallanqapunin kikinkuq yuyaynillankumanta llullakuspa yanqa rimaq uman muyusqa profetakunaqa! 4Yaw, Israel, profetaykikunaqa raqay-raqaypi tiyaq atoqkuna hinan. 5Israel llaqtaq perqanpa q'asankunataqa manan wisq'aykurqankuchu, chay hinaqa manan atikunqachu Israelta amachay, Señor Diospa phiñakuynin p'unchay chayamuqtin. 6Rikhuriy rikusqankuqa yanqan, willakusqankupas llullan. Paykunan ninku: Señor Diosmi kay hinata nin, nispa, manataqmi kamachirqanichu rimanankupaqqa. Chaywanpas rimasqanku hunt'akunantan suyanku. 7Yaw, profetakuna, qankunaq rikhuriypi rikusqaykichisqa yanqan. ¡Willakuyniykichispas llullan! Qankunan ninkichis: Señor Diosmi kay hinata nin, nispa, manataqmi imatapas nirqaykichischu. 8Chayraykun ñoqa Apu Señor Diosqa niykichis: Qankunaq rikhuriyniykichispas willakuyniykichispas llullan, chayraykun ñoqa Apu Señor Diosqa qankuna contra kani. 9Llullakuspa willakuq yanqa rikhuriymanta rimaq profetakunaq awqaykichismi tukupusaq. Manan qankunaqa Israel llaqtaypa huñukuyninpi kaytaqa atinkichischu, manan sutiykichispas Israel llaqtaypa miraynin qelqapi kanqachu, manallataq Israel suyumanpas haykunkichischu. Ahinapin ñoqa Apu Señor Dios kasqayta reqsiwankichis. 10Qankunan llaqtayta q'otunkichis: Lliw imapas allinmi kashan, nispa, manataq hinapaschu kashaqtin. Runakunan yanqa perqata sayarichirqan, qankunataq patanman iskuwan llunch'iqkuna kankichis. 11Ñoqan niykichis, yaw, llunch'iqkuna, perqaykichisqa kumpakapunqan, para lloqlla hatariqtin, rumi hina chikchi chayaqtin, muyuq tutuka hatun wayra hamuqtin. 12Perqa ruwasqaqa kumpakunqan. Chaymi tapusunkichis: ¿Maytaq iskuwan llunch'isqaykichisri? nispa. 13Chayraykun ñoqa Apu Señor Diosqa nini: K'arakta phiñakuspaymi muyuq tutuka hatun wayrata kachamusaq, para lloqllatapas hatarichimusaq, hatuchaq rumita hinan chikchitapas chayachimusaq pasaqta thuninanpaq. 14Kumpasaqpunin qankunaq llunch'isqaykichis perqataqa yanqa pampa kanankama, teqsinpas rikhurinankamaraq. Arí, kumpasaqpunin perqataqa, qankunataqmi wañunkichis chay pasaq thunisqa perqa ukhukunapi, chaypiraqmi reqsiwanqaku ñoqapuni Señor Diosqa kasqayta. 15Chay perqapin llunch'iqninkunapiwan phiñakuyniyta thasnukusaq, runataqmi ninqa: Manan kapunchu perqapas llunch'iqninpas, nispa. 16Israelpa profetankuna, chay hinan qankunaqa kankichis, rikhuriypi rikusqaykichistan llullakuspa Jerusalenman: Allillanmi kashan, nirqankichis, manataq hinapaschu kashaqtin. Ñoqa Apu Señor Diosmi chayta nini. 17Qan, runaq churin, kunanqa llaqtaykipi kikillankumanta sutiypi yanqa profetizaq warmikuna contra sayariy, paykuna contra profetizay. 18Apu Señor Diosmi nin: ¡Imaraqmi qankunamanta runaq sonqonta suwaspa puriqkuna! Qankunaqa llapan runaq makinmanmi layqana p'alta watukunata sirankichis, ruwallankichistaq imaymana sayayta uyantin uma qatanakunata. Ahinatan llaqtayta mikhuyta munankichis, qankunapaq allin kananta munaspa. 19Qankunan qhellichawankichis llaqtay ukhupi huk hach'iy cebadawan t'anta ñut'usqapiwan watuspa. Llaqtaytan q'otunkichis, paykunaqa llullakuyta uyariqlla kasqankurayku, hinan mana wañunanpaq kaq runata wañuchirqankichis, wañunanpaq kaqtañataq kawsachirqankichis, nispayki. 20Chayraykun ñoqa Apu Señor Diosqa nini: Ñoqapunin chay layqana p'alta watukuna ruwasqaykichista cheqnikuni, chaywanmi qankunaqa runakunata pichinchuta hina hap'inkichis. Ñoqan qankunaq chay hina munaychakuyniykichismanta chay runakunata kacharipusaq. 21Uma qatakusqaykichista q'alaraspan, llaqtayta qechukapusqaykichis, manañataq hayk'aqpas hap'iyta atinkichischu. Hinaspan qankuna reqsiwankichis ñoqa Señor Diosqa kasqayta. 22Qankunan llullakuspa chanin runakunata llakichirqankichis, mana imamanta llakichinay kashaqtin, qankunan millay runakunata aswanta tanqarqankichis millay ruwayninkuta mana saqenankupaq, chay hinapi mana qespikunankupaq. 23Chaymi kunan manaña llulla rikhuriykunata rikunkichisñachu, manañataqmi watunkichispaschu. Ñoqan llaqtayta makiykichismanta qechukapusqaykichis, hinan qankuna reqsiwankichis ñoqa Señor Diosqa kasqayta, nispa.

will be added

X\