Ezequiel 11

1Diospa Espirituntaq aparikuwarqan Señor Diospa wasin inti lloqsimuy lado punkuman. Chay punkupin kashasqa iskay chunka phisqayoq runakuna, paykuna chawpipitaq kashasqa llaqta umallikuna Azurpa churin Jaazanías, Benaiaspa churin Pelatiaspiwan. 2Señor Diostaq niwarqan: Qan, runaq churin, uyariway. Kay runakunan llaqtaman millay yuyaykunata qaran. 3Paykunaqa ninkun: Manan wasi ruwana tiempochu. Kay llaqtaqa manka hinan, ñoqanchistaq aycha hina kanchis, nispa. 4Chayrayku, qan, runaq churin, paykuna contra sutiypi rimariy, nispa. 5Chaymantataq Señor Diospa Espiritunqa hunt'aykuwaspa rimanaypaq kamachiwarqan: Señor Diosmi nin: Yaw, Israel runakuna, chay hinatan qankunaqa yuyankichis. Ñoqaqa yachanin qankunaq yuyaykusqaykichista. 6Qankunaqa askha runakunatan kay llaqtapi wañuchirqankichis, ayakunawantaq callekunatapas hunt'aykachirqankichis. 7Chayraykun ñoqa Apu Señor Diosqa sut'inta willaykichis: Jerusalenmi manka, aychataqmi mana qankunachu kankichis, aswanpas wañurachisqaykichis runakunaq ayanmi aychaqa, qankunatataqmi llaqtamanta wikch'upusqaykichis. 8¿Awqa tinkuytachu manchakunkichis? Kunanmi qankuna pataman hatun maqanakuyta kachaykamusaq. Ñoqa Apu Señor Diospunin nini. 9Kay llaqtamanta horqospan wak llaqtayoqkunaman hap'iykachisqaykichis. Hinaspan muchuchisqaykichis, 10qankunataq awqa tinkuypi wañunkichis, chaywanmi qankunata Israel suyu qorpapi taripasqaykichis. Chaypin reqsiwankichis ñoqaqa Señor Diospuni kasqayta. 11Llaqtaqa qankunapaq manan mankachu kanqa, manataqmi aychapas qankunachu kankichis. Ñoqapunin taripasqaykichis Israel suyu qorpapi. 12Chaypin aswantaqa reqsiwankichis ñoqaqa Señor Diospuni kasqayta. Qankunaqa manan kamachikuyniyman hinachu kawsarqankichis, manallataqmi kasukurqankichischu unanchay simiykunatapas, aswanpas muyuriqniykichispi llaqtakunaq ruwasqantan qatichikurqankichis, nispa. 13Chayta Señor Diospa sutinpi rimashallaqtiyraqmi Benaiaspa churin Pelatiasqa pampaman wañusqa kumpakapurqan. Ñoqataq pampaman wikch'ukuspa kunkayoqta mañakuspa qaparirqani: ¡Ay, Apu Señor Diosníy! ¿Israelpi pisi puchuqkunallatapas tukurqapunkichu? nispa. 14Señor Diosqa wakmantan nillawarqantaq: 15Qan, runaq churin, uyariway. Jerusalenpi tiyaq runakunan kamachi-kaypaq Babiloniaman apasqa llaqta-masiykikunamanta rimashanku: ¡Paykunaqa Señor Diosmanta karupin kashanku! Kay suyutataqmi ñoqanchisman Señor Diosqa qopuwanchis, nispanku. 16Chayrayku niy, Apu Señor Diosmi nin: Hinaña qankunata wak suyukunaman karu llaqtakunamanwan ch'eqechirqaykichis chaypas, ñoqa kikiymi qankunata chay suyukunapi yanapasqaykichis. 17Chayrayku, ñoqa Apu Señor Diosqa huñuykampusqaykichis ch'eqechisqay suyukunamanta kutichimpuspa, hinaspan kaqta Israel suyuta qopusqaykichis. 18Kaq Israel suyuman kutimpuspaykichismi wikch'upunkichis llapan millay rikch'aykunata cheqnikusqay idolokunatawan. 19Ñoqataqmi chay rumi sonqoykichista qechupusqaykichis, hinaspan huk mosoq sonqota, mosoq yuyaytawan qosqaykichis. 20Hinan kawsankichis kamachikuyniykunaman hina, hinaspa unanchayniykunata kasukunkichis. Qankunan kankichis llaqtay, ñoqataq kasaq Diosniykichis. 21Ichaqa pipas chay cheqnikusqay millay p'enqay idolokunaman k'askakuqtaqa ruwasqanman hinan muchuchisaq. Ñoqa Señor Diosmi sut'inta nini chayta, nispa. 22Chaymantataq querubinkunaqa phalaripurqan ruedankunantinpacha, Israelpa Diosninpa lliphlli-kaynintaq paykunaq hawanpi kasharqan. 23Hinaspan llaqtamanta t'aqarikapuspa llaqtaq inti lloqsimuy ladon orqo pataq hawanpi sayarqan. 24Chaymantan Diospa Espiritunqa hoqarispa Babiloniaman kutichimpuwarqan, maypichus wakin preso apasqakunapas kashasqanman. Chaytan rikhuriypi rikurqani Diospa Espiritun rikuchiwaqtin. Chaymantataq rikhuriyqa tukukapurqan. 25Ñoqataq preso apasqa kaqkunaman Señor Diospa lliw rikuchiwasqanta willarqani.

will be added

X\