1 Chaymanta rikullarqanitaq chay querubinkunaq uman pata p'altapi anqas umiñamanta tiyanaman rikch'akuqta. 2 Hinan Señor Diosqa yuraq qoysu p'achayoq runata nirqan: Haykuy querubinkunaq uranpi kaq ruedakunaq chawpinman, hinaspa nina sansata makiykipi horqomuy chay querubinkunaq ukhunmanta, llaqtaq patanmantaq hach'iykuy, nispa. Hinan rikurqani runaq haykusqanta. 3 Chay ratotaq querubinkunaqa sayasharqanku Dios yupaychana wasiq ura ladonpi, phuyutaq ukhu patiota hunt'aykurqan. 4 Chaymantataq Señor Diosqa lliphipispa querubinkunaq patanmanta hatarispa, yupaychana wasi punkuman rirqan. Hinan Dios yupaychana wasita phuyuqa hunt'aykurqan, pationpas k'ancharirqanraq Señor Diospa lliphlli-kayninwan. 5 Querubinkunaq raphranpa raphapapasqantaq hawa patiokamaraq uyarikurqan, Tukuy-atiyniyoq Diospas rimashanman hinaraq. 6 Linomanta yuraq qoysu p'achayoq runatan Señor Diosqa nirqan: Ruedakunaq ukhunmanta ninata horqomuy querubinkunaq chawpinmanta, nispa. Hinan runaqa rispa hukkaq ruedaq ladonpi sayaykurqan. 7 Huk querubintaq haywarispa chawpinkupi ninamanta sansata hoqarimurqan, hinaspan haywarimurqan linomanta p'achayoq runaman. Paytaq chayta chaskiykuspa ripurqan. 8 Chay querubinpa raphran ukhupitaq kasqa runaq makinman rikch'akuq. 9 Querubinkunawan kuskatataq tawa ruedata rikurqani, sapanka querubintaq huk ruedawankama kasqa. Chay ruedakunataq chhipipipisqa q'omer umiña hina. 10 Tawantin ruedakunaqa kikinkaman kasqa, sapanka ruedataq iskay rueda pasapunachisqaman rikch'akusqa. 11 Querubinkunaqa may cheqasmanpas puririyta munanku chayqa, puririllankuñan mana kutirispalla. 12 Cuerponkupas, wasankupas, makinkupas, raphrankupas, tawantin ruedankupas ñawikunawan hunt'aykusqan kasqa. 13 Ñoqa kikiymi uyarillarqanitaq tawantin ruedakunata: “Muyuylla-muyuq”, nispa sutichaqtapas. 14 Sapanka querubintaq tawa ladoman uyayoq kasqa: ñawpaqkaq uyanmi rikch'akusqa toro uyaman, iskaykaq uyataq rikch'akusqa runa uyaman, kinsakaq uyataq rikch'akusqa león uyaman, tawakaq uyataq rikch'akusqa anka uyaman. 15 Kay querubinkunaqa Quebar mayupi rikusqay kawsaqkunallapunin. Querubinkunataq phalaripurqan, 16 hinaspan paykuna puririqtin ruedakunapas puririllarqantaq, pampamantapas ruedantinpachan phalarillarqantaq. 17 Sayarpariqtinpas ruedakunaqa sayarparillarqantaq querubinkunawan huk espiritullayoq kasqankurayku. 18 Chaymantataq Señor Diosqa lliphipipispa yupaychana wasi patamanta hataripurqan, querubinkunaq hawanpitaq sayaykurqan. 19 Qhawashallaqtiytaq querubinkunaqa phalarirqanku ruedantinpacha, hinaspataq chayarqan Dios yupaychana wasiq inti haykuy lado punkunman. Israelpa Diosninpa lliphlli-kaynintaq paykunaq hawanpi k'ancharirqan. 20 Chaykunaqa kasqa Quebar mayu patapi Israelpa Diosninpa uranpi rikusqay kawsaqkunan, chayraqmi repararqani querubinkuna kasqanta. 21 Sapankataqmi karqan tawa uyayoq, tawa raphrayoq, raphrankuq ukhunpitaqmi runa makiman rikch'akuq kasqa. 22 Chay rikusqay querubinkunaq rikch'aynintaq karqan Quebar mayupi rikusqay kaqkunapuni. Sapankataq purisqaku ñawpaqen ladollaman.
