Ezequiel 1

1Kinsa chunkakaq wataq tawakaq killanpa phisqakaq p'unchayninpin kamachi-kaypaq apamusqa judío runakunapiwan ñoqa Ezequiel Quebar mayu patapi kasharqani. Chaypin rikurqani hanaq pacha kicharikuqta, hinaspan rikhuriypi Diosta rikurqani. 2Rey Joaquinpa kamachi kaypaq apamusqa kasqanmanta phisqakaq wataq, killaq phisqa p'unchayninpin 3Señor Diosqa rimaykuwarqan, ñoqa Buziq churin sacerdote Ezequielta Babilonia suyupi Quebar mayu patapi kashaqtiy. Hinan Señor Diosqa ñoqata rimaykuwarqan, chaymi llamiykuwasqanta, repararqani. 4Hinaspan rikushasqani wichaymanta tutuka hatun wayra hamushaqta. Manchay hatun phuyumantataq lliphllikimushasqa chikchi pukllaq hina, chaypa muyuriqninpitaq sinchi k'anchay wach'imushasqa. Chay lliphllikiqpa sonqonpitaq sinchi parichisqa metal hina sansashasqa. 5Chaypa chawpinpitaq runaman rikch'akuq tawa kawsashaqkuna kashasqa. 6Chaykunataq sapanka tawa uyayoq kasqa, tawa raphrayoq ima. 7Chakinkunataq kasqa cheqanlla, torillo hina phapatuyoq, k'anchasqataq allin llusk'achasqa bronce hina. 8Tawa uyayoq, tawa raphrayoq kasqankumantapas kallasqataqmi tawantin raphranpa uranpi tawa runa makikuna. 9Raphrankunataq paykunapura waqtanakusqa. Purispaqa manan kutiriqchu kasqa, aswanpas cheqanllatan purisqa. 10Chay tawa kawsashaqkunaq uyantaq kay hina kasqa: Ñawpaqen uyanmi runaq hina kasqa, paña lado uyantaq leonpa hina kasqa, lloq'e lado uyantaq toroq hina kasqa, wasan lado uyantaq ankaq hina kasqa. 11Sapanka kawsashaqpan iskaykama raphrankuna wichayman sayasqa, chay raphrakunataqmi paykunapura tupanakusqa, iskay raphrankuwantaqmi cuerponkuta pakakusqaku. 12Llapankutaq purisqaku ñawpaq ladollaman espirituq kamachisqanman hina mana kutirispa. 13Chay kawsashaqkunaq rikch'aynintaq kasqa rawrashaq sansa hina, otaq nina k'ancha hina. Paykuna chawpipitaq ninaqa qhaswashasqa, ninaq rawraynintaq kasqa sinchi k'anchaqpuni, chay ukhumantataq lliphllikimushasqa. 14Chay kawsashaqkunataq illapaq lliphllikiynin hinaraq phawaykachasqaku. 15Chay kawsashaqkunata qhawashaqtiymi sapankaq ladonpi huk ruedakama pampankupi kasqa. 16Tawantin ruedakunataqmi kasqankama kasqa, q'omer umiña hinaraqmi chhipipipisqapas. Sapanka ruedantaq iskay rueda pasapunachisqaman rikch'akusqa. 17Chaymi tawantin ruedakunaqa may ladomanpas mana kutirispalla purisqaku, kawsashaqkunaq may ladomanchus qhawasqanman hina. 18Ruedankunaq muyuriq patanqa hatuchaqmi, mancharikuyraqmi kasqa, muyuriqninpi ñawikunawan hunt'aykusqa. 19Chay kawsashaqkuna puririqtintaq, paykunawan kuska ruedakunaqa puririllasqataq, pampamanta phalariqtinpas ruedaqa phalarillasqataq. 20Chay kawsashaqkunaqa espirituq munasqanman hinan may ladomanpas puririq kasqa, ruedankupas paykunawan kuska puririsqa kawsaqkunawan huk espiritullayoq kasqankurayku. 21Kawsashaqkuna kuyuriqtinqa ruedakunapas kuyurillasqataq, paykuna sayarpariqtinqa ruedakunapas sayarparillasqataq, pampamantaña hatariqtinpas, ruedakunaqa hatarillasqataq paykunawan kuska, kawsashaqkunawan huk espiritullayoq kasqankurayku. 22Umanku patapitaq chhipipishaq hatun p'alta chhullunku hina mancharikuyraq kasqa. 23Chay p'altaq uranpitaq sapanka kawsashaqkunaqa iskay raphranta hukmanta-huk mast'anakusqa, iskay raphranwanñataq cuerponta pakakusqa. 24Uyarishallasqanitaq puririqtin raphranpa raphapapasqanta, chay ch'aqwaytaq karqan askha unuyoq mayu hina, Tukuy-atiyniyoqpa kunkan hina, askha soldadokunaq ch'aqwasqan hina. Sayaykuqtinkutaq raphranqa uraykullasqataq, 25chaywanpas patanpi p'altamanta huk suenay uyarikushallasqaraq. 26Chay p'alta patapitaq rikukusqa anqas umiñamanta tiyanaman rikch'akuq. Chay kamachikuy tiyana patapitaq runaman rikch'akuq tiyashasqa. 27Chawpi cuerponmanta wichaymantaq rikch'akusqa sinchi parichisqa sansashaq metalman hina, chaymanta uranmantaq ninaman rikch'akuq hina kasqa. Lliw muyuriqninpitaq sumaq k'anchay kasqa, 28paraqtin k'uychi ruwakun chayman rikch'akuq. Chay hina rikch'aypin Señor Diospa lliphlli-kaynin rikhuriwarqan. Rikurqospaytaq uyanpamanta kumpakurqani, hinaspan uyarirqani huk kunka rimaykamushawaqta.

will be added

X\