Éxodo 6

1Hinan Señor Diosqa Moisesta nirqan: –Kunanmi rikunki imatachus rey Faraonta ruwasaq chayta, ñoqan paytaqa astawan mat'isaq llaqtayta kacharinanpaq, manan kacharillasunkichischu, aswanpas pay kikinmi hallp'anmanta qarqosunkichis, nispa. 2Diosmi Moisesta nillarqantaq: –Ñoqan Señor Diosqa kani. 3Abrahamman, Isaacman, Jacobmanwantaq rikhurirqani Tukuy-atiyniyoq Dios nisqa sutiwan, Señor Dios nisqa sutiwanmi ichaqa mana paykunaman reqsichikurqaniraqchu. 4Paykunawanqa rimanakullarqanitaqmi Canaán hallp'ata paykunaman qonaypaq, chay suyupin wak llaqtayoq hina tiyarqanku. 5Hinallataqmi ñoqa yachani Israel runakunaq anchisqanta, Egipto runakunaq paykunata sinchita llank'anaman qatisqantapas. Yuyarillanitaqmi rimanakusqaytapas. 6Chaymi Israel runakunata ninki: –Ñoqan Señor Diosqa kani, Egipto suyupi nanaq llank'anamantan horqosqaykichis, kamachi kasqaykichismantan kacharichisqaykichis, ancha atiyniywanmi qespichisqaykichis Egipto runakunata sinchita muchuchispa. 7Hinaspan llaqtay kanaykichispaq chaskikapusqaykichis, Diosniykichistaq kasaq. Qankunataq yachankichis ñoqa Diosniykichis Señor Dios kasqayta, Egipto suyupi nanaq llank'achisqasuykichismanta horqoqniykichis kasqayta. 8Abrahamman, Isaacman, Jacobmanwan qonaypaq prometesqay suyumanmi pusaykusqaykichis, ñoqan chayta herenciaykichis kananpaq qosqaykichis. Ñoqan kani Señor Diosqa, nispa. 9Chaytan Moisesqa Israel runakunaman willarqan, paykunataq ichaqa Moisesta mana kasurqankuchu sinchi llank'achisqawan sonqonku nanachisqa kasqankurayku. 10Señor Diostaq Moisesta nirqan: 11–Rispayki Egipto suyu rey Faraonta nimuy: Israel runakunata suyuykimanta ripunanpaq kacharipuy, nispa. 12Hinan Moisesqa Señor Diosman kutichirqan: –Israel runakunaqa manan uyarillawankupaschu, ¿chaychu rey Faraonqa kasuwanman, ñoqa mana kusa rimaq kashaqtiy? nispa. 13Chaymi Señor Diosqa Moisestawan Aarontawan kamachirqan Israel runakunata rey Faraontawan kay hinata nimunankupaq: Señor Diosmi Israel runakunata Egipto suyumanta horqonaykupaq kamachimuwarqanku, nispa. 14Kaykunan ayllu taytakuna: Israelpa phiwin Rubenpa churinkuna: Hanoc, Falú, Jezrón, Carmipiwan. Chaykunan Rubenpa ayllunkuna. 15Simeonpa churinkuna: Jemuel, Jamín, Ohad, Jaquín, Zohar, Canaán warmiq churin Saulpiwan. Chaykunan Simeonpa ayllunkuna. 16Leviqa pachak kinsa chunka qanchisniyoq watatan kawsarqan. Kaykunan Levipa churinkunaq sutin, kurakmanta sullk'akama: Gersón, Cohat, Meraripiwan. 17Gersonpa churinkuna ayllunkuman hina: Libniwan Simeipiwan. 18Cohatmi pachak kinsa chunka kinsayoq watata kawsarqan, churinkunataq Amram, Izhar, Hebrón, Uzielpiwan karqan. 19Merariq churinkuna: Mahaliwan, Musiwan. Chaykunan Levipa ayllunkuna, kurakmanta sullk'akama. 20Amrammi Jocabed tianwan casarakurqan, paymi wachakurqan Aarontawan Moisestawan. Amrammi pachak kinsa chunka qanchisniyoq watata kawsarqan. 21Izharpa churinkuna: Coré, Nefeg, Zicripiwan. 22Uzielpa churinkuna: Misael, Elzafán, Sitripiwan. 23Aaronmi Aminadabpa ususin Elisabetwan casarakurqan, paymi Naasonpa panan karqan, wachakurqantaq Nadabta, Abiuta, Eleazarta, Itamartawan. 24Corepa churinkuna: Asir, Elcana, Abiasafpiwan. Chaykunan Coré runakunaq ayllunkuna. 25Aaronpa churin Eleazartaq Futielpa huknin ususinwan casarakurqan, paymi Fineesta wachakurqan. Chaykunan Leví runakunaq taytankuna, ayllunkuman hina. 26Aarontawan Moisestawanmi Señor Diosqa nirqan: –Egipto suyumanta Israel runakunata t'aqa-t'aqata horqomuychis, nispa. 27Paykunan Egipto suyu rey Faraonta rimapayarqanku, chay suyumanta Israel runakunata horqomunankupaq. 28Señor Diosqa Egipto suyupi Moisesta rimaykuspan 29nirqan: –Ñoqan Señor Diosqa kani, Egipto suyu rey Faraonman nimuy lliw imaymanata qanman nisqayta, nispa. 30Moisestaq Señor Diosman kutichirqan: –Manan ñoqaqa kusa rimaqchu kani, ¿chaychu rey Faraonqa kasuwanman? nispa.

will be added

X\