1 Chay hinallataqmi Señor Diosqa allin yachaq artesanokunaman yachaytapas yuyaytapas qorqan karpatapas tukuy imaymanantinta ruwanankupaq. Chay hinaqa, Bezaleelpas, Aholiabpas, chay artesanokunapas Señor Diospa kamachikusqanta hinan ruwanqaku, nispa. 2 Hinan Moisesqa waqyarqan Bezaleelta Aholiabtawan llank'ayta munaq llapa allin yachaq artesanokunatawan, paykunamanmi Señor Diosqa yachayta qorqan. 3 Paykunan Moisesmanta chaskirqanku Israel runakunaq llapa ofrenda apamusqankuta, karpata ruwanankupaq. Israel runakunataq sapa paqar tukuy sonqo ofrendata apamusharqanku. 4 Hinan karpapaq tukuy ruwaq llapa yachayniyoqkunaqa ruwasqankuta saqeykuspakama rirqanku, 5 hinaspan Moisesta nirqanku: –Llaqtaqa aswan askhatan apamushan Señor Diospa kamachikusqanta ruwanapaq, nispa. 6 Chaymi Moisesqa karpa-karpantinpi willachirqan: –Amaña pi qharipas warmipas karpapaq ofrendata apamuchunkuñachu, nispa. Chhaynatan llaqtata hark'arqan astawan ofrendata apamunankuta. 7 Llapanta ruwanapaqqa tukuy imapas askhapunin karqan, puchurqanraqmi kanpas. 8 Llank'aqkuna ukhupi kusa away yachaqkuna chunka cortinamanta karpata ruwarqanku, chaykunan awasqa karqan ñañuy-ñañu linomanta, llawlli-puka q'aytumanta, sani-puka q'aytumanta, rawraq-puka q'aytumantawan. Chaykunatan querubinkunaq rikch'aynin munay pallayniyoqta awarqanku. 9 Sapanka cortinan chunka iskayniyoq metro phisqa chunka centímetro sayayniyoq karqan, iskay metro anchoyoqtaq. Llapa cortinan chay sayaykama karqan. 10 Phisqa cortinatan ch'antaspa sirarqanku, kaqllatataqmi wakin phisqa cortinatapas ch'antaspa sirarqanku. 11 Hinaspan ñawpaq t'aqa tukukuy cortina puntapi llawlli-puka q'aytu ninrichasqakunata churarqanku, iskaykaq t'aqa cortina puntapipas churallarqankutaqmi. 12 Phisqa chunka ninrichasqakunatan ñawpaqkaq t'aqa cortinapi ruwarqanku, phisqa chunka ninrichasqallatataq iskaykaq t'aqa cortina puntapipas. Ninrichasqakunaqa chimpapurantinmi karqan. 13 Ruwallarqankutaqmi phisqa chunka qori ganchotapas, chaykunawanmi iskaynin t'aqa cortinata huñuykurqanku, chhaynapin ch'ulla karpalla kapurqan. 14 Bezaleelqa karpata qatanapaq ruwallarqantaqmi cabra suphumanta chunka hukniyoq cortinakunatapas. 15 Sapanka cortinan chunka kinsayoq metro phisqa chunka centímetro sayayniyoq karqan, iskay metro anchoyoqtaq. Llapa cortinan chay sayaykama karqan. 16 Phisqa cortinatan ch'antaspa sirarqan, soqta cortinatapas ch'antaspallataq sirarqan. 17 Ñawpaq t'aqa tukukuy cortina puntapipas ruwallarqantaqmi phisqa chunka ninrichasqakunata, iskaykaq t'aqa tukukuy cortina puntapipas phisqa chunka ninrichasqakunallatataq. 18 Ruwallarqantaqmi phisqa chunka bronce ganchokunatapas qatata huñunapaq, ch'ullalla kananpaq. 19 Karpapaqqa ruwallarqantaqmi qatata puka teñisqa anejo qarakunamanta, patanpaqpas llamp'uy-llamp'u qarakunamanta huk qatata. 20 Karpapaqqa ruwallarqantaqmi acacia tablamanta marcokunata, chaykunatan allinta sayachirqan. 21 Sapanka marcon tawa metro phisqa chunka centímetro sayayniyoq karqan, soqta chunka phisqayoq centímetro anchoyoqtaq. 22 Sapanka marcon iskay chakiyoq karqan. Chay hinatan llapa marcota karpapaq ruwarqan. 23 Marcokunataqa kay hinatan karpapaq ruwarqan: Iskay chunka marcota uray ladopaq. 24 Ruwallarqantaqmi tawa chunka qolqe sayanata iskay chunka marcopaq, sapanka marcopaq iskay sayanata iskaynin chakipaq. 25 Hinallataq karpaq hukkaqnin ladopaqpas, wichay ladopaqpas, iskay chunka marcokunata ruwarqan, 26 tawa chunka qolqe sayanantinta ruwarqan, sapanka marco iskay sayanayoq kananpaq. 27 Karpaq qhepanpaqtaq, inti haykuy ladopaq, soqta marcota ruwarqan. 28 Iskay marcotawan karpaq qhepa esquinankunapaq ruwarqan. 29 Chay marcokunaq uranmi anchorisqa karqan, umantaq huk anillollaman suskhurqan, chhaynatan ruwarqan chay iskay marcotapas iskaynin esquinapaq. 30 Chay hinaqa, pusaq marcon karqan chunka soqtayoq qolqe sayanayoqkama, sapanka marco iskay sayanayoqkama. 31 Ruwallarqantaqmi acacia kurkumanta phisqa suskhuq k'aspikunata karpaq huknin lado marcokunapaq, 32 hinallataq phisqa suskhuq k'aspikunata karpaq hukkaqnin lado marcokunapaqpas, phisqa suskhuq k'aspikunata karpaq qhepan lado marcokunapaqpas, inti haykuy ladopaq. 33 Ruwallarqantaq chawpinta puriq k'aspitapas huk esquinamanta huk esquinakama marcokunaq kuskanninta suskhunanpaq. 34 Hinamantataq chay marcokunata qori llaphllawan k'uyurqan, ruwallarqantaqmi qori argollakunatapas, chay argollakunanta k'aspikuna suskhunanpaq. Chay suskhuq k'aspikunatapas qori llaphllallawantaqmi k'uyurqan. 35 Ruwallarqantaqmi cortinatapas llawlli-puka q'aytumanta, sani-puka q'aytumanta, rawraq-puka q'aytumanta, ñañuy-ñañu linomantawan, chaytaqa querubinkunaq rikch'aynin munay pallayniyoqtan ruwarqan. 36 Hinaspan qori ganchokunawan chayta warkurqan qoriwan k'uyusqa tawa sayaq acacia k'aspikunaman, chaykunapaqmi tawa qolqe sayanakunata ruwarqan. 37 Huk cortinatapas karpa punkupaq ruwallarqantaqmi llawlli-puka q'aytumanta, sani-puka q'aytumanta, rawraq-puka q'aytumanta, ñañuy-ñañu linomantawan, munay pallayniyoqta. 38 Ruwallarqantaqmi phisqa sayaq k'aspikunatapas ganchoyoqtakama phisqa bronce sayanakunantintakama, sayaq k'aspikunaq umantataq suskhuq k'aspinkunatawan qoriwan k'uyurqan.
