Éxodo 31

1Señor Diosmi Moisesta nirqan: 2–Ñoqan Judá ayllumanta Hurpa nieton Uriq churin Bezaleelta akllani, 3hinaspan Espirituywan hunt'aykuni, yachaywan, yuyaywan, reqsiywan, tukuy ruway atiywan, 4qoripi, qolqepi, broncepi llank'ananpaq seq'ekunata kamarinanpaq, 5umiña rumikunata thupaspa ch'olqochinanpaq, kurkuta llaqllananpaq, tukuy imaymanata llank'ananpaqwan. 6Ñoqan Dan ayllumanta yanapaqninta churani Ahisamacpa churin Aholiabta. Llapan artesanokunatataq yachachini tukuy imaymanata qanman kamachisqayta ruwanankupaq: 7Dioswan Tupana Karpata, kamachikuy simiyoq arcata, arca kirpanata, karpapi tukuy imaymanatawan, 8mesata imaymanantinta, ch'uya qorimanta candelerota tukuy imaymanantinta, incienso ruphachina altarta, 9sacrificio ruphachina altarta tukuy imaymanantinta, tiyanayoq puruñata, 10sacerdote Aaronpa pallayniyoq ch'uya p'achankunata, sacerdote kanankupaq churinkunaq p'achankunata, 11hawina aceiteta, Ch'uya Cheqaspaq q'apaq inciensotawan. Tukuy imatapas qanman kamachisqayta hinan ruwanqaku, nispa. 12Señor Diosmi Moisesta nirqan: 13–Qanmi Israel runakunata nimunki, Señor Diosmi nin: Qankunaqa samana p'unchayniykunata waqaychankichispunin, chayqa wiñay-wiñaypaq ñoqawan qankunawan señalmi, ñoqa Señor Dios qankunata akllakusqayta yachanaykichispaq. 14Samana p'unchaytan waqaychankichis, chaytan qankunapaq t'aqasqata qhawankichis. Chay p'unchayta sarunchaqqa wañuchisqapunin kanqa, pipas chay p'unchaypi imatapas llank'aqqa wañuchisqapunin kanqa. 15Soqta p'unchaymi llank'ankichis, qanchiskaq p'unchaytaqmi ñoqa Señor Diospaq t'aqasqa hatun samana p'unchay kanqa. Pipas chay p'unchaypi llank'aqqa wañuchisqapunin kanqa. 16Israel runakunan samana p'unchayta waqaychanqaku, mana qonqaspan waqaychashallanqakupuni wiñaypaq rimanakuyta hina. 17Chayqa ñoqawan Israel runakunawan wiñaypaq señalmi kanqa. Soqta p'unchaymi ñoqa Señor Diosqa hanaq pachatapas kay pachatapas ruwarqani, qanchiskaq p'unchaytaqmi mana llank'arqanichu, aswanpas samakurqanin, nispa. 18Sinaí orqopi Moiseswan rimayta tukuspataq, Señor Diosqa dedonwan qelqasqa kamachikuy simiyoq iskay p'alta rumita Moisesman qorqan.

will be added

X\