1 Ruwallankitaqmi acacia kurkumanta altartapas tawa esquinayoqta, tawa ladoyoqta, sapanka ladon iskay metro iskay chunka phisqayoq centímetro kanqa, sayaynintaq huk metro iskay chunka phisqayoq centímetro kanqa. 2 Tawantin esquinapin huk waqratakama ruwanki, tawantinmi altarwan kuskalla kanqa. Altartataq bronce llaphllawan qatanki. 3 Tukuy imaymanatapas altarpaqqa broncemantan ruwanki: Uspha mankakunata, palakunata, puruñakunata, trinchekunata, sansa apanakunata, 4 bronce rejillatapas. Rejillaq tawantin esquinanpaqtaq tawa bronce argollakunata ruwanki. 5 Hinaspa chay rejillata altar ukhupi chakanki, chay hinapin rejillaqa altar chawpipi chakarayanqa. 6 Ruwallankitaqmi altarpaqqa acacia kurkumanta wantuna k'aspikunata, chaykunatan bronce llaphllakunawan k'uyunki. 7 Wantuna k'aspikunaqa argollakunantan suskhunqa, hinan chay wantuna k'aspikunaqa altarpa iskaynin ladonpi kashanqa wantuqtinku. 8 Altartaqa tablamantan ch'usaq ukhuyoqta ruwanki, kay orqopi qhawachirqayki chay kikillantan ruwanki. 9 Ruwallankitaqmi karpapaq kanchatapas. Uray lado kanchaqa ñañuy-ñañu lino cortinakunayoqmi kanqa, tawa chunka phisqayoq metroman chutarikuq. 10 Iskay chunka postenkunaqa bronce sayanayoqkaman kanqa, postekunaq ganchonkunapas umankunapas qolqemantan kanqa. 11 Hinallataqmi wichay ladoqa tawa chunka phisqayoq metroman chutarikuq cortinakunayoq kanqa, iskay chunka postekunaqa bronce sayanayoqkaman kanqa, postekunaq ganchonkunapas umankunapas qolqemantan kanqa. 12 Inti haykuy ladoqa iskay chunka kinsayoq metro cortinakunayoqmi kanqa, kanchaq anchonman chutasqa, chunka postekuna sayanantinkama. 13 Inti lloqsimuy ladopipas, kanchaq anchonpiqa, iskay chunka kinsayoq metro cortinakunan kallanqataq. 14 Punkuq huknin ladopiqa qanchis metro cortinakunan kanqa, kinsa postekuna sayanantinkama. 15 Hukkaqnin ladopipas qanchis metro cortinakunan kallanqataq, kinsa postekuna sayanantinkama. 16 Kancha punkupitaq isqon metro cortina kanqa, ñañuy-ñañu linomanta, llawlli-puka, sani-puka, rawraq-puka q'aytumantawan munay pallayniyoq awasqa. Tawa postekunan sayanantinkama kanqa. 17 Kancha muyuriq llapa posteqa qolqewan chumpisqan kanqa, ganchonkuna qolqemanta, sayanankunataq broncemanta. 18 Kanchaq wask'anqa tawa chunka phisqayoq metron kanqa, huknin lado ancho iskay chunka kinsayoq metro, hukkaqnin ladopas iskay chunka kinsayoq metrollataq, sayaynintaq iskay metro iskay chunka phisqayoq centímetro. Cortinakunaqa ñañuy-ñañu linomantan kanqa, sayanankunataq broncemanta. 19 Karpapi yupaychanapaq tukuy imaymanapas broncemantakaman kanqa, hinallataq llapa takarpupas, kancha chutanapaq takarpukunapas. 20 Israel runakunata kamachiy olivo ch'irwasqa ch'uya aceiteta k'anchaqpaq apamunasuykikupaq, lámpara k'anchashanallanpaqpuni. 21 Chay lamparan huñunakuy karpapi kashanqa, kamachikuy simiyoq arcaq ñawpaqen cortinaq huk ladonpi, chaytan Aaronwan churinkunawan ñoqa Señor Diospa ñawpaqeypi tutantin qhawanqaku. Chayqa Israel runakunapaq mirayninkunapaqwan wiñaypaq kamachikuy simin.
