1 Señor Diosmi Moisesta nirqan: 2 –Israel runakunata nimuy ñoqapaq ofrendata apamunankupaq. Ofrendataqa chaskipuwankichis pipas tukuy sonqo apamuqmantan. 3 Kaykunatan chaskinkichis: Qorita, qolqeta, cobreta, 4 llawlli-puka q'aytuta, sani-puka q'aytuta, rawraq-puka q'aytuta, ñañuy-ñañu lino q'aytuta, cabra suphuta, 5 puka teñisqa anejo qarakunata, llamp'uy-llamp'u qarakunata, acacia sach'a kurkuta, 6 lamparakunapaq aceiteta, hawina aceitepaqpas q'apashaq inciensopaqpas sumaq q'apaqkunata, 7 yanayoq yuraq umiña rumikunata, umiña rumikunatapas uma sacerdoteq unkunman qhasqo ch'uspanmanwan ch'olqochinapaq. 8 Hinaspan yupaychana karpata ruwapuwanqaku paykuna ukhupi tiyanaypaq. 9 Chay tiyanaytaqa tukuy imaymanantapas ruwankichis imaynatachus qanman rikuchisqayki chay kikillantan. 10 Acacia kurkumantan arcata ruwanki, wask'anmi huk metro chunka centimetroyoq kanqa, anchonmi soqta chunka phisqayoq centímetro, sayaynintaq soqta chunka phisqayoq centímetro. 11 Ukhunta hawantan ch'uya qori llaphllawan qatanki, ch'uya qoriwanmi chay patata muyuriqta ribetenki. 12 Ruwallankitaqmi chaypaq tawa qori argollata, chaykunatan tawantin chakiman churanki, iskayta huknin qhataman iskaytataq hukkaqnin qhataman. 13 Acacia kurkumanta k'aspikunatan ruwanki, chaykunatan qori llaphllawan k'uyunki. 14 Hinaspan arca qhatapi kaq argollakunanta chay k'aspikunata suskhuchinki, chaykunawan arcata wantunankupaq. 15 Chay k'aspikunaqa arca qhatakunapin kanqa, manan chaymanta horqokunqachu. 16 Chay arcapitaqmi churanki qanman qosqayki chay kamachikuy simi qelqasqa iskaynin p'alta rumikunata. 17 Ruwallankitaqmi ch'uya qorimanta arca kirpanatapas, hucha pampachana cheqas kananpaq, wask'anmi huk metro chunka centimetroyoq kanqa, anchontaq soqta chunka phisqayoq centímetro. 18 Kirpanaq iskaynin puntanpi qorimanta takasqa iskay querubinkunatapas ruwallankitaqmi. 19 Huknin puntapin huk querubinta ruwanki, hukkaqnin puntapitaq hukkaq querubinta, kirpanatawan iskaynin puntapi querubinkunatawanqa hukllatañan ruwanki. 20 Hucha pampachana cheqaspi qhawanakushaqmi kashanqa, querubinkunataq k'umuykuspa hucha pampachanata qhawashanqaku, chay cheqaspa patanman raphrankuta mast'arispataq llanthuykunqaku. 21 Kirpanatataq arca pataman churanki, arcapitaq qanman qosqay kamachikuy simi qelqasqa iskaynin p'alta rumikunata churanki. 22 Hucha pampachana cheqaspin qanwan tupasaq, hinaspan arca patapi iskaynin querubinkuna ukhumanta qanwan rimasaq Israel runakunapaq imakunatachus qanman kamachisqayta. 23 Hinallataqmi acacia kurkumanta mesata ruwanki, wask'anmi huk metro kanqa, anchontaq kuskan metro, sayaynintaq qanchis chunka centímetro. 24 Ch'uya qori llaphllawanmi chayta qatanki, qoriwanmi muyuriq patanta ribetenki. 25 Mesa puntatan qanchis centímetro anchoyoqta kanchachanki, chaytataq ruwanki qori ribetewan muyuchisqata. 26 Ruwallankitaqmi tawa qori argollatapas, chaykunatan tawantin chaki qhataman churanki. 27 Argollakunaqa puntawan kuskan kanqa, mesa wantuna k'aspikuna chaykunata suskhunanpaq. 28 Mesa wantuna k'aspikunataqa acacia kurkumantan ruwanki, qori llaphllawanmi chaykunata k'uyunki, chaykunawanmi mesaqa apasqa kanqa. 29 Ch'uya qorillamantataqmi ruwanki qhata p'ukukunata, pocillokunata, vino hich'ana ofrendakunapaq vasokunata, p'uktu p'ukukunatawan. 30 Chay mesa patapiqa ñawpaqeypi churanaykichis t'antataqa churallankichispunin. 31 Ruwallankitaqmi ch'uya qori candelerotapas, candelerotaqa takasqatan ruwanki. Tiyananpas, k'aspinpas, t'ikankunapas, mukmunkunapas, phanchisqankunapas kikillanmantan kanqa. 32 Soqta k'allman ladonkunapi kanqa: Kinsa k'allma huknin ladopi, kinsa k'allmataq hukkaq ladopi. 33 Candelero k'aspimanta p'alqariq soqtantin k'allman almendro t'ika hina kinsa t'ikayoqkama kanqa, mukmuntin phanchisqantin. 34 Candelero chawpi k'aspipipas almendro t'ika hina tawa t'ikayoqmi kanqa, mukmukunantin phanchisqakunantin. 35 Sapa iskay k'allman chawpi k'aspipi huk mukmu patapi tiyanqa. 36 Mukmunkunapas k'allmankunapas kikillanmantan chawpi k'aspipi kanqa, llapallanmi ch'uya qorimanta huk piezalla takasqa kanqa. 37 Ruwallankitaqmi qanchis lamparachakunatapas, chaykunatan k'allma patamankama churanki ñawpaqman k'anchananpaq. 38 Pábilo allichanakunapas uspha p'ukuchakunapas ch'uya qorimantan kanqa. 39 Kinsa chunka kinsayoq kilo ch'uya qorimantan ruwanki candelerota tukuy imaymanantinta. 40 Chaykunataqa orqopi qhawachirqayki chay kikillantapunin ruwanki.
