Éxodo 24

1Señor Diosmi Moisesta nirqan: –Maypichus kashasqayman wichamuy, qanpas, Aaronpas, Nadabpas, Abiupas, Israel qanchis chunka kurak runakunapiwan, karumantataq qonqorikamuwankichis. 2Qanllan asuykamuwanki, hukkunaqa aman asuykamuwanqakuchu, llaqtapas aman qanwanqa wichamunqachu, nispa. 3Chaymantataq Moisesqa rirqan hinaspan Señor Diospa llapa kamachikuy siminkunatapas chaninchayninkunatapas llaqtaman willarqan. Chaymi llaqtallantin huk-nisqalla rimarirqanku: –¡Señor Diospa llapa kamachikusqantan hunt'asaqku! nispa. 4Hinan Moisesqa Señor Diospa llapa kamachikusqanta qelqarqan. Tutamanta sayarispataq altarta orqo k'uchupi perqarqan, hinallataq chunka iskayniyoq rumikunatapas sayachirqan, Israelpa chunka iskayniyoq ayllunman hina. 5Hinaspan waynakunata kacharqan, paykunan Señor Diosman haywarqanku ruphachina sacrificiokunata, sumaq kawsay sacrificio haywana torokunatapas. 6Moisesmi kuskan yawarta hoqarispa puruñakunaman hich'aykurqan, huk kuskan yawartataq altarman hich'aykurqan. 7Chaymantataq Rimanakuy Qelqata hap'ispa llaqta uyarishaqtin leerqan, hinan llaqtaqa nirqan: –Señor Diospa tukuy imaymana kamachikusqantan hunt'asaqku, kasukusaqku, nispa. 8Chaymi Moisesqa runakunata yawarwan ch'aqchuspa nirqan: –Tukuy chay simikunaman hinan Señor Diosqa qankunawan rimanakun, kay yawarmi rimanakuyta cheqaqchan, rimanakuy yawar kasqanrayku, nispa. 9Moisestaq orqoman wicharqan Aaronwan, Nadabwan, Abiuwan, Israel qanchis chunka kurak runakunapiwan. 10Chaypin Israelpa Diosninta rikurqanku, chaki sarunanpin karqan yana q'omer umiña mast'asqa hina, hanaq pacha hina “ch'ak” nisqa, 11ichaqa manan kay akllasqa Israel runakunata Diosqa imanarqanpaschu. Paykunan Diosta rikurqanku, hinaspan mikhurqanku ukyarqanku. 12Señor Diosmi Moisesta nirqan: –Orqoman wichamuy, chaypi suyamuway, p'alta rumikunatan qomusqayki, chaykunapin qelqani kamachikuy simikunatapas yachachikuykunatapas Israel runakunata yachachinapaq, nispa. 13Hinan Moisesqa sayarispa yanapaqnin Josuepiwan Diospa orqonman wicharqan. 14Kurak runakunatataq Moisesqa nirqan: –Kutimunaykukama kaypi suyashawankiku. Kaypin qankunawan qhepashan Aaronwan Hurwan, piqpapas ima sasachaypas kaqtinqa, paykunaman qayllaykuchun, nispa. 15Hinaspan Moisesqa orqoman wicharqan, phuyutaq orqota pakaykurqan. 16Señor Diospa lliphlli-kaynintaq Sinaí orqo pataman tiyaykamurqan, soqta p'unchaynintintaq orqota phuyuykurqan. Qanchiskaq p'unchaytataq Señor Diosqa phuyu ukhumanta Moisesta waqyamurqan. 17Señor Diospa lliphlli-kaynintaq rawrashaq nina hina Israel runakunaman orqo patapi rikhurirqan. 18Moisesmi phuyu ukhuman haykurqan, hinaspan orqo pataman wicharqan, chaypin payqa tawa chunka p'unchayta tawa chunka tutatawan qhepakurqan.

will be added

X\