Éxodo 23

1Aman llullakuspa rimarinkichu, amallataq huchallikuqwanpas llulla testigo kanaykipaq rimanakunkichu. 2Aman askha runata qatikunkichu mana allinta ruwanapaq, amallataq quejanakuypi askhawan aysachikunkichu chaninchaymanta t'aqakuspayki, 3amallataq wakchamanpas sayapakunkichu. 4Awqaykiq chinkasqa torontapas asnontapas tarinki chayqa, kutichipunkin. 5Cheqnikuqniykiq asnontachus cargaq ñit'isqanta rikunki chayqa, yanapaykunkipunin sayariysichinkipunin. 6Wakcha runaq quejakuspa uyarichikusqantaqa chaninchankipunin. 7Aman yanqa tumpaytaqa kasunkichu, amataqmi wañuchinkichu mana huchayoqtapas chanintapas, chay hinata chaninchayta q'ewiqtaqa huchachasaqpunin. 8Aman lluk'iykusqata chaskikunkichu, lluk'iykuyqa runatan qhawaq ñawsaman tukuchin, chaninkunaq rimasqantapas waqllichintaqmi. 9Aman wak llaqtayoqtaqa sarunchankichu, qankunaqa yachankichisñan wak suyupi tiyayta, Egipto suyupin wak llaqtayoq runa kamurqankichis. 10Soqta watan chakraykita tarpunki, rurusqantapas hoqarinki. 11Qanchiskaq watapitaqmi samachinki, chay chakramanta llaqtayki wakcha runakuna mikhunanpaq, puchuqtataq salqa animalkuna mikhunqa. Chay hinallataqmi saqenki uvas chakraykikunatapas olivo sach'aykikunatapas. 12Soqta p'unchaymi llank'anki, qanchiskaq p'unchaytaqmi samakunki, toroykipas asnoykipas samananpaq, wasiykipi naceq qhari kamachiykipas wak llaqtayoqpas samakunanpaq. 13Tukuy ima qankunaman kamachisqaytan kasukunkichis. Aman wak dioskunaq sutinta hoqarinkichischu, amallataqmi rimarinkichispaschu. 14Kinsa kutitan watapi fiestata ruwapuwanki. 15Mana Qonchuyoq T'anta Fiestata ruwanki. Qanta kamachisqayman hinan qanchisnintin p'unchayta mana qonchuyoq t'antata mikhunki Abib killapi churasqa p'unchaykunapi, chay killapin Egipto suyumanta lloqsimpurqanki. Manan pipas mana ima apantinqa qayllaykamuwanqachu. 16Tarpusqayki ñawpaqkaq rurusqan Cosecha Fiestatapas ruwallankitaqmi. Hinallataq tukuy tarpusqaykita cosechaspayki, Cosecha Tukukuy Fiestatapas ruwanki. 17Watapi kinsantin fiestapin llapa qhari ñoqa Apu Señor Diosman qayllaykamuwanqa. 18Aman sacrificapuwasqayki animalpa yawarninta qonchuyoq t'antatawan haywawankichu, amallataqmi wirantapas paqarisninkama waqaychankichu. 19Chakraykiq allinnin ñawpaq rurusqantan ñoqa Señor Diosniykiq wasiyman apamunki. Aman uña cabrata mamanpa lechenpi t'impuchinkichu. 20Ñoqan angelniyta ñawpaqeykita kachasaq ñanpi waqaychanasuykipaq, qanpaq wakichisqay suyuman pusaykunasuykipaqwan. 21Makilla payta uyariy, simintapas kasukuy. Ama mana kasukuqchu kay, payqa manan mana kasusqaykitaqa pampachanqachu, payqa sutiypin kamachikushan. 22Simintachus maki uyarinki, hinaspa lliw ima nisqaytapas ruwanki chayqa, awqaykikunaq awqanmi kasaq, contrayki kaqkunaq contranmi kasaq. 23Angelniymi ñawpaqeykita rinqa, hinaspan Amor runakunaq, Het runakunaq, Ferez runakunaq, Canaán runakunaq, Hev runakunaq, Jebus runakunaq suyunkuman pusaykusunki, paykunatan ñoqa chinkachipusaq. 24Aman diosninkuman k'umuykukunkichu, amallataq chaykunata yupaychankipaschu. Aman chay runakuna hina yupaychankichu, aswanpas llapan diosninkutan ch'usaqyachinki, yupaychana saywa ruminkutapas llapallantan p'akirqarinki. 25Ñoqa Diosniyki Señor Diostan yupaychawanki, ñoqan t'antaykitapas unuykitapas saminchasaq, manataqmi ima onqoywanpas hap'ichisqaykichu. 26Manan llaqtaykipi malpariq warmi kanqachu, manallataq mana wachakuqpas. Ñoqan unayta kawsachisqayki. 27Ñoqan ñawpaqeykipi kaq runakunata manchapachisaq, hinallataq mayqen haykusqayki llaqtatapas sinchitapuni llakichisaq, llapa awqaykitapas qayllaykimantan qatirisaq. 28Hev runakunata, Canaán runakunata, Het runakunata q'aqchasaq qayllaykimanta ayqenankupaq. 29Manan huk watallapichu suyumanta paykunata wikch'usaq ama hallp'a purunyananpaq, ama salqa animalkunapas mana allinniykipaq askhayananpaq. 30Pisi-pisimantan qayllaykimanta wikch'usaq askhayanaykikama, hinaspa hallp'aman hunt'aykunaykikama. 31Qorpaykikunatan señalasaq Puka Qochamanta Filistea runakunaq suyun lamar-qochakama, ch'inneqmanta Eufrates mayukama. Qanmanmi hap'ichisqayki chay suyupi tiyaqkunata, qantaqmi qayllaykimanta paykunata wikch'unki. 32Aman paykunawan rimanakunkichu, amallataq diosninkuwanpas. 33Aman hallp'aykipi tiyanqakuchu, contrayta mana huchallichinasuykipaq, diosninkutachus yupaychanki chayqa, waqllinkipunin, nispa.

will be added

X\