Éxodo 19

1Egipto suyumanta Israel runakunaq lloqsipusqan kinsakaq killa qallariy p'unchaypin Sinaí ch'inneqman chayarqanku. 2Refidimmanta puririmuspan Sinaí ch'inneqman chayarqanku, chaypin Israel runakunaqa orqo chimpapi karpakurqanku. 3Moisestaq Diosman orqota wicharqan, hinan Señor Diosqa orqomanta waqyamuspa nirqan: –Jacobpa mirayninmanmi nimunki, Israel runakunamanmi willamunki: 4Qankunan rikurqankichis imatachus Egipto runakunata ruwasqayta, imaynatachus ankaqa chiwchinkunata raphranpi q'epin chay hinata qankunata hoqarikampuspa apakampusqayta. 5Kunanqa, kasuwaspaykichis rimanakusqaytapas hunt'ankichis chayqa, qankunan llapa llaqtakunamanta aswan chaniyoq llaqtay kankichis, ñoqaqmi lliw kay pachantinqa. 6Qankunan kamachinay sacerdotekuna kankichis, ñoqapaq t'aqasqa llaqta, nispayki. Chay simikunatan Israel runakunaman nimunki, nispa. 7Hinan Moisesqa rispa llaqtapi kurak runakunata waqyamurqan, hinaspan payman Señor Diospa tukuy kay kamachimusqankunata paykunaman willarqan. 8Hinaqtinmi llapallanku huk-nisqalla kutichispa nirqanku: –Señor Diospa tukuy kamachikusqantan ruwasaqku, nispa. Moisestaq Señor Diosman willamurqan runakunaq rimarisqanta. 9Señor Diosmi Moisesta nirqan: –Ñoqan ati-phuyupi hamusqayki, qanwan rimashaqta runakuna uyarinanpaq, ahinapi tukuy tiempo creenasuykikupaq, nispa. Moisestaq runakunaq rimarisqanta Señor Diosman willamurqan. 10Chaymi Señor Diosqa payta nirqan: –Rispa kunantawan paqarintawan paykunata ch'uyanchachimuy, p'achankutapas t'aqsakuchunku, 11hinaspa minchhapaq wakichikuchunku, chay p'unchaytan ñoqa Señor Diosqa lliw runakuna rikushaqtin Sinaí orqo pataman uraykamusaq. 12Orqo muyuriqmantaq qorpata churanki ama runa pasamunanpaq, hinaspa nimunki: Paqtataq orqota wichawaqchis, orqo k'uchutapas tupaykuwaqchis, pipas tupaykuqqa wañunqapunin. 13Ichaqa aman pipas chay tupaykuq runataqa llamiykunqachu, aswanpas ch'aqesqa otaq wach'isqa wañunqa, animalpas kachun runapas kachun, manan kawsanqachu, nispayki. Unayta pututu waqaqtinmi orqota wichanqaku, nispa. 14Moisesmi orqomanta runakunaq kasqanman uraykamuspa paykunata ch'uyanchachirqan. Runakunan p'achankuta t'aqsakurqanku. 15Hinan Moisesqa paykunata nirqan: –Minchha p'unchaypaq wakichikuychis, warmiykichiswanpas ama puñuychischu, nispa. 16Kinsakaq p'unchay illarimuqtintaq lliphllikimurqan, q'aqyaqemurqan, orqo patamanpas manchay yana phuyu tiyaykamurqan, pututuq unayta waqasqantaq llapa karpakunapi kashaq runakunata khatatatachirqan. 17Moisestaq runakunata karpa-karpa hawaman pusarqan Dioswan tinkunankupaq, hinaspan orqo k'uchupi sayaykurqanku, 18Sinaí orqontinmi q'osñirirqan Señor Dios chay orqoman ninapi uraykamusqanrayku, q'osñitaq horno q'osñi hina wicharirqan, orqopas llapallanmi manchanata chhaphchikurqan. 19Pututu aswan-aswanta waqashaqtinmi, Moisesqa rimasharqan, Diostaq q'aqyaqey kunkawan kutichimusharqan. 20Señor Diosmi Sinaí orqo pataman uraykamurqan, hinaspan chay orqo pataman wichananpaq Moisesta waqyamurqan, chaymi Moisesqa wicharqan. 21Señor Diostaq payta nirqan: –Uraykuy, runakunata kamachimuy, paqtan rikuwayta munaspanku qorpata pasamunkuman, hinaspa askha wañunkuman. 22Qayllaykamuwaqniy sacerdotekunapas ch'uyanchakullachunkutaq, ama paykunata wañuchinaypaq, nispa. 23Moisestaq Señor Diosta nirqan: –Llaqtaqa manan wichamunmanchu kay Sinaí orqomanqa, qanmi kamachiwarqankiku: Orqopi qorpata churaychis, hinaspa ñoqapaq ch'uyatapuni qhawaychis, nispa. 24Señor Diostaq payta nirqan: –Uraykuy, hinaspa Aaronpiwan wichamunki. Sacerdotekunawan llaqtawantaq ichaqa ama wichamunankupaq qorpata pasamuchunkuchu, paqtan paykunata wañurqarichiyman, nispa. 25Hinan Moisesqa uraykuspa chayta Israel runakunaman willarqan.

will be added

X\