Éxodo 16

1Elimmantataq llapan Israel llaqta puririrqan, hinaspan Elimwan Sinaiwan tupay Sin ch'inneqman chayarqanku. Paykunaqa Egipto suyumanta lloqsimpusqanku qhepatan iskaykaq killaq chunka phisqayoq p'unchayninpi chayarqanku. 2Chay ch'inneqpin llaqtallantin Moisés contra Aarón contra chhuchupakuspanku 3nirqanku: –Allinchá kanman karqan Egipto suyupi Señor Diosqa wañuchiwasunman karqan chayqa, chaypin aychatapas mikhunatapas saksanaykukama mikhurqayku, qankunataq ichaqa kay ch'inneqman pusamuwankiku llapallaykuta yarqaypi wañuchiwanaykikupaq, nispa. 4Hinan Señor Diosqa Moisesta nirqan: –Hanaq pachamantan mikhunata parachimusqaykichis. Runakunan sapa p'unchay lloqsinqa, hinaspanmi chay p'unchayllapaq pallanqaku, chaywan yachachikuyniykunata kasukunkuchus icha manachus chayta yachanaypaq. 5Soqtakaq p'unchaypiqa sapa p'unchay pallasqankumantaqa huk chay chhikatawan pallaspanku wayk'ukuchunku, nispa. 6Chaymi Moiseswan Aaronwanqa llapa Israel runakunata nirqanku: –Ch'isiyaykuytan yachankichis Señor Diospa Egipto suyumanta pusamusqasuykichista. 7Paymi uyarirqan pay contra chhuchupakusqaykichista, chaymi tutamanta rikunkichis Señor Diospa qhapaq-atiyninta. Ñoqaykuri, ¿pitaq kayku contraykupi chhuchupakunaykichispaq? nispa. 8Moisesqa nillarqantaqmi: –Señor Diosmi uyarirqan pay contra chhuchupakusqaykichista, chaymi mikhunaykichispaq ch'isinman aychata qosunkichis, tutamantataq askha mikhunata qosunkichis. Ñoqaykuri, ¿pitaq kayku? Manan contraykutachu chhuchupakurqankichis, aswanpas Señor Dios contran, nispa. 9Chaymantataq Moisesqa Aaronta nirqan: –Llapa Israel llaqtata niy: Señor Diosman qayllaykamuychis, paymi uyarirqan chhuchupakusqaykichista, nispa. 10Llapa Israel llaqtaman Aarón rimaykushaqtintaq llapallanku ch'inneq ladoman qhawarirqanku, hinan Señor Diospa lliphlli-kaynin phuyupi qonqaylla rikhurirqan. 11Señor Diostaq Moisesta nirqan: 12–Ñoqan Israel runakunaq chhuchupakusqanta uyarini, paykunata nimuy: Ch'isiyaykuytan aychata mikhunkichis, tutamantataq mikhunata saksanaykichiskama mikhunkichis, ahinapin yachankichis ñoqa Diosniykichis Señor Dios kasqayta, nispa. 13Chay ch'isinpachataq yuthukuna hamuspa karpa-karpaman wakwaykamurqan, tutamantapaqtaq karpa-karpa muyuriqman sullamurqan. 14Sulla waksipuqtintaq ch'inneq pampantinpi rikhurirqan qasa qhopaman rikch'akuq p'altachakuna. 15Chayta rikuspataq Israel runakunaqa imachus kasqanta mana yachaspa, ninakurqanku: –¿Imataq kayri? nispa. Chaymi Moisesqa paykunata nirqan: –Kayqa mikhunaykichispaq Señor Diospa qosqasuykichis t'antan. 16Kaymi Señor Diospa kamachikusqan: Chayta sapanka pallaychis may chhikatachus mikhunaykichisman hina, hayk'a runachus karpaykichispi kasqanman hina, sapankapaq iskay litrota hina pallankichis, nispa. 17Chaymi Israel runakunaqa chay hinata ruwarqanku, wakinmi pallarqanku askhata, wakintaq pisillata. 18Pallasqankuta tupunapi tupuqtinkutaq mana puchurqanchu askhata pallaqpaqpas, manallataq pisirqanchu pisillata pallaqpaqpas. Sapankan pallarqan mikhunanpaq hina. 19Hinamantataq Moisesqa paykunata nirqan: –Manan pipas pallasqanmantaqa paqarisninpaq puchunqachu, nispa. 20Chaypas wakinninkuqa manan Moisesta kasurqankuchu, aswanmi qhepantin p'unchaypaq wakinta puchuchirqanku, ichaqa kururqapuspan asnaripurqan, Moisestaq paykunata phiñarikurqan. 21Sapa paqarmi sapanka pallarqan mikhuy atinanta hina, inti q'oñiriqtintaq chullurqapurqan. 22Soqtakaq p'unchaypitaq tawa litrota hina sapankapaq pallarqanku, chaymi llapan ayllu umalli runakunaqa Moisesman chayta willaq rirqanku, 23hinan Moisesqa paykunata nirqan: –Kaymi Señor Diospa kamachikusqan, paqarinqa samana p'unchaymi, Señor Diospaq t'aqasqa samana. Imatapas wayk'unaykichistaqa kunan wayk'uychis, imatapas t'impuchinaykichistaqa kunan t'impuchiychis. Imapas puchuqniykichistataq paqarinpaq waqaychaychis, nispa. 24Chaymi paykunaqa Moisespa kamachikusqanman hina paqarisninpaq waqaycharqanku, manan kururqanpaschu asnarirqanpaschu. 25Hinaqtinmi Moisesqa nirqan: –Kunanqa Señor Diospaq t'aqasqa samana p'unchaymi, chayrayku kunan mikhuychis, manan kunanqa campopi tarinkichischu. 26Soqtantin p'unchaymi pallankichis, qanchiskaq p'unchaytaq ichaqa samana p'unchay, chay p'unchayqa manan imapas kanqachu, nispa. 27Wakinninkutaq qanchiskaq p'unchaypi pallakuq lloqsirqan, manataq imatapas tarirqankuchu. 28Chaymi Señor Diosqa Moisesta nirqan: –¿Hayk'aqkamataq kamachikuyniykunatapas yachachikuyniykunatapas manaqa kasukuyta munankichischu? 29Uyariychis, ñoqa Señor Diosmi samana p'unchayta churapuykichis, chayraykun soqtakaq p'unchaypiqa iskay p'unchaypaq mikhunata qoykichis. Chhaynaqa, sapanka qanchiskaq p'unchaypi karpanpi kachun, amataq pipas chaymanta lloqsichunchu, nispa. 30Hinan llaqtaqa qanchiskaq p'unchaypi samakurqan. 31Israel runakunataq pallasqankuta maná nispa suticharqanku, culantro muhu hinan karqan, yuraqtaq, mielniyoq llaphllallaña t'anta hina. 32Chaymantataq Moisesqa nirqan: –Kaymi Señor Diospa kamachikusqan: Iskay litro tupunaman maná nisqa mikhuna t'antata hunt'achiychis, hinaspa mirayniykichispaq waqaychaychis, Egipto suyumanta pusamuspay ch'inneqpi qankunaman mikhuchisqay t'antata rikunankupaq, nispa. 33Moisestaq Aaronta nirqan: –Mankachata hap'iy, hinaspa chayman iskay litro tumpan yaparisqa maná nisqa mikhunata churaykuy. Chaytataq Señor Diospa qayllanman churaykunki, mirayniykichispaq waqaychasqa kananpaq, nispa. 34Hinan Aaronqa Señor Diospa Moisesta kamachisqanman hina mankachata waqaychanapaq kamachikuy simi waqaychana arcaq ñawpaqenman churaykurqan. 35Chhaynatan Israel runakunaqa maná nisqa mikhunata tawa chunka watantin mikhurqanku, runaq tiyasqan hallp'aman chayanankukama, Canaán suyu qorpaman chayanankukama. 36(Tupuqkuqa iskay chunka litro haykuq efa nisqa tupunapin).

will be added

X\