1 Señor Diosmi Moisesta nirqan: 2 –Israel runakunata kamachimuy kutirispa Pi-hahirot chimpapi karpakunankupaq, chaymi kashan Baal-zefón chimpa Migdolwan Puka Qochawan tupaypi. Chay chimpa qocha patapi karpakuchunku. 3 Rey Faraonmi Israel runakunamanta ninqa: Campopin chinkasqa purishanku, ch'inneqmi paykunata hark'ashan, nispa. 4 Ñoqataq rey Faraonpa sonqonta rumiyaykachisaq, hinan qatipamusunkichis, rey Faraonta llapa ejercitontapas atipasqaywantaq hatunchasqa kasaq, hinan Egipto runakunaqa ñoqa Señor Diosqa kasqayta yachanqaku, nispa. Israel runakunataq chay hinata ruwarqanku. 5 Egipto suyu reymanmi Israel runakunaq ripushasqankuta willarqanku, hinan paypas oficialninkunapas huk-hinata yuyaykuspa nirqanku: –¿Imatataq kaytari ruwashanchis Israel runakunata ripunankupaq kacharispa? Manan kamachinchista ruwaqqa pipas kanñachu, nispa. 6 Chaymi rey Faraonqa carretanta wakichispa soldadonkunata pusarikurqan. 7 Hinallataq soqta pachak allinnin carretakunatapas, Egipto suyu wakin carretakunatapas aparikurqan, sapanka carretapitaq capitán karqan. 8 Señor Diostaq Egipto rey Faraonpa sonqonta rumiyaykachirqan, chaymi payqa Israel runakuna Diospa atiyninwan lloqsishaqtinkupas qhepankuta rirqan. 9 Rey Faraonmi carretapi soldadonkunantin, caballopi soldadonkunantin, chakipi soldadonkunantin, paykunata qatiparqan, hinaspan tariparqan Pi-hahirot qaylla Baal-zefón chimpa Puka Qocha patapi karpakuspa kashaqtinku. 10 Rey Faraón Egipto runakunantin qayllaykushaqtintaq, Israel runakunaqa qhawarispa rikurqanku Egipto runakunaq qhepankuta hamushasqanta, chaymi sinchita mancharikuspanku Señor Diosta waqyakurqanku. 11 Moisestataq nirqanku: –¿Manachu Egipto suyupi aya p'ampanakuna karqan? ¿Imapaqmi kay ch'inneqpi wañuqta pusamuwankiku? ¿Imatan kay hinata ruwaykuwankiku? ¿Imapaqtaq Egipto suyumanta horqomuwankiku? 12 Egipto suyupiqa nirqaykikun: Hinalla Egipto runakunaq kamachin kasaqku, nispayku. Aswan allinmi kanman karqan Egipto runakunata serviyniyku kay ch'inneqpi wañunaykumantaqa, nispa. 13 Moisestaq paykunata nirqan: –Ama mancharikuychischu, allinta sayaychis, kunanmi Señor Diospa qespichiwananchispaq ruwasqanta rikunkichis, hinan chay Egipto runakunataqa manaña hayk'aqpas rikunkichisñachu. 14 Qankunaqa ama llakikuychischu, Señor Diosmi qankunarayku maqanakunqa, nispa. 15 Chaymantataq Señor Diosqa Moisesta nirqan: –¿Imanaqtintaq waqyakamuwanki? Israel runakunata kamachiy puririnankupaq. 16 Qantaq tawnaykita hoqarispa qochaman haywariy, hinaspa qochata t'aqarpariy Israel runakuna qocha ukhunta ch'aki hallp'ata hina chimpanankupaq. 17 Ñoqan Egipto runakunaq sonqonta rumiyaykachisaq qhepaykichista haykumunankupaq. Rey Faraonta, chakipi soldadonta, carretapi soldadonta, caballopi soldadontapas atipasqaywanmi ñoqaqa hatunchasqa kasaq. 18 Chaymi chay hina kaqtin Egipto runakunaqa ñoqa Señor Dios kasqayta yachanqaku, Faraonpa carretanpi caballería soldadonpi ñoqa atiyniyta rikuchisqayrayku, nispa. 19 Israel runakunaq ñawpaqenta puriq Diospa angelnintaq chay rato kutirimuspa qhepankuta rirqan, hinallataq chay ñawpaqenkuta puriq sayaq phuyupas kutirimuspa qhepankuman sayaykurqan. 20 Chay hinapin Egipto runakunawan Israel runakunawan tupaypi qhepakurqan, Egipto runakunapaqqa phuyutaq tutayaqtaqmi karqan, Israel runakunatataq ichaqa k'ancharqan. Chay tutan Egipto runakunaqa Israel runakunaman mana qayllaykuyta atirqankuchu. 21 Moisestaq qochaman makinta haywarirqan, hinan Señor Diosqa chay tutantin inti lloqsimuy lado sinchi wayrawan qochata khallarparirqan. Chaymi unuqa iskayman t'aqakurqan, qochaq pachanpas ch'aki hallp'a kapurqan. 22 Israel runakunataq Puka Qochata ch'akinta chimparqanku, unutaq perqa hina karqan pañankupipas lloq'enkupipas. 23 Rey Faraonpa llapa caballopi soldadonkunataq carretapi soldadonkunapiwan paykunata qatispa kuskan Puka Qochakama haykurqanku. 24 Pacha illarimuy qayllatataq Señor Diosqa sayaq ninamanta phuyumantawan Egipto runakunata qhawarirqan, hinaspan paykunata llaksaspa 25 carretankuq ruedankunata waqllirqarichirqan, hinan chaykunaqa ñak'ayta muyurqan. Chaymi Egipto runakunaqa ninakurqanku: –Israel runakunamanta ayqesun, Señor Diosmi paykunarayku ñoqanchiswan maqanakushan, nispa. 26 Señor Diostaq ichaqa Moisesta nirqan: –Makiykita qochaman haywariy, Egipto runakunata, carretankunatapas, caballopi soldadonkunatapas unu millp'unanpaq, nispa. 27 Chaymi Moisesqa makinta qochaman haywarirqan, pacha illarimuytataq qochaqa kaqta kutiykapurqan, Egipto runakuna ayqekushaqtintaq Señor Diosqa qochawan millp'uchirqan. 28 Unutaq kutiykapuspa carretakunata, caballopi soldadokunata, Israel runakunaq qhepanta qochaman haykuq rey Faraonpa llapa ejercitontawan millp'uykurqan, manan hukllapas kawsarqanchu. 29 Israel runakunataq ichaqa Puka Qocha chawpinta ch'akita chimparqanku, unutaq perqa hina karqan pañankupipas lloq'enkupipas. 30 Chay hinatan Señor Diosqa chay p'unchay Israel runakunata Egipto runakunaq makinmanta qespichirqan. Israel runakunataq Puka Qocha patapi Egipto runakunaq ayanta rikurqan. 31 Paykunan Egipto runakunata ancha atiywan Señor Diospa atipasqanta rikuspa Señor Diosta manchakurqanku, iñirqankutaq Señor Diospi kamachin Moisespipas.
