Éxodo 11

1Señor Diosmi Moisesta nirqan: –Huk muchuchiytawanraqmi rey Faraonman Egipto suyumanwan chayachisaq, chaymantañan payqa mana kaymanta lloqsinaykichispaq kachariyllachu kacharisunkichis, aswanpas pay kikinmi qarqosunkichis ripunaykichispaq. 2Llaqtata nimuy sapanka qharipas warmipas wasi-masinmanta qolqe alhajakunatapas qori alhajakunatapas mañakunanpaq, nispa. 3Hinaspan Señor Diosqa Israel runakunata Egipto runakunawan sumaqta qhawarichirqan. Moisestapas allinnin runapaqmi hap'irqanku rey Faraonpa oficialninkunapas llapa Egipto runakunapas. 4Moisesmi rey Faraonta nirqan: Señor Diosmi nin, kuska tutatan ñoqa pasasaq Egipto suyunta, 5chaymi Egipto suyupi llapa phiwi wawa wañunqa, kamachikuy tiyanapi tiyaq rey Faraonpa phiwinpas kutanapi kutaq kamachi warmiq phiwinpas, hinallataq uywakunaq llapa ñawpaq wachasqankunapas. 6Chaymi Egipto suyuntinpi sonqo nanay waqay kanqa, manan chay hinaqa hayk'aqpas karqanchu, manallataqmi hayk'aqpas kanqachu. 7Israel runakuna ukhupin ichaqa mana alqollapas hiriririnqachu runatapas uywatapas, Egipto runakunamanta Israel runakunata ñoqa Señor Diospa t'aqasqayta yachanaykichispaq, nispa. 8Hinaqtinmi llapan oficialniykikunaqa hamuwanqaku, qonqorikuwaspankutaq niwanqaku: –Ripuychis llapallan qatikuqniyki runakunapiwan, nispanku. Chay qhepatataq ñoqa ripusaq, nispa. Hinaspanmi Moisesqa rey Faraonpa qayllanmanta sinchi phiñasqa lloqsimpurqan. 9Chaymantataq Señor Diosqa Moisesta nirqan: –Rey Faraonqa manan kasusunkichischu, chaymi Egipto suyupi astawan musphanakunata ruwasaq, nispa. 10Moiseswan Aaronwantaq tukuy chay musphanakunata rey Faraonpa ñawpaqenpi ruwarqanku, Señor Diostaq ichaqa rey Faraonpa sonqonta rumiyaykachirqan, hinan Israel runakunata mana kacharirqanchu suyunmanta ripunankupaq.

will be added

X\